ކޮވިޑް-19: އެންމެ ފަހުގެ

ރާއްޖޭގެ ފޮރިން މިނިސްޓަރ ޢަބްދުﷲ ޝާހިދު ވިދާޅުވީ، ޗައިނާގެ ތިބި 7 މީހުން ގެންދާނީ އިންޑިއާގެ ވެރިރަށް ނިއުދިއްލީއަށް ކަމަށެވެ. އަދި އެމީހުން އިންޑިއާއަށް ގެންދާނީ އެއަރ އިންޑިއާގެ ޚާއްޞަ ފްލައިޓެއްގައި ކަމަށެވެ. މިނިސްޓަރ ވިދާޅުވީ އެމީހުން ދިއްލީގައި ވަކި މުއްދަތެއް ވަންދެން ކަރަންޓީނު ކުރެވޭނެ ކަމަށެވެ.

މިކަމާއި ގުޅިގެން، މިނިސްޓަރ ޝާހިދު ވަނީ އިންޑިއާގެ ބޮޑު ވަޒީރު ނަރެންދްރަ މޯދީއަށާއި އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ ސުބްރަމާނިޔަމް ޝަންކަރުގެ އިތުރުން އިންޑިއާގެ ކަމާބެހޭ ފަރާތްތަކަށް ޝުކުރުއަދާ ކުރައްވާފައެވެ.

ހެލްތު މިނިސްޓަރ ޢަބްދުﷲ އަމީން ވިދާޅުވީ، ނޮވެލް ކޮރޯނާވައިރަސްއަށް ޝައްކުކުރެވިގެން ތިން މީހެއްގެ ލޭގެ ސާލްޕަލް ނަގާ، ޓެސްޓްތައް ހެދުމަށްޓަކައި ވަނީ އިންޑިއާގެ ޕޫނާގައި ހުންނަ ލެބޯރެޓަރީއަކަށް ރޭގެ ވަގުތެއްގައި ފޮނުވާފައިވާކަމަށެވެ. އަދި މިއަދުގެ ވަގުތެއްގައި އޭގެ ނަތީޖާ ލިބޭނެކަމަށެވެ.

ހެލްތު މިނިސްޓަރ ޢަބްދުﷲ އަމީން ވިދާޅުވީ، މިހާތަނަށް ނޮވެލް ކޮރޯނާ ވައިރަސްގެ މަޢުލޫމާތު ދެމުން އައިން މާލޭގައިމަރުކަޒުކޮށްގެން ކަމަށެވެ. އެހެންނަމަވެސް ކުރިޔަށް އޮތް 3 ދުވަހު ރާއްޖޭގެ ހުރިހައި ކަންކޮޅުތަކަށް ޢަމާޒުކޮށްގެން މަޢުލޫމާތު ދިނުމުގެ ކަންކަން ކުރިޔަށްގެންދިއުމުގެ އިންތިޒާމު މިހާރު ހަމަޖައްސަމުން އަންނަކަމަށެވެ. އެގޮތުން އަތޮޅުތެރޭގައި މަޢުލޫމާތުދޭނީ، އެއަތޮޅުތަކުގެ ހޮސްޕިޓަލްތަކުންނާއި، އަދި ހެލްތު މިނިސްޓްރީގެ ޓީމުތައް އަތޮޅުތަކަށް ގޮސްގެން ކަމަށް މިނިސްޓަރ ވިދާޅުވެއެވެ.

ނޮވެލް ކޮރޯނާވައިރަސް ގައި ފިލިޕީންސް އިން މީހަކު މަރުވެއްޖެއެވެ. ދުނިޔޭގެ ޞިއްޙަތުޖަމްޢިއްޔައިން ބުނެފައިވަނީ މިއީ ޗައިނާއިން ބޭރުން މިބަލީގައި މީހަކު މަރުވި ފުރަތަމަ ފަހަރުކަމަށެވެ.

އިތުރު ތިން މީހުންނަށް ކޮރޯނާވައިރަސް ޖެހި ސައުތުކޮރެއާއިން ކޮރޯނާވައިރަސް ޖެހުނު މީހުންގެ އަދަދު 15 ށް އަރައިފި އެވެ.

