ވަޒަން ހަމަ، ޅެންބަހުރުވައިގެ ފުނުން ރާއްޖެ ސިފަކުރާ ވަކި ބަސްތަކެއް ހުރެއެވެ.

"ނޫކަނޑުތެރޭގައި ފެހިމުތް ތަކެއްހެން، ކުދިކުދި ޖަޒީރާ ވިދަމުން ދަނިއްޔޭ" އެބުނާ ފެހިމުތުގެ ކުލަ މިރަށްތަކަށް ގެނުވި ހައިޞިއްޔަތާ ދިވެހިން ވަތްކެއް ނުވާނެއެވެ. ދިވެހި ބިމުގެ ފެހިކަމާއި އާރޯކަން ދެމެހެއްޓޭ، މުޑުވަކަކީ ދިވެހި ދަނޑުވެރިންނާ އެވެރިންގެ ދަނޑުތަކެވެ.

2500 އަހަރު ފަހަނަ އަޅައިގޮސް، 3 ހާސް އަހަރަށް ފައިނަގަމުންދާ، ވަޒަންވެރިކަމުގެ ދިގު ތާރީޚެއް އަޅުގަނޑުމެންގެ އެބައޮތެވެ. މިދިގު ފުން މާޒީގައި، ދިވެހިން ދަނޑުވެރިކަން ނުކުރާ އެއްވެސް ޒަމާނެއް މާޒީވި ކަމުގައި ދެންނެވޭކަށެއް ނެތެވެ. ގަދީމީ އިރުގައި، ދަނޑުވެރިކަން އޮތީ ދުވަހުގެ ފުރާގު ހަމަކޮށް، ފުރާނަ މުއްތިކުރުމުގެ ހަނގުރާމައިގެ ގޮތުގައެވެ.

ގަސްގަހާގެއްސާއެކު އާއިލާތައް ހެދިބޮޑުވެ، މީސްގިނަވެ، ބައިބޯވަމުންދިޔަ ވަރަކަށް ދިވެހިން ބަރޯސާވާން ރާއްޖޭގައި އޭރު އޮންނަނީ ދެތަނެކެއެވެ. ބަނޑަށްޓަކާ ކަނޑު ނޫނީ ދަނޑެވެ.

އެޒަމާން ނިމި މިހާރު އައިސް މިތިބަ މިޒަމާނުގައި ދަނޑުވެރިކަމަކީ އާމްދަނީއާ ތަނަވަސްކަން ހޯދާ ވަޞީލަތެކެއެވެ. އިގްތިޞާދީ ވަކި ޞިނާޢަތެކެއެވެ. މިއަދު އެކި މީހުން ތިބީ އެކި ކަންކަމުގައެވެ. އެއް ބަޔަކު ތަކެތި އުފެއްދުމުން އަނެއް ބަޔަކު ސަޕްލައިކޮށް، އެހެން ބަޔަކު ވިއްކީމާ ދެންތިބި ބަޔަކު ގަނެ، އޭގެ ބޭނުންކުރުމެވެ. އެއީ މިހާރުގެ އިގްތިޞާދީ ސަރަކައިގެ ބުރު ހަމަވެ ވަށައިޖެހޭ ގޮތެވެ.

މިނިޒާމުގައި ހުންނަ ޖުމްލަ ދަތިތައް ނެތިކޮށް، ބުރޫ ފިލުވައި، އުޅާސް ނިއުޅައި ދިނުމަކީ، ސަރުކާރުން އަދާކުރަންޖެހޭ ދައުރެވެ.

ދަނޑުވެރިންގެ އުފެއްދުންތައް ރަނގަޅު އަގުގައި މާކެޓް ކުރެވޭނެ ދެމެހެއްޓެނިވި، އިތުބާރު ހުރި އިންތިޒާމެއް ނެތެއެވެ. 2021 ވަނަ އަހަރަށް އިއްވެވި ރިޔާސީ ބަޔާނުގައި ރައީސުލްޖުމްހޫރިއްޔާ އެކަން ފާހަގަ ކުރެއްވިއެވެ. މި މޭރުމުން ރައީސް އިބްރާހިމް މުޙަންމަދު ޞާލިޙް ދެން ވިދާޅުވީ އެއާގުޅޭ ދެންއޮތް ދަތީގެ ވާހަކައެވެ. އެއީ ގަންނަން ބޭނުން ފަރާތްތަކަށް، އުފެއްދުންތައް ލިބޭނެ ކަމުގެ ޔަގީންކަމާއި އިތުބާރު މިހާރު ނެތް ވާހަކައެވެ.

