ޕްރިމިއާ ލީގުގެ ރެފުރީންވެސް ކޮރޯނާވައިރަހަށް ޓެސްޓު ކުރަނީ

އިނގިރޭސި ޕްރިމިއާ ލީގުގެ ރެފުރީންވެސް ކޮރޯނާވައިރަސް (ކޮވިޑް-19) ށް ޓެސްޓު ކުރަން ނިންމައިފި އެވެ.

މި މަހުގެ 17 ވަނަ ދުވަހު ޕްރިމިއާ ލީގު އަލުން ފަށާއިރު، މި ހަފުތާގެ ތެރޭގައި ރެފުރީން ކޮވިޑް-19ށް ޓެސްޓު ކުރަން ފަށާނެ އެވެ. އަދި ކޮންމެ ދެ ހަފުތާއަކުން ރެފުރީން ވައިރަހަށް ޓެސްޓު ކުރާއިރު، އެއްވެސް ޓެސްޓެއްގެ ނަތީޖާ ހާމަނުކުރާނެ ކަމަށް ރިޕޯޓުތައް ބުނެއެވެ.

މީގެ ކުރިން ޕްރިމިއާ ލީގުގެ ކްލަބުތަކުން ކުޅުންތެރިން ކޮންޓެކްޓް ވެވޭ ގޮތަށް ފަރިތަކުރަން ފާސްކޮށްފައިވާއިރު، މިދިޔަ ހަފުތާގައި ވަނީ ކްލަބުތަކުން އެކުވެރިކަމުގެ މެޗުތައް ކުޅުމުގެ ހުއްދަ ވެސް ދީފައެވެ. އެހެންކަމުން ކޮވިޑް-19ށް ޓެސްޓުކުރާ ރެފުރީންނަށް އެކުވެރިކަމުގެ މެޗުތަކުގައި އިންސާފު ކުރެވޭނެ ކަމަށް ވަނީ ރިޕޯޓުކޮށްފައެވެ.

ޕްރިމިއާ ލީގުގެ ރެފުރީން ކޮވިޑް-19ށް ޓެސްޓު ކުރާއިރު، މީގެ ކުރިން ޕްރިމިއާ ލީގުން ވަނީ ކްލަބުތަކުގެ ކުޅުންތެރިންނާއި އޮފިޝަލުން ހަ ބުރެއްގެ މަތިން ޓެސްޓު ކޮށްފައެވެ. މި ހަ ބުރުގައި ޖުމްލަ 6،274 ޓެސްޓު ވަނީ ކޮށްފައެވެ. އެއީ ފުރަތަމަ ބުރުގައި 748 މީހުންނާއި، ދެވަނަ ބުރުގައި 996 މީހުންނާއި، ތިންވަނަ ބުރުގައި 1،008 މީހުންނާއި، ހަތަރުވަނަ ބުރުގައި 1،130 މީހުންނާއި، ފަސްވަނަ ބުރުގައި 1،197 މީހުންގެ އިތުރުން ހަވަނަ ބުރުގައި 1،195 މީހުންނެވެ.

އެއާއެކު މިހާތަނަށް ޖުމްލަ 13 މީހަކު ވަނީ ޕްރިމިއާ ލީގުން ކޮވިޑް-19ށް ޕޮޒިޓިވް ވެފައެވެ.