ކޮވިޑް-19: އެންމެ ފަހުގެ

ކޮރޯނާވައިރަސް (ކޮވިޑް-19) އާ ގުޅިގެން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ މުވައްޒަފުން ގޭގައި މަސައްކަތް ކުރާ ގޮތަށް ހަމަޖައްސައިފި އެވެ.

ކޮވިޑް-19 ފެތުރެމުންދާތީ އިމްޕޯޓްކުރާ އިތުރު ތަކެތީގެ ޑިއުޓީތައް ކަސްޓަމްސްއިން ކަނޑާލައިފިއެވެ. އަލަށް ޑިއުޓީ މާފްކުރި ތަކެތީގެ ތެރޭގައި ހިމެނެނީ ޕްރޮޓެކްޓިވް މާސްކާއި ހޭންޑް ވޮޝްއާއި ޕްރޮޓެކްޓިވް ގްލޯވްއާއ ފޭސް ޝީލްޑާއި ޑިސްއިންފެކްޓެވެ.

ހަލުވިމިނުގައި އިޓަލީގައި ކޮވިޑް-19 ފެތުރެމުންދާތީ ކާބޯތަކެއްޗާއި ސިއްހީ ތަކެތި އުފައްދާ ކާރުހާނާތައް ނޫން ހުރިހާ ކާރުހާނަތަކެއް ބަންދުކުރުމަށް ނިންމާފައިވާކަމަށް އިޓަލީގެ ބޮޑުވަޒީރު ވިދާޅުވެއްޖެ އެވެ. ފޭސްބުކް ލައިވް އެއްގައި ވާހަކަދައްކަވަމުން ބޮޑު ވަޒީރު ވިދާޅުވީ މިއީ ދެވަނަ ބޮޑު ހަނގުރާމައަށް ފަހު އިޓަލީއަށް ދިމާވި އެންމެ އުނދަގޫ ދުވަސްތައްކަމަށެވެ. އެހެންކަމުން ވައިރަސް ފެތުރުން ކޮންޓްރޯލް ކުރުމަށްޓަކައި ހަރުކަށި ފިޔަވަޅުތަކެއް އެޅުމަށް ނިންމާފައިވާކަމަށް ބޮޑު ވަޒީރު ވިދާޅުވި އެވެ. މިހާތަނަށް އެގައުމުން މިވައިރަސް 53،000 އަށް ވުރެ ގިނަ މީހުންނަށް ޖެހިފައިވާއިރު މަރުވި މީހުންގެ އަދަދު 4000 ށް ވުރެ މައްޗަށް އަރައެވެ.

އެމެރިކާގެ ނައިބު ރައީސް މައިކް ޕެންސް އާއި އަނބިކަނބަލުން ކޮވިޑް-19 އަށް ނެގެޓިވްކަމަށް ނައިބު ރައީސްގެ ސްޕޯކްސްވުމެން ވިދާޅުވެއްޖެ އެވެ. އެކަން ހާމަކޮށްފައިވަނީ ކޮށްފައިވާ ޓްވީޓެއްގަ އެވެ. ޕެންސް އާއި އަނބިކަނބަލުން ވައިރަސް އަށް ޓެސްޓް ކުރެއްވީ އޮފީހުގައި އުޅޭ ސްޓާފަކު ވައިރަސް އަށް ޕޮޒިޓިވްވުމާއި ގުޅިގެންނެވެ.

އެޕަލް ކުންފުނިން 2 މިލިއަން މާސްކު އެމެރިކާ އާއި ޔޫރަޕްގެ ސިއްހީ އެހީތެރިންނަށް ދިނުމަށް މަސައްކަތް ކުރަމުންދާކަމަށް އެކުންފުނިން ބުނެފި އެވެ. އެކަން ހާމަކޮށްފައިވަނީ އެކުންފުނީގެ ސީއީއޯ ކޮށްފައިވާ ޓްވީޓެއްގަ އެވެ.

ކޮވިޑް-19 ފެތުރެމުންދާތީ ރައްކާތެރިކަމުގެ ފިޔަވަޅެއްގެ ގޮތުން ބޮލީވިއާގައި 14 ދުވަހުގެ ކަރަންޓީނު އެގައުމުގެ ރައީސް އިއުލާންކުރައްވައިފި އެވެ. އެގައުމުގެ ރައީސް ވިދާޅުވީ ހުރިހާ އެންމެންވެސް 24 ގަޑިއިރު ތިބެންޖެހޭނީ ގޭގައި ކަމަށެވެ. އަދި ފިހާރަތަކަށް އެއްޗެހި ގަތުމަށް ކޮންމެ އާއިލާއަކުންވެސް ދެވޭނީ އެކަކަށްކަމަަށް އެގައުމުގެ ރައީސް ވަނީ ވިދާޅުވެފަ އެވެ. އަދި ޕަބްލިކާއި ޕްރައިވެޓް ޓްރާންސްޕޯޓް ވެސް ބަންދުކޮށްފައިވާކަމަށް ރައީސް ވަނީ ވިދާޅުވެފަ އެވެ.

