ފީއަލީގައި ޑެންގީ ފެތުރުމުގެ މައްސަލަ ބޮޑުވާތީ، އެމްޓީސީސީން އެ ރަށު ގޮނޑުދޮށް ސާފުކޮށްފި
15 ޓަނުގެ 6 ލޮރީގެ ކުނި ސާފުކޮށްފައިވޭ
އެމްޓީސީސީން ފީއަލީގެ ގޮނޑުދޮށް ސާފުކުރުމުގެ ތެރެއިން
ފ. ފީއަލީގައި މަދިރީގެ ސަބަބުން ޖެހޭ ނުރައްކާތެރި ހުން ޑެންގީ ފެތުރުމުގެ މައްސަލަ ބޮޑުވެފައިވާތީ މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އެރަށު ގޮނޑު ސަރަހައްދު އިއްޔެ ސާފުކޮށްފިއެވެ.
މިދިޔަ މަހު ކުރީކޮޅުން ފެށިގެން ހަލުވި ކަމާ އެކު ފީއަލީގައި ޑެންގީ ހުން ޖެހުމުގެ ސަބަބުން އެރަށު ބައެއް ސްކޫލްތައް ވެސް ބަންދުކުރިއެވެ.
އެމްޓީސީސީން ބުނީ، އެރަށު ގޮނޑުދޮށް ސާފުކުރުމުގެ މަސައްކަތުގެ ތެރެއިން މަދިރި އާލާ ވާގޮތަށް ފެންހަރުލާފައި ހުރި ކުންޏާއި އެހެނިހެން ކުންޏާ އެކު، ފީއަލީ ގޮނޑު ސަރަހައްދުން 15 ޓަނުގެ 6 ލޮރީގެ ކުނި އިއްޔެ ސާފުކޮށްފައިވާ ކަމަށެވެ.
އެމްޓީސީސީގެ ލީމާ ލޭންޑިންގ ކްރާފްޓްގައި ކުނިތައް ތިލަފުއްޓައް ގެނެސް، ކުނި ނައްތާލުމަށް ވެމްކޯއާ މިހާރު ހަވާލުކުރެވިފައިވާ ކަމަށް އެމްޓީސީސިން ބުންޏެވެ.
ޑެންގީ ހުން ފެތުރޭތީ ފިއަލީ ގޮނޑުދޮށް ސާފުކޮށްފައިވާއިރު، އެރަށު ކައުންސިލުން ވަނީ މީގެ ކުރިން މަދިރި އާލާވާ ތަންތަން ނައްތާލުމުގެ މަސައްކަތް ކުރަމުންނެވެ. އަދި، ގިނަ އަދަދެއްގެ ފުޅިތަކާއި ދަޅުތައް ނައްލެވޭނެ ގޮތެއް ނެތް ކަމަށް ބުނެފައެވެ.
ނިމިގެން ދިޔަ ފެބްރުއަރީ މަހު ޑެންގީ ހުން ޖެހިގެން 368 ކޭސްއެއް ރިޕޯޓް ކޮށްފައިވާ ކަމަށް ހެލްތު ޕްރޮޓެކްޝަން އެޖެންސީ ވެސް ވަނީ ބުނެފައެވެ.