އެންމެފަހުން ވައިރަސް ޖެހިފައިވާ 28 އަހަރުގެ މީހާ އަކީ ވުހާން އިން އެގައުމަށް ގެނައި މީހުންގެ ތެރެއިން މީހެކެވެ. ދެން ވައިރަސް ޖެހުނު 40 އަހަރުގެ މީހާ މިހާރުވެސް ހުރީ ކަރަންޓީނުކޮށްފައި ކަމަށް އޮފިޝަލުން ބުނެއެވެ. އަދި މީނާއަކީ ދެން މިވައިރަސް ޖެހުނު އަނެއް މީހާގެ ތިމާގެ މީހެއްކަމަށް އޮފިޝަލުން ބުނެ އެވެ.

ޗައިނާގައި ހަލުވިކަމާއެކު ފެތުރެމުންދާ ކޮރޯނާވައިރަސްގެ ސަބަބުން މަރުވާ މީހުންގެ ޖަނާޒާ ނުބާއްވާ އެމީހުން އަވަހަށް ނައްތާލުމަށް ސިއްހީ އޮފިޝަލުން އިލްތިމާސްކޮށްފި އެވެ.

އެމީހުންގެ ހަށިގަނޑު އިތުރުތަނަކަށް ނުގެންގޮސް ވީ އެންމެ އަވަހަކަށް އަންދާލުމަށް ސިއްހީ އޮފިޝަލުން ވަނީ ލަފާދީފަ އެވެ. މިހާތަނަށް އާއިރު ޗައިނާގައި ވަނީ މިވައިރަސް ޖެހިގެން 304 މީހުން މަރުވެފަ އެވެ.

ކޮރޯނާވައިރަސް ޖެހިގެން މަރުވި މީހުންގެ އަދަދު 304 ށް އަރައިފިކަމަށް ޗައިނާއިން ބުނެފި އެވެ.

ހޮނިހިރު ދުވަހު އެކަނިވެސް ޗައިނާއިން ކޮރޯނާވައިރަސްގެ އަސަރު 2590 މީހަކަށް ކޮށްފައިވެ އެވެ. އެއާއެކު މިހާތަނަށް ކޮރޯނާވައިރަސްގެ އަސަރު ކުރި މީހުންގެ ޖުމްލަ އަދަދު 14،380 ށް ވަނީ އަރާފަ އެވެ.

ކޮރޯނާވައިރަސް ފެތުރެމުންދާތީ އެމެރިކަން އެއަރލައިން އިން ހޮންގ ކޮންގ އަށް ކުރަން ހުރި ދަތުރުތައްވެސް ކެންސަލްކޮށްފި އެވެ. މީގެކުރިން އެއެއަރލައިނުން ވަނީ ޗައިނާއަށް ކުރަން ހުރި ދަތުރުތައް ކެންސަލްކޮށްފަ އެވެ.

އެމެރިކަން އެއަރލައިނުން ބުނެފައިވަނީ ކޮންމެ ދުވަހަކުވެސް ހާލަތަށް ބެލުމަށްފަހު ހޮންގ ކޮންގ އަށް ދަތުރުކުރުމަށް ހުރި ފްލައިޓްތަކާމެދު ގޮތެއް ނިންމާނެ ކަމަށެވެ.

އިތުރު 45 މީހުންގެ މަރާއެކު ހޫބޭ ޕްރޮވިންސުން ކޮރޯނާވައިރަސް ޖެހިގެން މަރުވި މީހުންގެ އަދަދު 294 ށް އަރައިފި އެވެ. ހޮނިހިރު ދުވަހު ހޫބޭ ޕްރޮވިންސުން ވަނީ އިތުރު 2000 މީހުންނަށް މިވައިރަސް ޖެހިފަ އެވެ. މިއާއެކު ޗައިނާއިން ކޮރޯނާވައިރަސް ޖެހުނު މީހުންގެ އަދަދު 13،700 ށް އެރީއެވެ.

ފާއިތުވި ދެ ހަފްތާގެ ތެރޭގައި ޗައިނާއަށް ގޮސްފައިވާ އެއްވެސް މީހަކަށް އިސްރޭލަށް އެތެރެނުވެވޭ ގޮތަށް އެގައުމުން ކަނޑައަޅައިފި އެވެ.