ކޮރޯނާވައިރަސް (ކޮވިޑް-19) އާ ދެކޮޅަށް ކުރާ މަސައްކަތަށް އެހީވުމަށް ބޮރޫޝިއާ ޑޯޓްމުންޑްގެ ފޯވާޑް ރޮބަޓް ލެވަންޑޯސްކީ ދީލަތި އެހީއެއް ވެއްޖެ އެވެ.

ޖަރުމަން ގައުމީ ޓީމުގެ ލިއޯން ގޮރެޓްޒްކާ އާއި ޖޯޝުއާ ކިމިޗް ވަނީ ގުޅިގެން ކޮރޯނާވައިރަސް (ކޮވިޑް-19) ޖެހިފައިވާ މީހުންނަށް އެހީތެރިކަން ފޯރުކޮށްދިނުމުގެ ގޮތުން ހާއްސަ ވެބްސައިޓެއް މެދުވެރިކޮށް ފަންޑެއް ހުޅުވާފައެވެ.

މި ފަންޑަށް ޖަރުމަން ގައުމީ ޓީމުގެ ފޯވާޑް ރޮބަޓް ލެވަންޑޯސްކީ އާއި އޭނާގެ އަންހެނުން ވަނީ އެއް މިލިއަން ޔޫރޯ ހަދިޔާކޮށްފައެވެ.

ކޮވިޑް-19 ޖެހިގެން ފުރަތަމަ މީހާ ޗިލީން މަރުވެފައިވާކަމަށް އެގައުމުން ބުނެފި އެވެ. މިމީހާއަކީ އުމުރުން 82 އަހަރުގެ އަންހެނެއްކަމަށް އެގައުމުން ބުނެއެވެ.

ކޮވިޑް-19 ޖެހިގެން ފްރާންސްގައި މަރުވި މީހުންގެ އަދަދު 562 ށް އަރައިފި އެވެ. އެގައުމުގައި މިހާތަނަށް 14,459 މީހުންނަށް ވައިރަސް ޖެހިފައިވެ އެވެ. 6,172 މީހުން ހޮސްޕިޓަލްތަކުގައި އެޑްމިޓްކޮށްފައިވާއިރު މީގެތެރެއިން 1,525 ގެ ހާލު ސީރިއަސް ކަމަށް އެގައުމުން ބުނެއެވެ.

ކޮރޯނާވައިރަސް (ކޮވިޑް-19) ޖެހިގެން ރެއާލް މެޑްރިޑްގެ ކުރީގެ ރައީސް ލޮރެންޒޯ ސަންޒް ނިޔާވެއްޖެ އެވެ.

ލޮރެންޒޯ ސަންޒް ނިޔާވިކަން އޭނާގެ ދަރިފުޅު ފެނާންޑޯ ވަނީ ޔަގީންކޮށްދީފައެވެ. އުމުރުން 76 އަހަރުގެ ސަންޒް ނިޔާވިއިރު، އޭނާ ހޮސްޕިޓަލްގައި އެޑްމިޓް ކޮށްފައިވަނީ ކޮރޯނާވައިރަސް (ކޮވިޑް-19) އަށް ޕޮޒިޓިވްވުމުންނެވެ.

ކޮވިޑް-19 ޖެހިގެން އިޓަލީގައި މަރުވި މީހުންގެ އަދަދު 21 އަށް އަރައިފި އެވެ. އެގައުމުގައި ވައިރަސް ޖެހުނު މީހުންގެ އަދަދު ވަނީ 277 ން 947 އަށް މައްޗަށް އަރާފަ އެވެ. ފާއިތުވި 24 ގަޑިއިރު ތެރޭގައި އެގައުމުގައި މިވައިރަސް އަށް 2,953 މީހުން ވަނީ ޓެސްޓްކޮށްފަ އެވެ.

ފަތުރުވެރިން ފިޔަވައި ރާއްޖެއަންނަ ހުރިހާ ފަރާތްތަކެއް ސަރުކާރުން ކަނޑައަޅާތަނެއްގައި 14 ދުވަހުގެ މުއްދަތަށް ކަރަންޓީނުކުރުމަށް އެޗްޕީއޭއިން އަންގައިފި އެވެ.

ކޮރޯނާވައިރަސް (ކޮވިޑް-19) އަށް އޭސީ މިލާނުގެ ކުރީގެ ކެޕްޓަން ޕައޮލޯ މަލްޑިނީ އާއި އޭނާގެ ދަރިފުޅު އުމުރުން 18 ޑެނިއަލް މަލްޑިނީ ޕޮޒިޓިވްވެއްޖެ އެވެ.

