ކޮރޯނާވައިރަސް (ކޮވިޑް-19) ގެ ބަލިމަޑުކަމުގެ ސަބަބުން ހުރިހާ ކުޅިވަރެއްގެވެސް ގައުމީ ޓީމުތަކާއި އެހެނިހެން ޓީމުތަކުގެ ފަރިތަކުރުންތައް ހުއްޓާލެވިފައިވީ ނަމަވެސް، ގައުމީ ކެރަމް ޓީމުގެ ފަރިތަކުންތައް ހަފްތާއަކު ފަސް ދުވަހު ކުރިއަށްގެންދާ ކަމަށް ކެރަމް އެސޯސިއޭޝަން އޮފް މޯލްޑިވްސް އިން ބުނެފި އެވެ.
ބައިނަލްއަގުވާމީ މައިދާނުގައި ވެސް ބޮޑެތި ކާމިޔާބުތަކެއް ހޯދާފައިވާ ގައުމީ ކެރަމް ޓީމުގެ ކުޅުންތެރިން މިހާލަތުގައިވެސް މެދުކެނޑުމެއްނެތި ފަރިތަކުރުންތައް ކުރިއަށް ގެންދަމުންދާއިރު، ކެރަމް އެސޯސިއޭޝަނުން ބުނީ ފަރިތަކުރުން ކުރިއަށް ގެންދެވޭނެ އިންތިޒާމުތައް ކުޅުންތެރިންނާ މަޝްވަރާކުރެވި، ވަކި ތާވަލެއްގެ ދަށުން ހަމަޖެހިފައިވާ ކަމަށެވެ.
މާލެ ސިޓީގެ ފުރަބަންދާ ގުޅިގެން ކުޅުންތެރިން ފަރިތަކުރަމުންގެންދާ ހޯލް ބަންދުކުރަން ޖެހުނުކަމުގައިވީ ނަމަވެސް، ގޭގައި ތިބެގެން ގައުމީ ޓީމުގެ ކުޅުންތެރިންނަށް ފަރިތަކުރެވޭނެ ގޮތް ހެދުމަށް ކެރަމް އެސޯސިއޭޝަނުން ވަނީ ގޭގައި ބޯޑު ނެތް ކުޅުންތެރިންނަށް ބޯޑާއި އަދި ހުރިހާ ކުޅުންތެރިންނަށްވެސް ކުޅެން ބޭނުންވާ ވަސީލަތްތައް ފޯރުކޮށްދީފައެވެ.
ކެރަމް އެސޯސިއޭޝަނުގެ ރައީސް އިބްރާހިމް ޖިހާދު ވިދާޅުވީ ކުޅުންތެރިންގެ ފެންވަރު އެއްހަމައެއްގައި ދެމެހެއްޓޭނެ ގޮތަކަށް ތަމްރީނުތައް ދެވޭނެ ގޮތްތައް ހަމަޖެއްސުމަކީ އެންމެ އިސްކަންދޭ އެއްކަންތައް ކަމަށެވެ. އެގޮތުން ގައުމީ ޓީމުގެ ކޯޗިންގ ސްޓާފުންގެ ލަފަޔާއި އިރުޝާދުގެ މަތިން، ގޭގައި ތިބެގެން ފަރޮތަކުރެވޭނެ އިންތިޒާމު ފަހިކޮށްދީފައިވާ ކަމަށް ވިދާޅުވި އެވެ.
