އަވަށްޓެރި އިންޑިއާ އިން ރާއްޖެ އަށް އެތެރެ ކުރާ ބައެއް ބާވަތްތަކުގެ ކޯޓާ ބޮޑު ތަނުން އިތުރުކޮށް، އެތަކެތި އެތެރެކުރުމަށް އޮތް ހުރަސްތައް ނައްތާލައިފިއެވެ.

ނިމިގެން ދިޔަ ކުރީގެ ރައީސް އަބްދުﷲ ޔާމީންގެ ސަރުކާރުގެ ދުވަސްވަރު އިންޑިއާ އިން ވަނީ ރާއްޖެ އަށް އެތެރެ ކުރާ ކާޑުގެ ގިނަ ބާވަތްތަކުގެ ކޯޓާ ވަރަށް ބޮޑު ތަނުން ކުޑަ ކޮށްފައެވެ. އޭރު އެންމެ ކުޑަ ކޮށްފައި ވަނީ ފިޔަ އާއި ފުށް އެތެރެކުރުމަށް ދޫކުރާ ކޯޓާއެވެ. 

އިންޑިއާގެ ޑިރެކްޓަރ ޖެނެރަލް އޮފް ފޮރިން ޓްރޭޑް އިން ނެރުނު ބަޔާނެއްގައި ބުނީ، ރާއްޖެއަށް ވަކި ބާވަތެއްގެ ތަކެތި ކޯޓާ ނަގައިގެން ވަކި ވަރަކަށް އެތެރެކުރެވެން އޮތް ފިޔަވަޅު ނައްތާލައި ވަކި ކޯޓާއެއް ނުނަގައި އެއްޗެހި އެތެރެ ކުރެވޭ ގޮތަށް ނިންމާފައިވާ ކަމަށެވެ.

''އިންޑިއާއާ ރާއްޖެއާ ދެމެދު ވެފައިވާ 20-2019 ޓްރޭޑް އެގްރީމެންޓްގެ ދަށުން އިންޑިއާ އިން އެކްސްޕޯޓް ކުރާ އަލުވި، ފިޔާ، ހަނޑޫ، ފުށް، ހަކުރު، މުގު، ބިސް ފަދަ ތަކެތިގެ ހުއްދަ ވަނީ ދީފައި،'' ޑިރެކްޓަރ ޖެނެރަލް އޮފް ފޮރިން ޓްރޭޑް ނެރުނު ބަޔާނެއްގައި ބުނެއެވެ.

އަލުވި 15،492.36 (ފަނަރަހާސް ހަތަރު ސަތޭކަ ދޭއް. ތިރީސް ހަ)  މެޓްރިކް ޓަނާއި ފިޔާގެ އެކްސްޕޯޓަށް 25،744.26 (ފަންސަވީސް ހަތް ސަތޭކަ ސާޅީސް ހަތަރު. ސައްބީސް) ޓަނާއި ހަނޑުލަށް 89،454.22 (އަށްޑިހަ ނުވަ ހާސް ހަތަރު ސަތޭކަ ފަންސާސް ހަތަރު. ބާވީސް) ޓަނާއި އަދި ފުށަށް 78،612.26 (ހަތްދިހަ އަށް ހާސް ހަސަތޭކަ ބާރަ. ސައްބީސް) ޓަނުގެ އިތުރުން ހަކުރަށް 46،444.74 (ސާޅީސް ހަ ހާސް ހަތަރު ސަތޭކަ ސާޅީސް ހަތަރު. ހަތްދިހަ ހަތަރު) ޓަނު އަދި 161.65 ޓަނު އަދި 307،885،069 (ތިންސަތޭކަ ހަތް މިލިއަން އަށްލައްކަ އަށްޑިހަ ފަސް ހާސް ފަސްދޮޅަސް ނުވަ) ބިހުގެ ކޯޓާ އިންޑިއާ އިން ވަނީ ރާއްޖެ އަށް ދޫކޮށްފައެވެ. މި އަދަދަކީ 19-2018 އަހަރު ދޫކުރި ކޯޓާއާ އަޅައި ބަލާއިރު ބޮޑު އަދަދެކެވެ. އެއީ ގާތްގަނޑަކަށް 68.1 މިލިއަން ރުފިޔާގެ މުދަލެވެ. 

ކުރިން ރާއްޖެ އަށް އަލުވި އެކްސްޕޯޓްކުރުމަށް ދޫކޮށްފައި ވަނީ 5،308.7 (ފަސްހާސް ތިންސަތޭކަ އަށެއް. ހަތެއް) މެޓްރިކް ޓަނެވެ. ފިޔާ އެކްޕޯޓްކުރަން 9892.03 (ނުވަހާސް އަށް ސަތޭކަ ނުވަދިހަ ދޭއް. ސުމެއް ތިނެއް) ޓަނު، ހަނޑުލަށް 946.1 ޓަނު، ފުށަށް 338.47 މެޓްރިކް ޓަނުގެ އިތުރުން ހަކުރަށް 31.59 މެޓްރިކް ޓަނެވެ. އެއީ ގާތްގަނޑަކަށް 26.5 މިލިއަން ރުފިޔާގެ މުދަލެވެ. 

ކޮންމެ އަހަރަކު ވެސް ރާއްޖެއަށް އެތެރެކުރާނެ ތަކެތީގެ މިންވަރު ކަނޑައަޅަނީ 1981 ވަނަ އަހަރުގައި ރާއްޖެ އާއި އިންޑިއާއާ ދެމެދު ވެފައިވާ ވިޔަފާރީގެ އެއްބަސްވުމުގެ ދަށުންނެވެ. ދެގައުމުގެ ދެމެދުގައި ހެދިފައިވާ ވިޔަފާރީގެ އެއްބަސްވުމުގައި ވަނީ ކޯޓާ ކަނޑައަޅާނީ އިންޑިއާ ސަރުކާރުން ކަމަށާއި އެހެން ނަމަވެސް ތަކެތި އެތެރެ ކުރުމުގައި ކޯޓާ ކަނޑައެޅުމުގައި މާކެޓުގައި ތަކެތި ހުރި މިންވަރާއި ރާއްޖެއިން އެތަކެތި ބޭނުންވާ މިންވަރަށް ބަލަންޖެހޭނެ ކަމަށް ތަކެތި ވިއްކާ ފަރާތްތަކުން ބުނެ އެވެ.