ޔޫއޭއީގައި ކުރިއަށްދިޔަ ރަސް އަލް ކައިމާ ހާފް މެރަތަންގެ އަންހެނުންގެ ފަސް ކިލޯމީޓަރު ދުވުމުން އެއްވަނަ ހޯދައި އެ އިވެންޓުގެ ރާއްޖޭގެ ގައުމީ ރެކޯޑް ޑރ. އައިޝަތު ޖިނާނީ އިބްރާހިމް (އީނު) ހުކުރު ދުވަހު މުގުރާލައިފިއެވެ.

ޔޫއޭއީގައި އޮތް ހާފް މެރެތަންގައި ދުވެ ފަސް ކިލޯމީޓަރުގެ ރާއްޖޭގެ ގައުމީ ރެކޯޑް ޖިނާނީ މުގުރާލިއިރު، އޭނާ ދުވަން ނުކުމެފައިވަނީ މީގެ ފަސް މަސް ކުރިންނެވެ.

2017 ވަނަ އަހަރުގެ ދިރާގު މޯލްޑިވްސް ރޯޑްރޭހުގައި މަރިޔަމް އަބްދުލްކަރީމް (މަރީ) ހެދި ރެކޯޑް ޖިނާނީ މުގުރާލީ ހުކުރު ދުވަހުގެ ރޭހުގައި 20:34 މިނެޓުން ރޭސް ނިންމައިގެންނެވެ. މިއީ މަރީގެ ޓައިމިން އަށްވުރެ 14 ސުކުންތު އަވަސް ޓައިމިން އެކެވެ.

ހުކުރު ދުވަހުގެ ރޭހުގައި އަންހެނުންގެ ފަސް ކިލޯމީޓަރުގެ ގައުމީ ރެކޯޑް އުމުރުން 32 އަހަރުގެ ޖިނާނީ މުގުރާލިއިރު، އޭނާ ވަނީ މި އިވެންޓުން އެއްވަނަވެސް ހޯދާފައެވެ. އަދި ވަނީ ވަނީ މުޅި ރޭހުން ދެ ޖިންސު އެއްކޮށް ނުވަވަނަ ހޯދާފައެވެ.

މީގެ އިތުރުން ޔޫއޭއިގައި ކުރިއަށްދިޔަ ޔޫއޭއީގައި ކުރިއަށްދިޔަ ރަސް އަލް ކައިމާ ހާފް މެރަތަންގައި ރާއްޖޭގެ ދުވުންތެރިން ވަނީ ގިނަ ރެކޯޑްތަކެއް ހަދާފައެވެ.

އެގޮތުން ހުކުރު ދުވަހުގެ ރޭހުގައި ރާއްޖޭގެ މުހައްމަދު ރަޝީދު (މޯޑް) ވަނީ ފިރިހެނުންގެ ފަސް ކިލޯމީޓަރު ދުވުމުގެ އެއްވަނަ ހޯދާ، މި އިވެންޓުގެ ގައުމީ ރެކޯޑް މުގުރާލާފައެވެ. 15:33 މިނެޓުން ދުވެގެން މޯޑް މުގުރާލީ މޮރޮކޯގައި 2018 ވަނަ އަހަރު ހުސެއިން ފަޒީލް ހާރޫން 15:50 މިނެޓުން ދުވެގެން ހެދި ރެކޯޑެވެ.

މީގެ އިތުރަށް ހުކުރު ދުވަހުގެ ރޭހުގައި ތަޖުރިބާކާރު ދުވުންތެރިޔާ މަރިޔަމް އަބްދުލްކަރީމް (މަރީ) ވަނީ ހަތަރު ރިކޯޑެއް އާކޮށްފައެވެ. އެގޮތުން އަންހެނުންގެ ހާފް މެރެތަންގެ ގައުމީ ރެކޯޑް މަރީ އާކުރީ 1 ގަޑި 32:42 މިނެޓުން ރޭސް ނިންމައިގެންނެވެ. އަދި އަންހެނުންގެ 10 ކިލޯމީޓަރު ދުވުމުގެ ގައުމީ ރެކޯޑް 43 މިނެޓުން ދުވެގެން އާކުރިއިރު، އަންހެނުންގެ 15 ކިލޯމީޓަރު ދުވުމުގެ ގައުމީ ރެކޯޑް އޭނާ އާކުރީ 1 ގަޑި 5:23 މިނެޓުން ދުވެގެންނެވެ. އޭގެ އިތުރަށް އަންހެނުންގެ 20 ކިލޯމީޓަރު ދުވުމުގެ ގައުމީ ރެކޯޑް މަރީ އާކުރީ 1 ގަޑި 28:11 މިނެޓުން ދުވެގެންނެވެ.