ދަނޑުވެރިކަން އާލާކުރުމުގެ ގޮތުން ސަރުކާރުން ހުށަހެޅި ޕެސްޓިސައިޑާއި ބެހޭ ބިލް މަޖިލީހަށް ބަލައިގެންފި
ބިލް ފާސްކުރަން ފެންނަ ކަމަށް 42 މެމްބަރުން ވަނީ ވޯޓް ދެއްވާފައި
ޕެސްޓްސައިޑް ބޭނުންކުރުމުގައި ގެންގުޅޭނެ އުސޫލްތަކެއް ބިލްގައި ވަނީ ކަނޑައަޅާފައި
ދެމެހެއްޓެނިވި ގޮތެއްގައި ދަނޑުވެރިކަން އާލާކުރުމުގެ ގޮތުން ސަރުކާރުން ހުށަހެޅި ޕެސްޓިސައިޑާއި ބެހޭ ބިލް މަޖިލީހަށް ބަލައިގެންފިއެވެ.
ބިލް ފާސްކުރަން ފެންނަ ކަމަށް 42 މެމްބަރުން ވަނީ ވޯޓް ދެއްވާފައެވެ. ބިލް އިތުރަށް ދިރާސާކުރަން ބިލާއި ގުޅުން ހުރި ކޮމިޓީއަށް ބިލް ވަނީ ފޮނުވާފައެވެ.
ބިލް މަޖިލީހަށް ހުށަހެޅުއްވީ ސަރުކާރުގެ ފަރާތުން ފެލިދޫ ދާއިރާގެ މެމްބަރު އަހްމަދު މަރްޒޫގްއެވެ. ބިލްގެ ފުރަތަމަ ކިޔުން އިއްވާފައިވަނީ 15 އެޕްރީލްގައެވެ.
ބިލަށް ވާހަކަދެއްކެވި ހުރިހާ މެމްބަރުން ވެސް ވަނީ ބިލަށް ތާއީދު ކުރައްވާ ވާހަކަފުޅު ދައްކަވާފައެވެ.
ޕެސްޓި ސައިޑް ބޭނުންކުރުމުގައި ކޮލިޓީ ރަނގަޅު ކުރުމަށް އެއްވެސް އުސޫލެއް ނުގެންގުޅޭ ކަމަށާއި، މި ބިލަކީ ދަނޑުވެރިކަން ދިރުވާ އާލާކުރުމަށް މުހިއްމު ބިލެއް ކަމަށް މެމްބަރުން ވަނީ ފާހަގަ ކުރައްވާފައެވެ. ގާނޫނުތައް ހެދުމަކުން ނުފުދޭ ކަމަށާއި، ގާނޫނު ހަދާފައި އެ ތަންފީޒް ކުރެވޭނެ ގޮތްތަކެއް ހޯދުން މުހިއްމު ކަމަށް މެމްބަރުން ވަނީ ވިދާޅުވެފައެވެ.
މި ބިލްގައި ދަނޑުވެރިކަމުގެ އުފެއްދުންތައް ކުރިއެރުވުމަށްޓަކައި، ޕެސްޓިސައިޑްގެ ގޮތުގައި ބޭނުން ކުރާ ބާވަތްތައް ދަނޑުވެރިކަމުގައި ބޭނުންކުރުމާއި، ޕެސްޓިސައިޑް ދިވެހިރާއްޖޭގައި އުފެއްދުމާއި، ދިވެހިރާއްޖެއަށް އިމްޕޯޓް ކުރުމާއި، ވިއްކުމާއި، ބޭނުންކުރުމާއި، ނައްތާލުމާއި ބެހޭ އުސޫލްތައް ކަނޑައަޅައި، ޕެސްޓިސައިޑް ބޭނުންކުރުމުގައި އާންމު ސިއްހަތާއި، ތިމާވެއްޓަށް ގެއްލުން ލިބޭ ފަދަ ގޮތަކަށް ކުރާ އަމަލްތައް ބަލައި ފިޔަވަޅު އެޅުމާއި، ޕެސްޓިސައިޑާއި ގުޅޭ އެނޫން ވެސް އުސޫލްތައް ބަޔާން ކޮށްފައިވެއެވެ.
