މޯލްޑިވްސް ސްޕޯޓްސް ކޯޕަރޭޝަނުން ގައުމީ ފެންވަރުގެ ކުޅިވަރުގެ ދިރާސާއެއް ކުރުމަށް ތައްޔާރުވަމުންދާ ކަމަށާއި، ވަރަށް އަވަހަށް އެ މަސައްކަތް ފެށިގެންދާނެ ކަމަށް އެ ކޯޕަރޭޝަނުގެ މެނޭޖިންގ ޑިރެކްޓަރު މައުރޫފް އަޙްމަދު (މާއްޓޭ) ވިދާޅުވެއްޖެއެވެ.
ސްޕޯޓްސް ކޯޕަރޭޝަނުން އެންމެ އިސްކަމެއް ދީގެން ކުރަމުންދާ މަސައްކަތްތަކުގެ ތެރޭގައި ގައުމީ ފެންވަރެއްގައި ކުޅިވަރުގެ ދިރާސާއެއް ކުރުމުގެ މަސައްކަތް ފަށާފައިވާއިރު، މިއީ މި ދާއިރާއިން ގައުމީ ފެންވަރެއްގައި ކުރެވޭ ފުރަތަމަ ދިރާސާއަށް ވެގެންދާނެއެވެ.
ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ސްޕޯޓްސް މާކެޓިންގ އެންޑް ސްޕޮންސާޝިޕުން މާސްޓާސް އަދި ސްޕޯޓްސް ސްޕޮންސާޝިޕުން ޕޯސްޓްގްރެޖުއޭޓް ފާސް ހާސިލްކޮށްފައިވާ މާއްޓޭ ވިދާޅުވީ ކުޅިވަރަކީ ޕިރަމިޑެއްގެ ގޮތުގައި ވަށައިޖެހިގެން އޮންނަ އެއްޗެއް ކަމަށާއި، އެހެން ކަމުން ކުޅިވަރާ ގުޅުން ހުރި ހުރިހާ ދާއިރާތަކެއް ވެސް ގުޅިލާމެހިގެންދާން ޖެހޭ ކަމަށެވެ.
އެންމެ ދަށުގައި މި އިންނަނީ ރެކްރިއޭޝަން. އެއީ އެކި އުމުރުގެ މީހުން ރަނގަޅު ސިއްހަތެއްގައި ހުރުމަށް ކުރަމުންދާ މަސައްކަތް ހިމެނޭ ބައި. ސްކޫލްތަކުގައިވެސް ވަރަށް ފުޅާދާއިރެއްގައި ކުޅިވަރުގެ ހަރަކާތްތައް އެބަ ކުރިއަށްގެންދޭ. ގައުމީ ޕޮލިސީއެއް ހެދިގެން އަންނައިރު ސްކޫލް، ކޮލެޖް، ޔުނިވާސިޓީތަކުގައި ކުރަމުންދާ ކަންތައްވެސް ކަވާ ވާން އެބަޖެހޭ. ކުލަބުތަކަކީވެސް އެހާ މުހިންމު ދައުރެއް އަދާކުރާ ބައެއް. ދެން މި ހިމެނެނީ އެލީޓް ލެވެލް، އެންމެ މަތީ ލެވެލްގައި ކުޅިވަރު ކުޅޭ ފަރާތްތައް. އެހެންވީމާ މި ކޮންމެ ބައެއް ހިމެނޭގޮތަށް ވަށާޖެހިގެން އަންނާނެ ކުޅިވަރުގެ ޕޮލިސީއެއް އޮންނަން ޖެހޭ.ސްޕޯޓްސް ކޯޕަރޭޝަނުގެ މެނޭޖިންގ ޑިރެކްޓަރު މައުރޫފް އަޙްމަދު (މާއްޓޭ)
މާއްޓޭ އިތުރަށް ވިދާޅުވީ ދިވެހިރާއްޖޭގެ ގައުމީ ޔުނިވާސިޓީއާ ގުޅިގެން ހެދުމަށް ނިންމާފައިވާ "ސްޕޯޓްސް ޑިމާންޑް އެންޑް ސްޕްލައި" ދިރާސާގެ ސަބަބުން ކުޅިވަރާ ބެހޭ ވުޒާރާއަށްވެސް ބޮޑު ފައިދާއެއް ކުރާނެ ކަމަށާއި، ކުޅިވަރާ ބެހޭ ވަޒީރު ބޭނުންވާ ޕޮލިސީތައް ތަންފީޒު ކުރުމަށް މި ދިރާސާއިން މުހިންމު މައުލޫމާތުތަކެއް ލިބިގެންދާނެ ކަމަށެވެ.