އިސްރޭލުން ބުނީ އިސްރޭލްގެ ރައްޔިތުން ނޫން އެއްވެސް މީހަކަށް ވައިގެ މަގުންވެސް، ކަނޑުމަގުން ވިއަސް އަދި ބޯޑަރު ހުރަސްކޮށްފައިވެސް އެގައުމަށް ނުވަދެވޭނެ ކަމަށެވެ. މީގެއިތުރުން ޗައިނާއިން އައި އެގައުމުގެ ރައްޔިތުން 14 ދުވަހު ގޭގައި ކަރަންޓީނު ވެގެން ތިބުމަށްވެސް އެގައުމުން ވަނީ އަންގާފައެވެ. ވައިރަސްގެ އަލާމާތެއް ނުފެނުނު ކަމުގައިވިޔަސް ގޭގައި ތިބުމަށް އެގައުމުން ވަނީ ޗައިނާއިން އައި ރައްޔިތުންނަށް އަންގާފަ އެވެ.

ޗައިނާއަށް ގޮސްފައިވާ އެއްވެސް މީހަކު އޮސްޓްރޭލިއާއަށް ނުވަދެވޭގޮތަށް އެގައުމުގެ ސަރުކާރުން ކަނޑައަޅައިފި އެވެ.

ހަލުވިކަމާއެކު ކޮރޯނާވައިރަސް ފެތުރެމުންދާތީ ފާއިތުވި ދުވަސްތަކުގައި ޗައިނާއަށް ގޮސްފައިވާ އެއްވެސް މީހަކަށް އޮސްޓްރޭލިޔާއަށް ނުވަދެވޭނެކަމަށް އެގައުމުން ބުނެއެވެ. އަދި މިފަޔަވަޅު މިއެޅީ އޮސްޓްރޭލިޔާގެ ރައްޔިތުންގެ ސަލާމަތާ ރައްކާތެރިކަމަށްޓަކައި ކަމަށް އެގައުމުން ބުނެ އެވެ.

ޗައިނާގައި ހަލުވުމިނުގައި ކޮރޯނާވައިރަސް ފެތުރެމުންދާތީ ހިލޭ ވިސާގައި ޗައިނާއިން ފަތުރުވެރިން އައުމާއި ދިޔުން ރަޝިޔާއިން މެދުކަނޑާލައިފި އެވެ.

ރަޝިޔާ ސަރުކާރުން ބުނާގޮތުން ފެބްރުއަރީ މަހުގެ 2 ވަނަ ދުވަހުން ފެށިގެން މިވިސާ ދޫކުރުން ހުއްޓާލާނެ އެވެ. އަދި ޗައިނާ މީހުންނަށް ވޯރކް ވިސާ ދޫކުރުންވެސް ވަގުތީ ގޮތުން މެދުކަނޑާލާނެ ކަމަށް ރަޝިޔާއިން ބުނެއެވެ.

ކޮރޯނާވައިރަސްގެ އަސަރުކޮށްފައިވާ 8 ވަނަ މީހާ ޖަރުމަނުވިލާތުން ފެނިއްޖެ އެވެ. ޖަރުމަނުން ބުނީ މިއީ 33 އަހަރުގެ މީހެއްކަމަށާއި މިއީ ކުރިން މިވައިރަސްގެ އަސަރު ފެނުނު ހަ މީހުންނާއެކު މަސައްކަތްކުރަމުން ދިޔަ މީހެއްކަމަށެވެ.

ޗައިނާގައި ކޮރޯނާވައިރަސް ފެތުރެމުންދާތީ އެގައުމުގައި ހުރި އެޕަލްގެ ހުރިހާ ސްޓޯރުތަކެއް ބަންދުކުރުމަށް އެޕަލް އިން ނިންމައިފި އެވެ. އެޕަލް އިން ބުނީ ފެބްރުއަރީމަހުގެ 9 އާ ހަމައަށް އެޕަލްގެ ހުރިހާ ސްޓޯރުތަކެއް ބަންދުކޮށްފައިވާ ކަމަށެވެ.

ވުހާންގައި ތިބި ތުރުކީ ރައްޔިތުންގެ ގޮވައިގެން އައި ފްލައިޓް ތުރުކީއަށް އައިސްފިކަމަށް އެގައުމުން ބުނެފިއެވެ.

މިއީ ކާރގޯ ފްލައިޓެ ކެވެ. މި ފްލައިޓުން ގެނައީ ތުރުކީ އާއި ޖޯރޖިއާގެ ރައްޔިތުންނެވެ.