އޭސީ މިލާނުން ވަނީ މިހާރު އެޓީމުގެ ޓެކްނިކަލް ޑިރެކްޓަރު ޕައުލޯ މަލްޑިނީ އާއި އެޓީމުގެ މިޑްފީލްޑަރު ޑެނިއަލް މަލްޑިނީ ވައިރަހަށް ޕޮޒިޓިވްވިކަން ހާމަކޮށްފައެވެ. އެ ކްލަބުން ނެރުނު ބަޔާނެއްގައި ބުނެފައިވަނީ އެ މަލްޑިނީ އާއި އޭނާގެ ދަރިފުޅު ޑެނިއެލް މިހާރު ހުރީ އައިސޮލޭޝަނުގައި ކަމަށާއި، އެ ދެ މީހުންގެ ހާލުވެސް މިހާރު ރަނގަޅު ކަމަށެވެ.

ރާއްޖެ ނިޞްބަތްވާ ދެކުނު އޭޝިޔާ ބައްރުގެ ހުރިހައި ޤައުމަކުން މިހާރު މިވަނީ މިވައިރަސް ފެނިފައެވެ. އެހެންނަމަވެސް ހުރިހައި ޤައުމުތަކުގެ ތެރެއިން މިހާތަނަށް ވައިރަސްގެ އަސަރު އެންމެ ބޮޑީ ޕާކިސްތާނުގައެވެ. ޕާކިސްތާނުން މިއަދު އެކަނިވެސް 219 މީހުން ވައިރަސްއަށް ޕޮޒިޓިވްވިއެވެ. މިއާއެކު އެޤައުމުގައި ވައިރަސް ޖެހުނު މީހުން އަދަދު ވަނީ 720 އަރާފައެވެ. އަދި މިހާރުވެސް އެދުމަތިކޮށްގެން 704 މީހުންނަށް ފަރުވާ ދެމުން އެބަގެންދެއެވެ. ފަރުވާ ދީގެން 13 މީހަކު ރަނގަޅުވެފައިވާއިރު، 3 މީހުން ވަނީ މިވައިރަސްގައި މަރުވެފައެވެ.

ދެކުނު އޭޝިޔާގެ އެހެން ޤައުމުތަކުގެ މައުލޫމާތު:

* އިންޑިއާ: 329 ކޭސް/ މިއަދު 80 މީހުން ޕޮޒިޓިވްވި/ 05 މަރު/ 23 މީހުން ރަނގަޅުވި/ 301 މީހުންނަށް ފަރުވާދެނީ

* ސްރީލަންކާ:77ކޭސް/ މިއަދު 04 މީހުން ޕޮޒިޓިވްވި/ 03 މީހުން ރަނގަޅުވި/ 74 މީހުންނަށް ފަރުވާދެނީ

* ބަންގްލަދޭޝް:24ކޭސް/ މިއަދު 04 މީހުން ޕޮޒިޓިވްވި/ 02 މަރު/ 03 މީހުން ރަނގަޅުވި/ 19 މީހުންނަށް ފަރުވާދެނީ

* އަފްޣާނިސްތާން:24ކޭސް/އެކަކުރަނގަޅުވި/ 23 މީހުންނަށް ފަރުވާދެނީ

* ރާއްޖެ: 13 ކޭސް/ 03 މީހުން ރަނގަޅުވި/ 11 މީހުންނަށް ފަރުވާދެނީ

* ބޫޓާން: 02 ކޭސް/ 02 މީހުންނަށް ފަރުވާދެނީ

* ނޭޕާލް: 01 ކޭސް/ 01 ފަރުވާ ދީގެން ރަނގަޅުވެފައި

ކޮވިޑް-19 އާއި ބެހޭ އެންމެ ފަހުގެ މައުލޫމާތުތަކައް ބަލާއިރު، މިހާރު ވައިރަސްގެ ނުރައްކާ އެންމެ ބޮޑީ އިޓަލީވިލާތުގައެވެ. މިއަދު އެކަނިވެސް އެޤައުމުން6,557ވައިރަސްއަށް ޕޮޒިޓިވްވެ، ވައިރަސް އަށް ފަރުވާ ދެމުން ދަނިކޮށް،793މީހުން މަރުވިއެވެ. މިއާއެކު އެޤައުމުން މިހާތަނަށް މިވައިރަސް ޖެހުނު މީހުންގެ އަދަދު ވަނީ53,578އަރާފައެވެ. އަދި މަރުވި މީހުންގެ ޖުމުލަ އަދަދަކީ4,825އެވެ. އެހެންނަމަވެސް ވައިރަސްއަށް ފަރުވާދީގެން މިހާތަނަށް6,072މީހުން ވަނީ ފަރުވާ ދީގެން ރަނގަޅުކޮށްފައެވެ. މިހާރުވެސް ހޮސްޕިޓަލްތަކާއި، ކަރަންޓީން ފެސިލިޓީސްތަކުގައި އެޑްމިޓްކޮށްގެން42,681މީހުންނަށް ފަރުވާދެމުން އެބަގެންދެއެވެ. އޭގެ ތެރެއިން،2,857މީހުން ނާޒުކު ޙާލަތްތަކުގައި ތިބިކަމަށް މަޢުލޫމާތު ލިބެއެވެ.