ރާއްޖޭގައި ކުޅިވަރު ކުޅޭ ކުލަބުތަކުގެ އެންމެ ބޮޑު ސްޕޮންސަރަކަށް ޒަމާނުއްސުރެން ވެފައިވަނީ ސަރުކާރު ކަމަށާއި، އެހެން އެކަން އޮތުމުން ކުލަބުތައް ވަކިބަޔަކަށް ބަރާސޯވެ، އަމިއްލަ ފައިމަތީގައި ތެދުވުމަށް ހުރަސްއެޅޭ ކަމަށް މާއްޓޭ ވިދާޅުވިއެވެ.
އެކި ކުޅިވަރުތަކާއި ކުޅިވަރު ކުލަބުތައް ސްޕޮންސާ ކުރާ ފަރާތްތަކުންވެސް އެކަން ކުރަނީ ސްޕޮންސާ ކުރާ ފަރާތުގެ ޕްރޮޑަކްޓަށް މަންފާއެއް ހޯދުމުގެ ނިޔަތުގައި ނޫން ކަމަށާއި، އެކަން ކުރަމުން އަންނަނީ ކުޅިވަރަކަށް އެހީއެއް ދިނުމުގެ ނިޔަތުގައި އެ ކުންފުންޏެއްގެ ސީއެސްއާރް ޕްރޮގްރާމުގެ ތެރެއިން ކަމަށްވީ ނަމަވެސް، ދުނިޔޭގައި ކުޅިވަރަށް ކުރާ ސްޕޮންސަރަކީ ދެ ފަރާތަށްވެސް އެތައް މަންފާއަކާއި، ފައިދާއެއް އެކަމުން ލިބިގެންދާ ކަމެއް ކަމަށް މާއްޓޭ ވިދާޅުވިއެވެ.
މި ހުރިހާ ކަމަކަށް ބަލާއިރު ސްޕޯޓްސް ކޯޕަރޭޝަނަކީ ކުޅިވަރުން މަންފާ އާއި ނަފާ ހޯދުމަށް އޮތް ފާލަމެއް ކަމަށާއި، ކުލަބުތަކާއި ސަރުކާރަށްވެސް ފައިސާ ހޯދައިދިނުމަށް އޮތް މުހިންމު ޓޫލެއް ކަމަށް މާއްޓޭ ވިދާޅުވިއެވެ.
މާއްޓޭ ވިދާޅުވީ ސްޕޯޓްސް ކޯޕަރޭޝަނުން ކުރިއަށް އޮތް އަހަރުގެ ތެރޭގައި އަމިއްލަ ފައިމައްޗަށް ތެދުވުމަށް މިހާރު މަސައްކަތްތަކެއް ފަށާފައިވާ ކަމަށާއި، ކުޅިވަރާ ބެހޭ ވުޒާރާއާ ގުޅިގެން ކުޅިވަރުގެ ވަސީލަތް ގާއިމުކުރުމަށް ސްޕޯޓްސް ކޯޕަރޭޝަނުން ގައިޑްލައިނެއް ހަދާފައިވާ ކަމަށެވެ.
ސްޕޯޓްސް ކޯޕަރޭޝަނުން ގައުމީ ފެންވަރުގެ ކުޅިވަރުގެ ދިރާސާއެއް ކުރުމަށް ތައްޔާރުވަމުންދާއިރު، ކުޅިވަރުގެ ޤާނޫނުގެ ދަށުން އުފައްދާފައިވާ ސްޕޯޓްސް ކޯޕަރޭޝަނުގެ މަގުސަދުތަކުގެ ތެރޭގައި ރާއްޖޭގައި ކުޅިވަރުގެ އިންފްރާސްޓްރަކްޗާ ކުރިއެރުވުމާއި، ސްޕޯޓްސް ޗެނަލް ތަރައްގީކުރުމާއި، ކުޅިވަރު ކުޅޭ ފަރާތްތަކުގެ ގާބިލުކަން ކުރިއެރުވޭނެ ޕްރޮގްރާމުތައް ރާވައި ހިންގުމާއި، ކުޅިވަރު ދާއިރާގައި ހަރަކާތްތެރިވާ ފަރާތްތައް އިތުރަށް ކުރިއަރުވާ ތަމްރީނު ހޯދާނެ މަގު ފަހިކޮށްދިނުން ހިމެނެއެވެ.
މީގެ އިތުރުން އެ ކުންފުނީގެ ބެލުމުގެ ދަށުފައިވާ ކުޅިވަރު ވަސީލަތްތަކުގެ ބޭނުން ކްލަބުތަކާއި އެސޯސިއޭޝަންތަކަށް ބޭނުން ހިފޭނެ މަގުފަހިކޮށްދީ އެނޫން ފަރާތްތަކަށް އެ މުދަލުން މުއާމަލާތްކޮށް ވިޔަފާރި އުސޫލުން މަންފާ ހޯދުންވެސް ހިމެނެއެވެ.