ހަލުވިކަމާއެކު ކޮރޯނާވައިރަސް ފެތުރެމުންދާތީ އިރާނުން ޗައިނާއަށް އަންނަ ފްލައިޓްތަކާއި ދާ ފްލައިޓްތައް ވަގުތީގޮތުން މެދުކަނޑާލައިފި އެވެ. އަދި މިހާތަނަށް އާއިރު އިރާނުން މިވައިރަސްގެ އަސަރު ފެނިފައެއްނުވެ އެވެ.

ޤަތަރު އެއަރވޭސް އިން ޗައިނާއަށް ދަތުރުކުރާ ފްލައިޓްތައް މެދުކަނޑާލައިފި އެވެ. އެއަރލައިނުން ބުނެފައިވަނީ ހޯމަ ދުވަހުން ފެށިގެން ޗައިނާއަށް ކުރާ ދަތުރުތައް މެދުކަނޑާލާނެ ކަމަށެވެ.

އައު އަހަރާދިމާކޮށް ދިން ޗުއްޓީ ހޫބޭ ޕްރޮވިންސްގައި ފެބްރުއަރީ މަހުގެ 13 ވަނަ ދުވަހާ ހަމައަށް އިތުރުކޮށްފި އެވެ. ކޮރޯނާވައިރަސް އަދިވެސް ބާރު ސްޕީޑެއްގައި ފެތުރެމުންދާތީ ޗުއްޓީ ދިގުދަންމާލީ ކަމަށް ހޫބޭގެ ނޫހަކުން ވަނީ ބުނެފަ އެވެ.

ޔުނައިޓެޑް އަރަބް އެމިރޭޓްސް (ޔޫއޭއީ) ން ކޮރޯނާވައިރަސްގެ އަސަރު ކޮށްފައިވާ 5 ވަނަ މީހާ ފެނިފައިވާކަމަށް އެގައުމުން ބުނެފި އެވެ.

މިމީހާއަކީ ވުހާން އިން އައިސްފައިވާ މީހެއް ކަމަށާއި މިމީހާގެ ހާލު ރަނގަޅުކަމަށް އެގައުމުން ބުނެއެވެ.

ކޮރޯނާވައިރަސްގެ އަސަރުކޮށްފައިވާ 8 ވަނަ މީހާ އެމެރިކާއިން ފެނިފައިވާކަމަށް އެގައުމުން ބުނެފި އެވެ.

އެންމެފަހުން ކޮރޯނާވައިރަސްގެ އަސަރު ކޮށްފައިވާ މީހަކީ ދާދިފަހުން ވުހާން އަށް ދަތުރުކޮށްފައިވާ މީހެއްކަމަށް އެމެރިކާގެ އޮފިޝަލުން ބުނެ އެވެ. އެމީހާ ވުހާން އިން އެމެރިކާއަށް އައުމާއެކު އައިސޮލޭޓްކޮށްފައިވާ ކަމަށާއި އަދިމިހާރުވެސް ހުރީ އެކަހެރިކޮށްފައި ކަމަށް އެމެރިކާއިން ބުނެ އެވެ.

ދުނިޔޭގައި ހަލުވިކަމާއެކު ފެތުރެމުންދާ ނޮވެލް ކޮރޯނާ ވައިރަސްއަށް ޝައްކުކުރެވިގެން ރާއްޖެއިން މިހާތަނަށް އެކަހެރި ކުރި އެއްވެސް މީހެއްގެ ފަރާތުން އެ ވައިރަހުގެ އަލަމަތެއް މިހާރު ނުފެންނަ ކަމަށް ހެލްތް މިނިސްޓަރ އަބްދުﷲ އަމީން ވިދާޅުވެއްޖެއެވެ.

ކޮރޯނާ ވައިރަސްއާއި ބެހޭ އެންމެ ފަހުގެ މައުލޫމާތު ހާމަކުރުމަށް ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މިނިސްޓަރ ވަނީ ޗައިނާއަށް ދަތުރުކުރުމަށްފަހު މާލެ އައިސް ބަލީގެ އަލާމާތްތައް ފެނުނު 20 އަހަރުގެ ޒުވާނާގެ ގައިންވެސް އެ އަލާމާތްތައް މިހާރު ނުފެންނަކަމަށެވެ. އަދި އޭނާގެ ހާލު ރަނަގަޅުކަމަށާއި އެންމެ ފަހުން ސަސްޕެކްޓް ކުރެވުނު ދެމީހުންގެ ފަރާތުންވެސް އަލާމާތް ފެންނަން ނެތްކަމަށް މިނިސްޓަރ ވަނީ ވިދާޅުވެފައެވެ.