ކޮވިޑް-19 އާއި ބެހޭ އެންމެ ފަހުގެ މައުލޫމާތުތަކައް ބަލާއިރު، ދުނިޔޭގެ 186 ޤައުމަކުން މިއަދު އެކަނިވެސް ވަނީ 26,005 ވައިރަސްއަށް ޕޮޒިޓިވްވެ، ވައިރަސް އަށް ފަރުވާ ދެމުން ދަނިކޮށް، 1,575 މީހުން މަރުވެފައެވެ. މިއާއެކު މުޅި ދުނިޔެއިން މިހާތަނަށް މިވައިރަސް ޖެހުނު މީހުންގެ އަދަދު ވަނީ 301,552 އަރާފައެވެ. އަދި މަރުވި މީހުންގެ ޖުމުލަ އަދަދަކީ 12,955 އެވެ. އެހެންނަމަވެސް ވައިރަސްއަށް ފަރުވާދީގެން މިހާތަނަށް 94,625 މީހުން ވަނީ ފަރުވާ ދީގެން ރަނގަޅުކޮށްފައެވެ. މިހާރުވެސް ހޮސްޕިޓަލްތަކާއި، ކަރަންޓީން ފެސިލިޓީސްތަކުގައި އެޑްމިޓްކޮށްގެން 193,972 މީހުންނަށް ފަރުވާއެބަދެއެވެ. އޭގެ ތެރެއިން، 9,369 މީހުން ނާޒުކު ޙާލަތްތަކުގައި ތިބިކަމަށް މަޢުލޫމާތު ލިބެއެވެ.

މިހާރު ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) އަށް އިޓަލީގެ ޔުވެންޓަސްގެ ފޯވާޑް ޕައުލޯ ޑިބާލާ ޕޮޒިޓިވްވެއްޖެއެވެ.

ޑިބާލާ ކޮރޯނާވައިރަސް (ކޮވިޑް-19) އަށް ޕޮޒިޓިވްވިކަން އޭނާ ވަނީ ކަށަވަރުކޮށްދީފައެވެ. މިހާރު ޔުވެންޓަސްގެ ތިން ކުޅުންތެރިއަކު ވަނީ މި ވައިރަހަށް ޕޮޒިޓިވްވެފައެވެ. އެއީ ޑިބާލާގެ އިތުރުން މަޓުއިޑީ އާއި ޑެނިއަލީ ރުގާނީ އެވެ. މި ތިން ކުޅުންތެރިންވެސް މިހާރު ތިބީ އައިސޮލޭޝަނުގައެވެ.

މިނިސްޓްރީ އޮފް އިކޮނޮމިކް ޑެވެލޮޕްމެންޓުން ބުނެފައިވަނީ، ކޮވިޑް-19 ގެ ނުރައްކަލާއި ގުޅިގެން ގެންނަމުންދާ ބަދަލުތަކުގައި، ވަޒީފާއިން ވަކިކުރުމާއި، އެފަދަ އެހެނިހެން ފިޔަވަޅެއް އަޅައިފިނަމަ އެކަމާއި ގުޅޭ ރިޕޯޓު ޖޮބް ސެންޓަރށް ރިޕޯޓު ކުރުމަށް އަންގާކަަމަށެވެ.

ކޮވިޑް-19 އާއި ގުޅިގެން ސާރކގެ މެންބަރު ޤައުމުތަކުން އެކުލަވާލާފައިވާ އެމަރޖެންސީ ފަންޑަށް ދިވެހި ސަރުކާރުން ދެލައްކަ ޑޮލަރު ދިނުމާއި ގުޅިގެން އިންޑިއާގެ ބޮޑުވަޒީރު ނަރެންދްރަ މޯދީ ދިވެހި ސަރުކާރަށް ޝުކުރު އަދާކޮށްފިއެވެ. އެމަނިކުފާނު ވިދާޅުވެފައިވަނީ މީގެ ސަބަބުން ކޮވިޑް-19 ނައްތާލުމަށް ގުޅިގެން ކުރަމުންދާ މަސައްކަތައް އިތުރު ބާރެއް ލިބިގެންދާނެކަމަށެވެ.