މި ބިލް ގާނޫނަކަށް ބަދަލުވެގެން ދިއުމުން ދަނޑުވެރިކަމުގައި ބޭނުންކުރާ ޕެސްޓިސައިޑް އިމްޕޯޓް ކުރުމާއި،އެކްސްޕޯޓްކުރުމާއި، ވިއްކުމާއި، އުފެއްދުމާއި،ބޭނުންކުރުމާއި ބެލެހެއްޓުމާއި،ނައްތާލުމާއި ގުޅޭ އުސޫލްތައް ކަނޑައެޅިގެންދާނެއެވެ. ބިލް ގާނޫނަކަށް ބަދަލުވެގެން ދިއުމުން ގާނޫނު ހިންގުމުގެ މައިގަނޑު މަސްއޫލިއްޔަތު ހަވާލުވެގެންވާ ފަރާތަކީ މިނިސްޓަރެވެ.
މިނިސްޓަރު ކަނޑައަޅާ ސިޔާސަތުތައް ތަންފީޒް ކުރުމުގައި މިނިސްޓަރަށް ލަފާ ދިނުމަށްޓަކައި ގާނޫނަށް އަމަލުކުރަން ފަށާތާ 3 މަސް ދުވަހުގެ ތެރޭގައި ޕެސްޓިސައިޑާއި ބެހޭ ބޯޑްގެ ނަމުގައި މިނިސްޓްރީގައި ބޯޑެއް އުފައްދަންވާނެ ކަމަށް ބިލްގައި ބަޔާކޮށްފައިވެއެވެ. މީގެ އިތުރުން ބިލްގައި ޕެސްޓިސައިޑް އާއި ގުޅޭ ސިޔާސަތު ކަނޑައެޅުމާއި، ޕެސްޓިސައިޑް އާއި ބެހޭ ޔުނިޓެއް މިނިސްޓްރީގެ ދަނޑުވެރިކަމުގެ ޑިވިޝަންގައި މިނިސްޓަރު އުފައްދަންވާނެ ކަމަށް ބަޔާން ކޮށްފައިވެއެވެ.
ޕެސްޓިސައިޑް އާއި ބެހޭ ބޯޑެއް އެކުލަވާލުމަށް ބަޔާން ކޮށްފައިވާއިރު، މި ބިލް ގާނޫނަކަށް ބަދަލުވެ، ގާނޫނަށް އަމަލުކުރަން ފަށާތާ ތިން މަސްދުވަހުގެ ތެރޭގައި ބޯޑް އުފައްދަންވާނެ ކަމަށް ބިލްގައި ބަޔާން ކޮށްފައިވެއެވެ. މި ބޯޑަކީ މިނިސްޓަރު ކަނޑައަޅާ ސިޔާސަތުތައް ތަންފީޒް ކުރުމުގައި މިނިސްޓަރަށް ލަފާ ދިނުމަށްޓަކައި އުފައްދަންޖެހޭ ބޯޑެކެވެ.
މި ބިލް ގާނޫނަކަށް ބަދަލުވެގެން ދިޔުމުން ދިވެހިރާއްޖެއަށް އެކްސްޕޯޓް ކުރެވޭނެ ބާވަތުގެ ޕެސްޓިސައިޑަށް ހުއްދަދޭނީ ގާނޫނުގައި ބަޔާންކުރާ ގޮތުގެ މަތިން އެ ބޯޑުންނެވެ. ޕެސްޓިސައިޑް ނައްތާލުމާއި، ޕެސްޓިސައިޑް ބަންދުކުރުމާއި ލޭބަލް ކުރުމާއި، އަލުން ބަންދުކުރުމާއި،ޕެސްޓިސައިޑް ރައްކާކޮށްފައި ބެލެހެއްޓުމާއި، އެއްތަނުން އަނެއް ތަނަށް ގެންދިއުމާއި،އިޝްތިހާރުކުރުމާއި،ލައިސަންސް ދޫކުރާނެ ގޮތްތައް ވެސް ބިލްގައި ބަޔާން ކޮށްފައިވެއެވެ.