ތުރާތައް ފިލުވުމާއި، ދަތިތައް ފަސޭހަ ކުރުމާއި، ގޮންޖެހުންތައް ނައްތާލުމުގެ އަޑަކީ ޢާންމު އަޑެކެއެވެ. ކަންކަން ރޭވުމާއި، ފުޅާކޮށް ހަރުދަނާ ކުރުމުގެ ވާހަކަ އަކީ ހުރިހާ ބޭފުޅުން ވެސް ފަރިތަ، ދޫމަތީ ބަސްތަކެކެވެ.

ތަފާތަކީ ދަނޑުވެރިކަމުގެ މައުޟޫޢުގައި ހުރި ދަތިތަކުގެ ވާހަކަ ރައީސް އިބްރާހިމް މުހަންމަދު ޞާލިޙް ވިދާޅުވި ތަރުތީބުގެ ތަފާތު ކަމެވެ.

ރިޔާސީ ބަޔާނުގައި އެމަނިކުފާނު އެވާހަަކަ ވިދާޅުވީ އޭގެ ހައްލަށް ސަރުކާރުން އަޅުއްވަން ޖެހޭ ފިޔަވަޅު އެޅުއްވުމަށްފަހުއެވެ.

ތަފާތަކީ އެކަމަށްޓަކައި 100 އިންސައްތަ، ސަރުކާރު ހިއްޞާވާ ކުންފުންޏެއް އުފައްދަވައި އެމަަސައްކަތް ފެއްޓެވުމަށް ފަހުގައި އެ ވާހަކަ ވިދާޅުވި ވިދާޅުވުމެވެ.

ދަނޑުވެެރިންގެ އުފެއްދުންތައް ބާޒާރަށް ފޯރުކުރުމުގައި އެގްރޯ ނެޝަނަލް ކޯޕަރޭޝަން ފުޅާ ދައުރެއް އަދާ ކުރެއެވެ. އަދި މިކަން ފެއްޓެވީ މިދިޔަ ފުރަބަންދުގެ ދަތި ދުވަސްވަރުގައިކަން ރައީސްގެ ރިޔާސީ ބަޔާނުގައި ފާހަގަ ކުރެއްވިއެވެ.

ކޮންޓްރެކްޓް ފާމިންގ އަކީ މުޅިން އަލަށް ރާއްޖޭގައި ފުޅާދާއިރާއެއްގެ ދަނޑުވެރިކަމަށް އަމާޒު ހިފޭ އިންގިލާބީ މަޝްރޫޢުއެކެވެ.

ދަނޑުވެރިކަމުގެ ރޮނގުން ފެހި ރެކޯރޑެއް އޮތް 45 ރަށެއްގެ ދަނޑުވެރިން މިހާރު ވަނީ ފާހަގަކުރެވިފައެވެ. އެފަރާތްތަކާއެކު ކުރިއަށްއޮތް ދެމަހެއްހާ ދުވަހުގެ ތެރޭގައި ވެވޭ އެއްބަސްވުން ނިންމުމަށް އެގްރޯ ނޭޝަނަލް ކޯޕަރޭޝަން އެދަނީ ތައްޔާރު ވަމުންނެވެ.

ދަނޑުވެރި ކަމަކީ ފައްކާ ވަމުން އަންނަ ޒަމާނުގެ ހުނަރާއި، ފަންނާއި، އެކި ފަރުމާތަކުން ބަރާވެފައިވާ ބައިނަލް އަގުވާމީ ޢިލްމީ ޞިނާޢަތެކެއެވެ. ތިމާވެއްޓާއި ޞިއްޙަތަށް ރައްކާތެރި އީޖާދުތަކުން އިޖާބަ ލިބެމުންދާ ވާދަވެރި ލާބަ ހުރި ވިޔަފާރިއެކެވެ.

އެގްރޯ ނޭޝަނަލް ކޯޕަރޭޝަން އުފެއްދެވުމުގެ އަމާޒަކީ ރާއްޖޭގައި އުފައްދާ ކާބޯތަކެތި އިތުރުކޮށް، އެތެރެ ކުރެވޭ މިންވަރު ދަށްކުރުމެވެ.

ރައީސް ޞާލިޙް ކުރިއަށް މިސްރާބު އެ ހިއްޕަވަނީ، ދަނޑުވެރިކަމުން، ކާބޯތަކެތީގެ ޔަގީންކަން ރައްޔިތުންނަށް ކަށަވަރުކޮށްދޭ ފެހިފެހި އާޒާދީގެ، ފަހިރާސްތާއިންނެވެ.

ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިޙް މިއަހަރު ދެއްވި ރިޔާސީ ބަޔާނަކީ ނަތީޖާ ހާޞިލުކުރެވޭނެ ގިނަ އަމަލުތަކެއްގެ މައްޗަށް އަތުރާލެވުނު މަދު ބަސްތަކެކެވެ.