ދުނިޔޭގެ އެކިކަންކޮޅުތަކުގައި ޙާލުގައި ޖެހިފައި ތިބި ދިވެހި ރައްޔިތުންނަށް ދިވެހި ޑިޕްލޮމެޓިކް މިޝަންތައް މެދުވެރިކޮށް، އެހީތެރިކަން ފޯރުކޮށްދިނުމަށް މަސައްކަތް ކުރަމުންދާކަމަށް ޚާރިޖީ ވަޒީރު އަބްދުﷲ ޝާހިރު ވިދާޅުވެއްޖެއެވެ. އެމަނިކުފާނު ވިދާޅުވެފައިވަނީ، މިއަދު ފްލައިޓް ކެންސަލް ވެގެން ނޭޕާލާއި، އިންޑިއާއާއި، ސްރީލަންކާގައި ތާށިވި ދިވެހިން ރާއްޖެ ގެނައުމަށް މަސައްކަތް ކުރެވުނު ކަމަށެވެ. އަދި މި ދަތި ދަނޑިވަޅުގައި ދެމުންގެންދާ އެއްބާރުލުމާއި ކެތްތެރިކަމަށް އެމަނިކުފާނު ވަނީ ޝުކުރު އަދާކުރައްވާފައެވެ.

ކޮވިޑް-19 އާއި ގުޅިގެން ބައެއް ވިޔަފާރިތަކުންނާއި ކުންފުނިތަކުން އެތަންތަނުގެ މުވައްޒަފުންގެ މުސާރައާއި އިނާޔަތްތައް އުނިކުރަމުން ދިޔަނަމަވެސް، ހުދުމާގެ އެކި އައުޓްލެޓްސްތަކުގައި މަސައްކަތް ކުރާ މުވައްޒަފުންގެ މުސާރައާއި އިނާޔަތްތައް އުނި ނުކުރާނެކަމުގެ ޔަޤީންކަން އެކުންފުނިން ދީފިއެވެ. އެކުންފުނިން ބުނީ ވައިރަސްއާއި ގުޅިގެން އެކުންފުނީގެ އަައުޓްލެޓްސްތައް ބަންދުކުރަން ޖެހުނު ނަމަވެސް، މުވައްޒަފުންގެ މުސާރައާއި އިނާޔަތްތަކައް ބަދަލެއް ނުގެންނާނެކަމަށެވެ.

އާސަންދައިގެ ދަށުން ބޭސްފަރުވާއަށް، އިންޑިއާއަށް މިހާރު ގޮސްތިބި ދިވެހިންގެ ތެރެއިން ޤައުމަށް ނާދެވިފަ ތިބި ދިވެހިން، އަނބުރާ ރާއްޖެ އާދެވެންދެން އެމީހުންގެ ތިބުމާއި ކެއުމުގެ ޚަރަދު އިންޑިއާގައި ހުންނަ ދިވެހި ކޮންސިއުލޭޓްގެ ބެލުމުގެ ދަށުން އާސަންދައާއި، އެންސްޕާ ގުޅިގެން ބަލަހައްޓާގޮތަށް އާސަންދައިން ހަމަޖައްސައިފިއެވެ.

އިންޑިއާގައި ތިއްބެވި މިފަދަ ފަރާތްތަކުން އިންޑިއާގެ ދިވެހި ކޮންސިއުލޭޓްގެ ހޮޓްލައިން 919847702554+ އަށް ގުޅުއްވާ މަޢުލޫމާތު ސާފުކުރެއްވޭނެއެވެ.

ރާއްޖޭގެ ގެސްޓްހައުސްތަކުން ފަތުުރުވެރިން ފުރަން ކަނޑައަޅާފައިވާ ގަޑިއާ ވިހާވެސް ގާތް ގަޑިއަކު އެއަރޕޯޓަށް ގެންދިއުމަށް ގެސްޓްހައުސް އެސޯސިއޭޝަން އޮފް ދަ މޯލްޑިވްސް އިން އިލްތިމާސްކޮށްފިއެވެ.

މިފަދައިން އިލްތިމާސްކޮށްްފައިވަނީ ބައެއް ގެސްޓް ހައުސްތަކުން މާކުރިން ފަތުރުވެރިން އެއަރޕޯޓަށް ގެނެސް ދޫކޮށްލާތީއާއި، ފަތުުރުވެރިންނާމެދު އަމަލު ކުރާ ގޮތަކުން ޜާއްޖޭގެ ފަތުރުވެރިކަމުގެ ސިނާއަތައް އޭގެ ނޭދެވޭ ސަރުކޮށްފާނެތީއެވެ.

މިހާރު ޑީއެޗް-11 ގައި ފަރުވާ ދެމުންދާ މީހާގެ ހާލު ރަނގަޅުކަމަށް ނޫސްވެރިންގެ ބައްދަލުވުމުގައި ޑޮކްޓަރ ވިދާޅުވިއެވެ.

އޭނާގެ އިތުރު މައްސަލަތަކެއް ފާހަގަކުރެވިފައި ނުވާ ކަމަށްވެސް ވިދާޅުވިއެވެ.