މިހާރު ހެލްތު މިނިސްޓްރީގައި ކުރިޔަށްދާ ޕްރެސްކޮންފަރެންސްގައި ހެލްތު މިނިސްޓަރ ޢަބްދުﷲ އަމީން ވިދާޅުވީ، ފާއިތުވި 24 ގަޑިއިރުގެތެރޭގައި އެކަނިވެސް 700 އަށް ވުރެ ގިނަ މީހުން ކޮރޯނާވައިރަސްއަށް ސްކްރީން ކުރެވިފައިވާކަމަށެވެ. އަދި މީގެ ކުރިން 400 މީހުން ސްކްރީންކޮށްފައިވާ ކަމަށްވެސް މިނިސްޓަރ ވިދާޅުވިއެވެ.

މިހާރު ހެލްތު މިނިސްޓްރީގައި ކުރިޔަށްދާ ޕްރެސް ކޮންފަރެންސްގައި އައިޖީއއެމްއެޗްގެ ޑޮކްޓަރު ވިދާޅުވީ އަރިދަފުސް ރޯގާ ދަރިވަރަކަށް ޖެހިފައިވާނަމަ، ފަރުދީ ޒިންމާއެއްގެ ގޮތުގައި ދެކި އެ ދަރިވަރަކު ސްކޫލަށް ނުފޮނުވުމަށް އިލްތިމާސްކުރާ ކަމަށެވެ.

އެހެންނަމަވެސް، ރާއްޖޭގައި އަދި ސްކޫލްތައް ބަންދުކުރާ ޙާލަތައް ނުދާކަމަށް ޑޮކްޓަރު ވިދާޅުވިއެވެ.

ނޮވެލް ކޮރޯނާވައިރަސްއާއި ގުޅޭ އެންމެ ފަހުގެ މަޢުލޫމާތު ޙިއްސާ ކުރުމަށް މިނިސްޓްރީ އޮފް ހެލުތުން ބާއްވާ ޕްރެސްކޮންފަރެންސް ކުޑައިރުކޮޅެއްގެ ތެރޭގައި ފަށާނެއެވެ. މި ޕްރެސް ރާއްޖެޓީވީން ވަގުތުން ދެއްކުމަށް ވަނީ ހަމަޖެހިފައެވެ.

* ރޯގާޖެހި ކެއްސާ، ނޭވާކުރުވެ ނޭވާލާން އުންދަގޫ ފަރާތްތައް

* ނޮވެލް ކޮރޯނާވައިރަސްގެ އަލާމާތްތައްހުރި ފަރާތްތަކާއި ގާތްކޮށް އުޅޭ މީހުން

* ޞިއްޙީ ދާއިރާގެ ބޭފުޅުންގެ ތެރެއިން، ނޮވެލް ކޮރޯނާވައިރަސްގެ ޢަލާމާތްތައްހުރި ފަރާތްތަކައް ފަރުވާދިނުމުގެ މަސައްކަތްތަކުގައި ޙަރަކާތްތެރިވާ ބޭފުޅުން

*ޢާންމު ފަރާތްތަކުގެ ތެރެއިން ނޮވެލް ކޮރޯނާވައިރަސްގެ ޢާލާމާތްތައް ނުހުންނަ މީހުން މާސްކް އެޅުން މުހިންމެއް ނޫން

މަސްދަރު: ޑަބްލިއުއެޗްއޯ/އެޗްޕީއޭ

ނޮވެލް ކޮރޯނާވައިރަސް ބަލިޖެހިފައިވާ މީހަކު ކެއްސާ ކިނބިހި އެޅުމުގައި ކުލައާއެކު ވައިރަސް ހަށިގަނޑުން ނިކުމެއެވެ. ބަލިމީހާ މިގޮތައް ކެއްސާއިރު، 3 ފޫޓު ކައިރީގައި ހުރި މީހެއްގެ އަނގަޔަށް، ނޭފަތައް ނުވަތަ ލޮލަށް މި ހިނގައްޖެނަމަ އެމީހަަކަށް މިބަލި ޖެހިދާނެއެވެ. އެހެންކަމުން ކެއްސާ ކިނބިހި އަޅާނަމަ އެހެން މީހުންގެ ސަލާމަތައްޓަކައި ފޭސް މާސްކް އެޅިދާނެއެެވެ.

