ޓޮޓެންހަމް އަތުން ފަހު ވަގުތު ޔުނައިޓެޑް ސަލާމަތްވެއްޖެ

އިނގިރޭސި ޕްރިމިއާ ލީގުގައި ހުކުރު ދުވަހުގެރޭ ފަހު ވަގުތު ބްރޫނޯ ފެނާންޑޭސް ވައްދާލި ޕެނަލްޓީން ޓޮޓެންހަމް ހޮޓްސްޕާ އަތުން މެންޗެސްޓާ ޔުނައިޓެޑް ސަލާމަތްވެއްޖެއެވެ.

ލީގުގައި ހުކުރު ދުވަހުގެރޭ ޓޮޓެންހަމާއި ޔުނައިޓެޑް ބައްދަލުކުރި މެޗު ނިމުނީ 1-1 ން ދެ ޓީމު އެއްވަރުވެގެންނެވެ.

ޓޮޓެންހަމްގެ ދަނޑުގައި ކުޅުނު މެޗުގެ ފުރަތަމަ ހާފު ފަށައިގެން ޔުނައިޓެޑުން ރަނގަޅު ކުޅުމެއް ދެއްކިއިރު، މެޗުގައި ފުރަތަމަ ލީޑު ނަގަން ރަނުގެ ފުރުސަތެއް ލިބުނީ ޔުނައިޓެޑްގެ މާކަސް ރަޝްފޯޑަށެވެ. އެކަމަކު އޭރިއާ ތެރެއިން ރަޝްފޯޑް ފޮނުވާލި ހަމަލާ ޓޮޓެންހަމްގެ ގޯލްކީޕަރު ހޫގޯ ލޮރީސް ވަނީ މަތަކޮށްފައެވެ.

އެކަމަކު މެޗުގެ 27 ވަނަ މިނެޓުގައި ކައުންޓަ އެޓޭކެއްގައި ޓޮޓެންހަމުން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ސްޓީވެން ބާގްވެއިންއެވެ.

ދެވަނަ ހާފުގައި ޔުނައިޓެޑުން ކުޅުން ރަނގަޅުކުރިއިރު، މި މެޗުން އެޓީމު ސަލާމަތްވީ މެޗު ނިމެން ނުވަ މިނެޓަށް ވެފައި ވަނިކޮށް ބްރޫނޯ ފެނާންޑޭސް ކާމިޔާބުކުރި ޕެނަލްޓީންނެވެ. މި ޕެނަލްޓީއަކީ ބަދަލު ކުޅުންތެރިއެއްގެ ގޮތުގައި ކުޅެން އެރި ޕައުލް ޕޮގްބާ ހޯދައިދިން ޕެނަލްޓީއެކެވެ.

މެޗުގެ ފަހު ވަގުތުގައި ފެނާންޑޭސްއަށް ފައުލުކުރި ކަމަށް ބަލައި، ރެފްރީ ވަނީ ޔުނައިޓެޑަށް އިތުރު ޕެނަލްޓީއެއް ދީފައެވެ. އެކަމަކު ވީޑިއޯ އެސިސްޓަންޓް ރެފްރީ (ވީއޭއާރް) ބަލުމަށްފަހު ރެފްރީ ވަނީ އެ ޕެނަލްޓީ ނުދޭން ނިންމާފައެވެ.

މި ނަތީޖާއާއެކު ޔުނައިޓެޑް އޮތީ ތާވަލުގެ ފަސްވަނައިގައި 30 މެޗުން 46 ޕޮއިންޓާއެކުއެވެ. އަދި ތާވަލުގެ އަށްވަނައިގައި ޓޮޓެންހަމް އޮތީ 30 މެޗުން 42 ޕޮއިންޓު ހޯދައިގެންނެވެ.