މިހާރު މޮނީޓަރ ކުރަމުންދާ އިތުރު ފަރާތްތަކުގެ ހާލު ރަނގަޅުކަމަށް ވިދާޅުވިއެވެ.

ހުކުރު ދުވަހު

ދިވެހިން: 192

ޓުއަރިސްޓުން: 326 މީހުން

އެމްޕްލޯއިމެންޓް ވިސާގައި: 54

ހޮނިހިރު ދުވަހުގެ 18:00 އާއި ހަމަޔަށް:

ދިވެހިން: 128

ފަތުރުވެރިން: 204

އެމްޕްލޯއިމެންޓް ވިސާގައި: 17

ކަރަންޓީން ފެސިލިޓީސްތަކުގައި ތިބި ދިވެހިންނަށް ތަކެތި ފޮނުވުމުގެ އިންތިޒާމުތައް ސަރުކާުން މިވަނީ ހަމަޖައްސާފައެވެ. އެގޮތުން، އެފަދަ ފަރާތްތްތަކައް ތަކެތި ފޮނުވަން ބޭނުންވާ ބެލެނިވެރިން ނުވަތަ ބަލަދުވެރިން، ދަރުބާރުގެއަށް އެތަކެތި ޙަވާލުކުރާނެ ޚާއްޞަ ގަޑިތަކެއް މިހާރު މިވަނީ އިޢުލާންކޮށްފައެވެ.

މީގެ އިތުރުން ކަރަންޓީން ފެސިލިޓީސްގައި ފޯނަށް ޖަވާބުދޭނެ ގަޑިތަކެއްވެސް ވަނީ ހަމަޖައްސާފައެވެ.

ޖުމްލަ 593 ސާމްޕަލް ނެގިފައިވޭ

ނެގެޓިވް: 580 ސާމްޕަލް

ނަތީޖާ ޕެންޑިންގް: 31

ޕޮޒިޓިވް ކޭސް: 13

ރަނގަޅުވި:3

ކަރަންޓީނު/ އައިސޮލޭޝަން

ވިލިވަރު:28

އެޗްއައިއެޗް:128

ޑީއެޗް-11 ގައި އެޑްމިޓް ކުރެވިފައި: 3 ( ދެމީހުންނަކީ މިހާރު ބަލިން ރަނގަޅުވެފައި ތިބި މީހުން)

ވެލިދޫ އައިސޮލޭޝަން ފެސިލިޓ: 16

ފަންއައިލެންޑް ކަރަންޓީނު ފެސިލިޓީ: 64

ކުޑަބަނޑޮސް:32

ބިޔާދޫ ކަރަންޓީނު ފެސިލިޓީ:47

ކޮވިޑް-19: ދުނިޔޭގެ ހާލަތަށް ބަލާލާއިރު މިހާތަނަށް 288,593 އަށް ވުރެ ގިނަ ކޭސްވަނީ ރިޕޯޓުކުރެވިފައެވެ.

އަދި މި ބަލި ޖެހިގެން 11،947 އަށް ވުރެ ގިނަ މީހުން މަރުވެފައިވެއެވެ. މި ބަލި ޖެހިގެން ރަނގަޅުވި މީހުންގެ އެންމެ ފަހުގެ އަދަދުތަކެއް ބަލާލާއިރު 93،644 މީހުން ވަނީ ރަނގަޅުވެފައެވެ. މިހާތަނަށް މި ބަލި ދުނިޔޭގެ 186 ސަރަހައްދަކުން ވަނީ ފެނިފައެވެ.

ކޮރޯނާވައިރަސް (ކޮވިޑް-19) އަށް ޕޯޓްސްމަތުގެ ތިން ކުޅުންތެރިއަކު ޕޮޒިޓިވްވެއްޖެ އެވެ.

އިނގިރޭސި ތިންވަނަ ޑިވިޝަނުގައި ވާދަކުރަމުން އަންނަ ޕޯޓްސްމަތުގެ ތިން ކުޅުންތެރިއަކު މި ވައިރަހަށް ޕޮޒިޓިވްވިކަން އެ ކްލަބުންވެސް ވަނީ ކަށަވަރުކޮށްދީފައެވެ. މި ވައިރަހަށް ޕޮޒިޓިވްވީ ޕޯޓްސްމަތުގެ ޖޭމްސް ބޮލްޓޮން، އެންޑީ ކެނަން އަދި ސީން ރެގެޓް އެވެ. މިހާރު މި ތިން ކުޅުންތެރިން އައިސޮލޭޝަނަށް ލާފައިވާ ކަމަށް އެ ކްލަބުން ވަނީ ބުނެފައެވެ.

