ގައުމީ ކެރަމް ޓީމުގެ ފަރިތަކުންތައް ގޭގައި ތިބެގެން ކުރިއަށް ގެންދަނީ

ކޮރޯނާވައިރަސް (ކޮވިޑް-19) ގެ ބަލިމަޑުކަމުގެ ސަބަބުން ހުރިހާ ކުޅިވަރެއްގެވެސް ގައުމީ ޓީމުތަކާއި އެހެނިހެން ޓީމުތަކުގެ ފަރިތަކުރުންތައް ހުއްޓާލެވިފައިވީ ނަމަވެސް، ގައުމީ ކެރަމް ޓީމުގެ ފަރިތަކުންތައް ހަފްތާއަކު ފަސް ދުވަހު ކުރިއަށްގެންދާ ކަމަށް ކެރަމް އެސޯސިއޭޝަން އޮފް މޯލްޑިވްސް އިން ބުނެފި އެވެ.

ބައިނަލްއަގުވާމީ މައިދާނުގައި ވެސް ބޮޑެތި ކާމިޔާބުތަކެއް ހޯދާފައިވާ ގައުމީ ކެރަމް ޓީމުގެ ކުޅުންތެރިން މިހާލަތުގައިވެސް މެދުކެނޑުމެއްނެތި ފަރިތަކުރުންތައް ކުރިއަށް ގެންދަމުންދާއިރު، ކެރަމް އެސޯސިއޭޝަނުން ބުނީ ފަރިތަކުރުން ކުރިއަށް ގެންދެވޭނެ އިންތިޒާމުތައް ކުޅުންތެރިންނާ މަޝްވަރާކުރެވި، ވަކި ތާވަލެއްގެ ދަށުން ހަމަޖެހިފައިވާ ކަމަށެވެ.

މާލެ ސިޓީގެ ފުރަބަންދާ ގުޅިގެން ކުޅުންތެރިން ފަރިތަކުރަމުންގެންދާ ހޯލް ބަންދުކުރަން ޖެހުނުކަމުގައިވީ ނަމަވެސް، ގޭގައި ތިބެގެން ގައުމީ ޓީމުގެ ކުޅުންތެރިންނަށް ފަރިތަކުރެވޭނެ ގޮތް ހެދުމަށް ކެރަމް އެސޯސިއޭޝަނުން ވަނީ ގޭގައި ބޯޑު ނެތް ކުޅުންތެރިންނަށް ބޯޑާއި އަދި ހުރިހާ ކުޅުންތެރިންނަށްވެސް ކުޅެން ބޭނުންވާ ވަސީލަތްތައް ފޯރުކޮށްދީފައެވެ.

ކެރަމް އެސޯސިއޭޝަނުގެ ރައީސް އިބްރާހިމް ޖިހާދު ވިދާޅުވީ ކުޅުންތެރިންގެ ފެންވަރު އެއްހަމައެއްގައި ދެމެހެއްޓޭނެ ގޮތަކަށް ތަމްރީނުތައް ދެވޭނެ ގޮތްތައް ހަމަޖެއްސުމަކީ އެންމެ އިސްކަންދޭ އެއްކަންތައް ކަމަށެވެ. އެގޮތުން ގައުމީ ޓީމުގެ ކޯޗިންގ ސްޓާފުންގެ ލަފަޔާއި އިރުޝާދުގެ މަތިން، ގޭގައި ތިބެގެން ފަރޮތަކުރެވޭނެ އިންތިޒާމު ފަހިކޮށްދީފައިވާ ކަމަށް ވިދާޅުވި އެވެ.

ގައުމީ ކެރަމް ޓީމުގެ މެނޭޖަރު ނާޒިމް ހަސަން ބުނީ މިވަގުތު ގޭގައި ތިބިގެން ކުޅުންތެރިން ކުރަމުންދާ މަސައްކަތް ވަރަށް ރަނގަޅު ކަމަށާއި، ހަފުތާއަކު ފަސް ދުވަހު ކުޅުންތެރިން ފަރިތަކުރާ ކަމަށެވެ. އަދި މިފަދަ ހާލަތެއްގައި ކުޅުންތެރިން ހިތްވަރާއެކު ކުރަމުންދާ މަސައްކަތުން، ކުޅުންތެރިން ފޮތިވައްޓާ މިންވަރު އެއްވަރެއްގައި ހިފެހެއްޓުމަށް އެހީތެރިވެދޭނެ ކަމަށް ވެސް ބުންޏެވެ.

ގައުމީ ކެރަމް ޓީމުގެ ކުޅުންތެރިން ގޭގައި ފަރިތަކުރަމުންދާއިރު، ކޮވިޑް-19 ރާއްޖެއިން ފެނުމާއެކު ކުޅުވަރާ ބެހޭ ވުޒާރާއިން ވަނީ އެ ވުޒާރާގެ ދަށުގައިވާ ހުރިހާ ކުޅިވަރު ކުޅެ ތަންތަނާއި މަރުކަޒުތައް މާޗު މަހުގެ 15 ވަނަ ދުވަހުން ފެށިގެން ބަންދު ކޮށްފައެވެ.

މީގެ ކުރިން ގައުމީ ޓީމުތަކުގެ ކުޅުންތެރިންގެ އެލަވަންސް ނުދޭކަން ކުޅިވަރާ ބެހޭ ވަޒީރު ހާމަކުރި ނަމަވެސް، ކުޅިވަރު އެސޯސިއޭޝަންތަކާއި އެތުލީޓުންނާ މަޝްވަރާ ކުރުމަށްފަހު، ފަހުން ވަނީ ކުޅުންތެރިންނަށް އެލަވަންސް ދޭން ނިންމާފައެވެ.