އަޅުގަނޑުމެންނަކީ ދުނިޔޭގެ އެންމެ މަތީ ފެންވަރުގައި ކުޅެންޖެހިފައިވާ ގައުމަކަށްވުމާއެކު، ކުޅުންތެރިންގެ ފެންވަރު އެއްހަމައެއްގައި ދެމެހެއްޓޭނެ ގޮތަކަށް ތަމްރީނުތައް ދެވޭނެ ގޮތްތައް ހަމަޖެއްސުމަކީ އަޅުގަނޑުމެން އެންމެ އިސްކަންދޭ އެއްކަންތައް. މިގޮތުން މިފަދަ ހާލަތެއްގައި މިކަން ކުރުވޭނެ ގޮތްތައް ބަލައި، ގައުމީ ޓީމުގެ ކޯޗިންގ ސްޓާފުންގެ ލަފަޔާއި އިރުޝާދުގެ މަތިން މިވަނީ ގޭގައި ތިބެގެން ޕްރެކްޓިސް ކުރެވޭނެ އިންތިޒާމު ފަހިކޮށްދީފައި. އަޅުގަޑުމެން މިހާރު މިދަނީ "ނިއު ނޯމަލް" ގައި ކެރަމް ހޯލުގައި ގައުމީ ޓީމުގެ ފަރިތަކުރުން ކުރިއަށް ގެންދާނެ އުސޫލް ނިންމަމުން. މި އުސޫލުތައް ހަފްތާއެއްހާ ދުވަސްތެރޭ އަޅުގަނޑުމެން ހާމަކުރާނަން.ކެރަމް އެސޯސިއޭޝަނުގެ ރައީސް އިބްރާހިމް ޖިހާދު
ގައުމީ ކެރަމް ޓީމުގެ މެނޭޖަރު ނާޒިމް ހަސަން ބުނީ މިވަގުތު ގޭގައި ތިބިގެން ކުޅުންތެރިން ކުރަމުންދާ މަސައްކަތް ވަރަށް ރަނގަޅު ކަމަށާއި، ހަފުތާއަކު ފަސް ދުވަހު ކުޅުންތެރިން ފަރިތަކުރާ ކަމަށެވެ. އަދި މިފަދަ ހާލަތެއްގައި ކުޅުންތެރިން ހިތްވަރާއެކު ކުރަމުންދާ މަސައްކަތުން، ކުޅުންތެރިން ފޮތިވައްޓާ މިންވަރު އެއްވަރެއްގައި ހިފެހެއްޓުމަށް އެހީތެރިވެދޭނެ ކަމަށް ވެސް ބުންޏެވެ.
މިވަގުތު ގޭގައި ތިބިގެން ކުޅުންތެރިން ކުރަމުންދާ މަސައްކަތް ވަރަށް ރަނގަޅު. ހަފުތާއަކު ފަސް ދުވަހު މިދަނީ ޕްރެކްޓިސް ކުރަމުން. މިފަދަ ހާލަތެއްގައި ކުޅުންތެރިން ހިތްވަރާއެކު ކުރަމުންއެދާ މަސައްކަތުން ކުޅުންތެރިންގެ "ޕޮކެޓިންގ ރޭޓް" (ފޮތިވައްޓާ މިންވަރު ބަލަން ގެންގުޅޭ މިންގަނޑެއް) އެއްވަރެއްގައި ހިފެހެއްޓުމަށް އެހީތެރިވެދޭނެ. މިހާލަތުގައިވެސް މިކަން މިގޮތަށް ކުރިއަށް މި ގެންދެވެނީ އެސޯސިއޭޝަނުގެ ބުރަ މަސައްކަތުން. މީގެ ކުރިން މިގޮތަށް ގައުމީ ޓީމުގެ ކުޅުންތެރިން ފަރިތަކުރުމަށް ބޯޑު ދެވިފައެއްނުވޭ. އެހެންކަމުން މިފުރުސަތުގައި ކެރަމް އެސޯސިއޭޝަނަށް ވަރަށް ބޮޑަށް ޝުކުރު ދަންނަވަން.ގައުމީ ކެރަމް ޓީމުގެ މެނޭޖަރު ނާޒިމް ހަސަން
ގައުމީ ކެރަމް ޓީމުގެ ކުޅުންތެރިން ގޭގައި ފަރިތަކުރަމުންދާއިރު، ކޮވިޑް-19 ރާއްޖެއިން ފެނުމާއެކު ކުޅުވަރާ ބެހޭ ވުޒާރާއިން ވަނީ އެ ވުޒާރާގެ ދަށުގައިވާ ހުރިހާ ކުޅިވަރު ކުޅެ ތަންތަނާއި މަރުކަޒުތައް މާޗު މަހުގެ 15 ވަނަ ދުވަހުން ފެށިގެން ބަންދު ކޮށްފައެވެ.
މީގެ ކުރިން ގައުމީ ޓީމުތަކުގެ ކުޅުންތެރިންގެ އެލަވަންސް ނުދޭކަން ކުޅިވަރާ ބެހޭ ވަޒީރު ހާމަކުރި ނަމަވެސް، ކުޅިވަރު އެސޯސިއޭޝަންތަކާއި އެތުލީޓުންނާ މަޝްވަރާ ކުރުމަށްފަހު، ފަހުން ވަނީ ކުޅުންތެރިންނަށް އެލަވަންސް ދޭން ނިންމާފައެވެ.