މަސްދަރު: އެޗްޕީއޭ

އިންދިރާ ގާންދީ މެމޯރިއަލް ހޮސްޕިޓަލްގެ އެތެރަހަށީގެ ޑޮކްޓަރ މުހައްމަދު އަލީ ވިދާޅުވީ ކޮރޯނާވައިރަސްގައި ފެންނަ އަލާމާތްތަކަކީ އަދައިގެ ރޯގާއެއްގައި ފެންނަ އަލާމާތްތަކެއްކަމަށާއި ބަލިން ރައްކާތެރިވުމަށްޓަކައި ކުރެވިދާނެ ވަރަށް ލުއި ކަންތައްތަކެއް އެބަހުރިކަމަށެވެ. ޑޮކްޓަރ ވިދާޅުވީ، ރޯގާއެއް ޖެހިފައިވާ ކޮންމެ މީހަކީ ކޮރޯނާވައިރަސްގެ ބަލި ޖެހިފައިވާ މީހެއް ނޫންކަމަށާއި، ވައިރަސް އަށް ޝައްކު ކުރެވޭ މީހެއްގެ ގޮތުގައި ބެލެވޭނީ ޗައިނާއަށް ދަތުރުކޮށްފައިވާ މީހެއްކަމަށެވެ.

ނޮވެލް ކޮރޯނާވައިރަސްއާ ގުޅިގެން މައުލޫމާތު ދިނުމުގެ ގޮތުން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި، ނޫސްވެރިޔަކު ކުރި ސުވާލަކަށް ޖަވާބުދެއްވަމުން އެޗްޕީއޭގެ ޑރ. އިބްރާހިމް އަފްޒަލް ވިދާޅުވީ، ޗައިނާއިން އަންނަ ދިވެހިން އައިސޮލޭޓް ކުރަން ނިންމި ފަހުން އައީ ވަރަށް މަދު ބަޔަކު ކަމަށެވެ.

އެފަރާތްތަކުގެ ތެރޭގައިވެސް ގިނައީ ބަލީގެ އަލާމާތްތައް ނުފެންނަ މީހުން ކަމަށާއި، އެމީހުން އައިސޮލޭޓްކުރުމަށް ވުރެ ބޮޑަށް ބާރުއަޅަނީ ހޯމް އައިސޮލޭޝަންއަށް ކަމަށް ޑރ. އަފްޒަލް ވިދާޅުވިއެވެ.

އޮސްޓްރޭލިޔާއިން ޢާންމުކުރި ޓްރެވެލް އެޑްވައިޒަރީގައި ވަނީ ފަހުގެ ތާރީޚެއްގައި ޗައިނާއަށް ދަތުރުކޮށްފައިވާ އެއްވެސް ޤައުމެއްގެ ރައްޔިތަކަށް އެޤައުމަށް އެތެރެވިޔަ ނުދޭނެކަމަށެވެ. އަދި އެމެރިކާގެ ޓްރެވެލް އެޑްވައިޒަރީގައިވަނީ ޗައިނާ މީހުންނަށާއި، ކޮރޯނާ ވައިރަސް ފެނުނު ފަހުން ޗައިނާައަށް އެކި ބޭނުންތަކުގައި ޒިޔާރާތްކޮށްފައިވާ އެހެން ޤައުމުތަކުގެ ރައްޔިތުންނަށް އެމެރިކާއަށް ވަނުމުގެ ފުރުޞަތު ނުދޭނެކަމަށެވެ.

ދާދި ފަހުން ރަޝިޔާ، ޖަޕާން، ޕާކިސްތާން އަދި އިޓަލީންވެސް ވަނީ ޗައިނާއަށް ދަތުރުކޮށްފައިވާ މީހުން އެޤައުމުތަކަށް އެތެރެވުމުގެ ހުއްދަ ނުދޭނެކަން އަންގާ އިޢުލާންކޮށްފައެވެ.