ދުނިޔޭގެ އެކިކަންކޮޅުތަކުގައި ހަލުވިމިނެއްގައި ކޮވިޑް-19 ފެތުރެމުންދާ މި ދަނޑިވަޅުގައި، ދިވެހިން ރާއްޖެއިން ބޭރަށް ފުރުމުގެ ކުރިންނާއި، އަދި މިވަގުތު އެކި ޤައުމުތަކުގައި ތިބި ދިވެހިން ރާއްޖެ އައުމުގެ ކުރިން އެޤައުމެއްގައި ހުރި ނުވަތަ އެމީހަކު ހުރި ޤައުމަކާއި އެންމެ ކައިރީގައި ހުރި މިޝަން ނުވަތަ ކޮންސިއުލޭޓަށް މައުލޫމާތު ހިއްސާކުރުމަށް މިނިސްޓްރީ އޮފް ފޮރިން އެފެއަރޒުން އެދިއްޖެއެވެ.

އެގޮތުން ރާއްޖެއަށް ދަތުރުކުރުމުގެ ކުރިން، ދަތުރުކުރާ ފަރާތްތަކުގެ ޕާސްޕޯޓް ނަންބަރާއި ދަތުރު ކުރާ ފްލައިޓުގެ ތަފުޞީލު ދުރާލާ މިމިނިސްޓްރީއަށް ނުވަތަ އެންމެ ކައިރީގައި ހުންނަ ރާއްޖޭގެ ޑިޕްލޮމެޓިކް މިޝަނަކަށް ހިއްސާ ކުރުމަށް އެދެމެވެ.

މުޅި ދުނިޔޭގައި ކޮވިޑް-19 ހަލުވިކަމާއެކު ފެތުރެމުން އަންނާތީ، ނޭޕާލްގެ ސަރުކާރުން އަޅަމުންގެންދާ ފިޔަވަޅުތައް އިތުރަށް ހަރުދަނާކުރުމުގެ ގޮތުން، އެޤައުމުގެ ސަރުކާރުން ވަނީ ގިނަ ފިޔަވަޅުތަކެއް އަަޅަން ނިންމާފައެވެ. އެހެންކަމުން އެޤައުމުގައި ދިރިއުޅޭ ދިވެހިން މިކަންކަމަށް ސަމާލުވުމަށް ދިވެހި ޚާރިއްޖިއްޔާއިން ވަނި އިލްތިމާސްކޮށްފައެވެ.

ދުނިޔޭގެ އެކިކަންކޮޅުތަކުގައި ތިއްބެވި ދިވެހި ރައްޔިތުން މި ދަނޑިވަޅުގައި ސަރުކާރުގެ އެއްވެސް އެހީތެރިކަމަށް ބޭނުންވާނަމަ، ނުވަތަ އެއްވެސް މަޢުލޫމާތެއް ސާފުކުރައްވަން ބޭނުންފުޅުވާނަމަ މިނިސްޓްރީ އޮފް ފޮރިން އެފެއަރޒް ގެ ކޮންސިއުލަރ އެމަރޖެންސީ ނަންބަރަށް ގުޅުއްވަމުން ގެންދެވުމަށް އެ މިނިސްޓްރީން އިލްތިމާސްކޮށްފިއެވެ. އެމިނިސްޓްރީން ވަނީ މި ދުވަސްވަރު އެ ބޭފުޅަކު އުޅުއްވާ ޤައުމެއްގައި ހުންނަ ރާއްޖޭގެ ހައިކޮމިޝަނަށް ނުވަތަ ކޮންސިއުލޭޓުގައި ރަޖިސްޓްރީ ކުރުމަށާއި، އަދި އެފަދަ ތަނެއް ނެތް ޤައުމެއް ނަމަ، އެންމެ ކައިރި ޤައުމެއްގައި ހުރި ހައިކޮމިޝަނަކާއި މަޢުލޫމާތު ހިއްސާކުރެއްވުމަށް އިލްތިމާސްކޮށްފައެވެ. އަދި މި ދަނޑިވަޅުގައި ރާއްޖެއިން ބޭރަށް ދަތުރުކުރައްވާނަމަ، އެމިނިސްޓްރީގައި ރަޖިސްޓްރީ ކުރެއްވުމަށްފަހު ދަތުރު ފެށުމަށްވެސް ވަނީ އިލްތިމާސްކޮށްފައެވެ.

ކޮވިޑް-19 އާއި ގުޅިގެން ރާއްޖެއަށް އެހީތެރިވުމަށް އިންޑިއާއިން ފޮނުވި 14 މެންބަރުންގެ މެޑިކަލް ރިލީފް ޓީމް މަސައްކަތް ނިންމާލުމަށް ފަހު މިއަދު ފުރައިފިއެވެ. މިޓީމުން ރާއްޖޭގައި ހޭދަ ކުރި ދުވަސްތަކުގައި ވަނީ އެކި ރަށްރަށަށް ގޮސް ވަރކްޝޮޕްތަކާއި ތަމްރީނު ޕްރޮގުރާމުތަކެއް ބާއްވާފައެވެ. އަދި އައިޖީއެމްއެޗުގައިވެސް ޓިމުގެ ބައެއް ބޭފުޅުން ޙަރަކާތްތެރިވިއެވެ.

