ހެރީ ޕޮޓާ ސިލްސިލާގެ ނާސިސާ މަލްފޯއީ މަރުވެއްޖެ

'ހެރީ ޕޮޓާ'ގެ ނާސިސާ މަލްފޯއީގެ ރޯލު ކުޅުނު މަޝްހޫރު ފިލްމީތަރި ހެލެން މެކްރޮރީ މަރުވެއްޖެއެވެ.

ކެންސަރު ބައްޔަށް ދުވަސްތަކެއް ވަންދެން ސިއްރުން ފަރުވާ ހޯދަމުން ދިޔަ ހެލެން މަރުވިއިރު އޭނާގެ އުމުރުން ވީ 52 އަހަރެވެ. އޭނާ މަރުވީ އޭޕްރީލް 16 ވީ ހުކުރުދުވަހުއެވެ. ހެލެން މަރުވިކަން ހާމަކުރަމުން، އޭނާގެ ފިރިމިހާ އަދި އެކްޓަރު ޑެމިއަން ލުވިސް ބުނީ، ހެލެން ދުނިޔެ ދޫކުރިއިރު، ގާތުގައި އެކުވެރީންނާއި އާއިލާގެ މީހުން ތިބިކަމަށެވެ.

ހެލެންއާއި ޑެމިއަން ކައިވެނިކުރީ 2007 ވަނަ އަހަރުގައެވެ. ދެމީހުންގެ ކައިވެންޏަށް ދެކުދިން ލިބިފައިވާއިރު، ދޮށީ އަންހެން ދަރިފުޅުގެ އުމުރުން މިހާރު 14 އަހަރެވެ. ހަގު ފިރިހެން ދަރިފުޅަށް އަދި ވީ 13 އަހަރެވެ.

ހެލެން މަރުވުމުގެ ހިތާމައިގައި ބައިވެރިވެ، ހެރީ ޕޮޓާގެ ވާހަކަ ލިޔުނު މަޝްހޫރު ވާހަކަ ލިޔުންތެރިޔާ ޖޭކޭ ރޯލިންގެ އިތުރުން ގިނަ އަދަދެއްގެ ފަންނާނުން އޭނާގެ ހަނދާން އާކޮށްފައިވެއެވެ. މީގެ އިތުރުން ހެރީ ޕޮޓާގެ ވިޒާޑިން ވޯލްޑް މީޑިއާ ގްރޫޕުން ވެސް އޭނާގެ ހަނދާން އާކޮށްފައިވެއެވެ.

ފިލްމީ ދާއިރާއަށް ގިނަގުނަ ޚިދުމަތްތަކެއް ކޮށްދީފައިވާ ހެލެންގެ އަގުވަޒަންކުރުމުގެ ގޮތުން 2017 ވަނަ އަހަރު އޯޑަރ އޮފް ބްރިޓިޝް އެމްޕައަރ (އޯބީއީ) އެވޯޑު ދީފައިވެއެވެ. އެނާ އެންމެ ބޮޑަށް އާންމުންގެ ތެރޭގައި މަޝްހޫރުވެފައިވަނީ ހެރީ ޕޮޓާ ފިލްމުގެ ނާސިސާ މަލްފޯއީގެ ރޯލާއި، ބީބީސީގެ ކްރައިމް ޑްރާމާ ޕީކީ ބްލައިންޑާސްގެ ޕޮލީގެ ރޯލުންނެވެ.