ބަންގްލަދޭޝްގެ ދައުލަތުގެ މީޑިއާއިން ޚަބަރުފަތުރާގޮތުގައި، ވުހާން ސިޓީގައި ތިބި ބަންގްލަދޭޝްގެ 316 ރައްޔިތުން ބަންގްލަދޭޝަށް ގެންދިޔައީ ޗާޓަރު ފްލައިޓެއްގައެވެ. މީގެތެރޭގައި 15 ކުޑަކުދިންވެސް ހިމެނެއެވެ. ބަންގްލަދޭޝަށް ގެންދިޔަ ހުރިހައި އެންމެން ދެ ހަފުތާވަންދެން ކަރަންޓީންކޮށްފައި ބައިތިއްބާނެކަމަށް ބަންގްލަދޭޝްގެ ޞިއްޙަތާއި ބެހޭ ވުޒާރާއިން ބުނެއެވެ. 316 މީހުންގެ ތެރެއިން 7 މީހުންގެ ގައިން ކޮރޯނާވައިރަސްގެ ބައެއް ޢަލާމާތްތައް ފެންނާތީ ހޮސްޕިޓަލުގައި އެޑްމިޓްކޮށްގެން ފަރުވާދެމުންދާކަމަށް ޚަބަރު ލިބެއެވެ.

ވިއެޓްނާމްގެ ސިވިލް އޭވިއޭޝަން އޮތޯރިޓީން ބުނީ، އެޤައުމުން ޗައިނާއަށް ވައިގެ ދަތުރުތައް މެދުކަނޑާލީ ކޮރޯނާވައިރަސްއިން ރައްކާތެރިވުމަށް އެޅި ފިޔަވަޅެއްގެ ގޮތުންކަމަށެެވެ. ވިއެޓްނާމްގެ ޤައުމީ އެއަރލައިނުގެ އިތުރުން، ޗައިނާއަށް ދަތުރުކުރާ އެޤައުމުގެ ހުރިހައި ޕްރައިވެޓް އެއަރލައިންތައްވެސް ދަތުރުކުރުން މެދުކަނޑާލަން އޭވިއޭޝަން އޮތޯރިޓީން ވަނީ ސަރކިއުލަރއެއް ނެރެފައެވެ. ޗައިނާއަށް ކުރާ ސީދާ ދަތުރުތައް މެދުކަނޑާލިނަމަވެސް، ދަތުރުތައް އަލުން ފަށާނެ ތާރީޚެއް އަދި ކަނޑައަޅާފައެއް ނުވެއެވެ.

ޗައިނާގެ ބޮޑުވަޒީރު ވަނީ ވިލާތު އިއްތިހާދުގެ މެންބަރު ޤައުމުތަކުން ޞިއްޙީ ފަރުވާއަށް ބޭނުންވާ ތަކެތި ސަޕްލައިކޮށްދިނުމަށް އެދިފައެވެ. މިދަނޑިވަޅުގައި މާސްކާއި، ބައެއް އެމަރޖެންސި ޕްރޮކިއުރމެންޓް ސަޕްލައި ޗައިނާއަށް ބޭނުންވެއެވެ.

ތައިލޭންޑް: 19 މީހުން

ޖަޕާން: 16 މީހުން

ސިންގަޕޫރ: 13 މީހުން

ޓައިވާން: 10 މީހުން

އޮސްޓްރޭލިޔާ: 9 މީހުން

މެލޭޝިޔާ: 8 މީހުން

ސައުތު ކޮރެއާ: 7 މީހުން

ފްރާންސް: 6 މީހުން

އެމެރިކާ: 6 މީހުން

ޖަރުމަން: 5 މީހުން

ވިއެޓްނާމް: 5 މީހުން

ޔުނައިޓެޑް އެރެބް އެމިރޭޓްސް: 4 މީހުން

ކެނެޑާ: 3 މީހުން

އިޓަލީ: 2 މީހުން

ރަޝިޔާ: 2 މީހުން

އިގިރޭސިވިލާތް: 2 މީހުން

ކެމްބޯޑިއާ: 1

ސްޕެއިން: 1

ފިންލޭންޑް: 1

ސްވިޑަން: 1

އިންޑިއާ: 1

ނޭޕާލް: 1

ފިލިޕީންސް: 1

ސްރީލަންކާ: 1

ޗައިނާގައި މިހާރު ފެތުރެމުންދާ ކޮރޯނާވައިރަސްގެ ބަލިމަޑުކަމުގައި މަރުވި މީހުންގެ ޢަދަދު 259 އަށް އަަރައިފިއެވެ. ޗައިނާގެ ޞިއްޙީ އޮފިޝަލުން ބުނާ ގޮތުގައި ޗައިނާ ގަޑިން މިއަދު މެންދުރު 12:00 އާއި ހަމަޔަށް އައިއިރު މިބަލީގައި މަރުވި މީހުންގެ ޢަދަދަކީ 259 އެކެވެ. އަދި މިހާތަނަށް މި ބަލީގެ އިންފެކްޝަން ޖެހުނު މީހުންގެ ޖުމުލަ ޢަދަދަކީ 11،791 އެވެ. މި ބަލީގެ އަލާމަތްތައް ފެންނަ 102،000 މީހުން މިހާރުވެސް ކަރަންޓީން ކޮށް ފަރުވާދެމުންދާކަމަށް ޚަބަރުލިބެއެވެ.