ކޮވިޑް-19 އާއި ގުޅިގެން ގިނަ ބަޔަކު ގޭގައި މަޑުކުރަން ޖެހިފައިވާއިރު، ރާއްޖެ ޓީވީން އަހައްމިއްޔަތުކަން ދެނީ ދިވެހި ރައްޔިތުންނަށް މިކަމާއި ގުޅޭ އެންމެ ޞައްޙަ މަޢުލޫމާތުތައް ފޯރުކޮށްދިނުމާއެކު، އަހުލުވެރިކުރުވުމަށެވެ.

ހަމަ އެއާއެކު، ގިނަ ބަޔަކު މިވަގުތު ގޭގައި ވަގުތު ގުނަމުންދާއިރު އެމީހުންނަށް މުނި ފޫހި ފިލުވައި ދިނުމާއި، އަދި ގޭގައި ތިބެގެން އެހެނިހެން ދިިރިއުޅުމުގެ ވަށްޓަފާޅި ދަސްކޮށްދޭނެ ބައެއް ޙަރަކާތްތައް ގެނެސްދިނުމަށް ވެސް ދަނީ މަސައްކަތްކުރަމުންނެވެ. އެގޮތުން މިރޭ 11:00 ޖަހާއިރު ޑިޓިއުން ބޭންޑުގެ ލައިވް މިއުޒިކް ޝޯވއެއް ގެނެސްދިނުމަށް ވަނީ ހަމަޖެހިފައެވެ. ޝޯވ ކުރިޔަށްގެންދަނީ އާންމުކޮށް ރިކުއެސްޓް ކުރެވޭ ގޮތައް ފުރުޞަތު ހުޅުވާލައިގެންނެވެ. ރާއްޖެޓީވީގެ ޓްވިޓަރ އަދި ފޭސްބުކް މެދުވެރިކޮށް ތިޔަ ބޭފުޅުން ބޭނުންވެލައްވާ ލަވަޔަކަށް ރިކުއެސްޓްކުރެވިދާނެއެވެ.

ކޮވިޑް-19 އާއި ގުޅިގެން ސަރުކާރުން އަޅަމުންދާ ރައްކާތެރިކަމުގެ ފިޔަވަޅުގެ ދަށުން ތަންފީޒު ކުރަމުންދާ "އިޖުތިމާޢި ގައިދުރުކަން" އާންމު ރައްޔިތުން ބަލައިިގަނެ، އެއަށް އެގޮތުގެ މަތިން އަމަލުކުރަމުންދާތީ މޯލްޑިވްސް ޕޮލިސް ސަރވިސް އިން އެކަމަށް ޝުކުރު އަދާކުރައްވައިފިއެވެ. ހަމަ އެއާއެކު، އެމްޕީއެސްއިން ސަރުކާރުން މިހާރު މިކަމާއި ގުޅިގެން އަޅަމުންދާ މުހިންމު ފިޔަވަޅުތަކައް އެއްބާރުލުން ދިނުމުގައި ރައްޔިތުން ދެމިތިބޭނެކަމަށް އުންމީދުކުރާކަމަށްވެސް ބުނެފައެވެ.

ކޮވިޑް-19 އާއި ގުޅިގެން ސަރުކާރުން އަޅުއްވާފައިވާ ފިޔަވަޅުތައް ތަންފީޒު ކުރެއްވުމުގެ ގޮތުން، ބައެއް ޤައުމުތަކުން އަންނަ ދިވެހިން 14 ދުވަސްވަންދެން ކަރަންޓީން ފެސިލިޓީސްތަކުގައި ބައިތިއްބަން ވަނީ ނިންމާފައެވެ. އެގޮތުން މިހާރުވެސް ގިނަ އަދަދެއްގެ މީހުން މިފަދަ ފެސިލިޓީސްތަކުގައި ދުވަސްތައް ގުނަމުންދާއިރު، އެބޭފުޅުންގެ ކެތްތެރިކަން ބަލައިގަނެ، ޑިފެންސް މިނިސްޓަރ މާރިޔާ އަޙްމަދު ދީދީ ވަނީ އެމީހުންނާއި އެމީހުންގެ އާއިލާތަކައް ޝުކުރު ދަންނަވާފައެވެ. އަދި ޚިދުމަތްތައް ދެއްވުމުގައި އެކި ދާއިރާތަކުގެ ފަންނުވެރިން ކުރައްވަމުން ގެންދަވާ މަސައްކަތްފުޅަށްވެސް މިނިސްޓަރ ވަނީ ތަޢުރީފުކުރައްވާ ޝުކުރު އަދާކުރައްވާފައެވެ.