ކޮރޯނާވައިރަސް ޖެހިފައިވާ ދެމީހުން އިނގިރޭސިވިލާތުން ފެނިފައިވާކަމަށް އެޤައުމުން ކަށަވަރުކޮށްދީފިއެވެ.

މިދެމީހުންނަކީ، ޔޯކްގެ ސްޓެއި ސިޓި އެޕަރޓްމަންޓް ހޮޓަލުގައި ތިބި ޗައިނާގެ އެއްއާއިލާއަކަށް ނިޞްބަތްވާ ދެމީހުންކަމަށް އޮފިޝަލުން ބުނެއެވެ. އެދެމީހުން ތިބި އެޕާޓްމަންޓް ބަންދު ކުރިނަމަވެސް އާދައިގެ މަތިން ހޮޓަލުގެ އޮޕަރޭޝަންސްތައް ކުރިޔަށްގެންދާ ކަމަށް ޚަބަރު ލިބެއެވެ. ކަމާބެހޭ މާހިރުންގެ އެހީގައި މިދެމީހުންނަށް ފަރުވާދިނުމުގެ މަސައްކަތް މިހާރު ވަނީ ފަށާފައެވެ.

ކޮރޯނާވައިރަސްއަށް ވެކްސިންއެއް އުފެއްދުމަށް، އެކަމަށް ބޭނުންވާ ޚާއްޞަ ޓާސްފޯރސްއެއް އެކުލަވާލާފައިވާ ކަމަށް ފްރާންސްގެ ޕެސްޓަރ އިންސްޓިޓިއުޓުން ބުނެފިއެވެ. އެތާނގެ ސައިންޓެފިކް ޑައިރެކްޓަރ ކްރިސްޓޮފަރ ޑެ'އެންފަރޓް ވިދާޅުވީ، 20 މަސް ދުވަހުގެ ތެރޭގައި މި ވެކްސިން އުފައްދާ ބާޒާރަށް ނެރެވޭވަރުވާނެކަމަށެެވެ. އަދި މިހާރު ރޭވިފައިވާ ގޮތައް ކަންކަން ކުރިޔަށްދާނަމަ، އަންނަ އޯގަސްޓްމަހުގެ ތެރޭގައި އަޖުމަ ބެލުމުގެ މަސައްކަތް ފެށޭވަރުވާނެކަމަށެވެ.

ނޮވެލް ކޮރޯނާވައިރަސް ފެތުރެމުންދާ މިދަނޑިވަޅުގައި އިންޑިއާއިން އެހެން ޤައުމުތަކަށް މާސްކް ވިއްކުން ހުއްޓާލައިފިއެވެ. ރައްކާތެރިވުމަށް ބޭނުންކުރާ "ފޭޝަލް މާސްކް" އާއި އެ އުފައްދަން ބޭނުންކުރާ ފޮތި އެކްސްޕޯޓްކުރުން ހުއްޓާލިކަން އިންޑިއާއިން އިޢުލާން ކުރީ އިއްޔެއެވެ. އެހެންނަމަވެސް ހުއްޓާލީ ކޮން ސަބަބަކާހުރެކަމަށް އެޤައުމުން ހާމަަކޮށްފައެއްނުވެއެވެ. އިންޑިއާއިންވެސް ވަނީ ކޮރޯނާވައިރަސް ޖެހިފައިވާ އެކަކު ފެނިފައެވެ. އޭނާއަކީ ކޮރޯނާ ވައިރަސް ހަލުވިކަމާއެކު ފެތުރެމުން އަންނަ ވޫހާން ސިޓީގެ ޔުނިވަރސިޓީގައި ތަޢުލީމު ޙާޞިލު ކުރަމުން އައި ދަރިވަރެކެވެ.