އާރިއާނާ ގްރާންޑޭގެ 'ތެންކް ޔޫ، ނެކްސްޓް ޔޫޓިއުބްގެ ރެކޯޑްތައް މުގުރަނީ

އެމެރިކާގެ މަޝްހޫރު ޕޮޕް ލަވަލިޔުންތެރިޔާ އާރިއާނާ ގްރާންޑޭގެ "ތެންކް ޔޫ، ނެކްސްޓް" ލަވައިގެ ވީޑިއޯ ދަނީ ގިނަ ރިކޯޑްތަކެއް މުގުރަމުންނެވެ.

ހޮނިހިރު ދުވަހު ރިލީޒްކޮށްފައިވާ މި ވީޑިއޯ އަށް 22 ގަޑިއިރުގެ ތެރޭގައި 46 މިލިއަން ވިއުސް ލިބިފައިވާއިރު، "ތެންކް ޔޫ، ނެކްސްޓް" ވެގެންދިޔައީ 24 ގަޑިއިރުގެ ތެރޭގައި އެންމެ ގިނަ ވިއުސް ހޯދާފައިވާ ވީޑިއޯއަށެވެ.

"ތެންކް ޔޫ، ނެކްސްޓް"ގެ ކުރިން މި ރިކޯޑް އޮތީ ކޭ-ޕޮޕް ބޭންޑެއްކަމަށްވާ ބީޓީއެސް އަތުގައެވެ. އޮގަސްޓް މަހު ރިލީޒް ކުރި އެ ބޭންޑުގެ "އައިޑޮލް" ލަވައަށް 24 ގަޑިއިރުގެ ތެރޭގައި ލިބިފައި ވަނީ 45.9 މިލިއަން ވިއުސްއެވެ.

"ތެންކް ޔޫ، ނެކްސްޓް"އިން މިހާތަނަށް ހޯދާފައިވާ ރިކޯޑްތަކުގެ ތެރޭގައި، އެއް ފަހަރާ އެންމެ ގިނަ މީހުން ބަލާފައިވާ ވީޑިއޯ އަދި ވީޑިއޯ ޕްރިމިއާ ކުރި ވަގުތު އެންމެ ގިނަ ޗެޓް މެސްޖް ލިބުނު ވީޑިއޯ ހިމެނެއެވެ. އަދި ޔޫޓިއުބްގައި ޓްރެފިކް ބޮޑުވެގެން ވީޑިއޯ އަށް ކޮމެންޓް ޕޯސްޓްވުން ޑިލޭވެގެން ދިޔައެވެ.

ނޮވެމްބަރުގެ ކުރީކޮޅު ރިލީޒްކޮށްފައިވާ "ތެންކް ޔޫ، ނެކްސްޓް"ގެ ވީޑިއޯ ލަވައިގެ ޓީޒަރތައް އާރިއާނާގެ ސޯޝަލް މީޑިއާ އެކައުންޓްތަކުން ހިއްސާ ކުރަމުންދާތާ ހަފްތާއެއްހާ ދުވަސް ވަނީ ވެފައެވެ.

އެ ލަވައަކީ އޭނާއާއި ކޮމީޑިއަން ޕީޓް ޑޭވިޑްސަންގެ އެންގޭޖްމަންޓް ރޫޅުމަށްފަހު އޭނާ ރިލީޒް ކުރި ލަވައެކެވެ. އަދި އެ ލަވައިގައި ޕީޓްގެ އިތުރުން، އާރިއާނާގެ ބައެއް އެހެން ލޯބިވެރިންގެ ނަންވަނީ ހިމަނާފައެވެ. އޭގެ ތެރޭގައި ރެޕް އާޓިސްޓް ބިގް ޝޯން އާއި ދާދި ފަހުން އޯވަރޑޯޒް ވެގެން މަރުވި މެކް މިލަރ ހިމެނެއެވެ.

ކުރީގެ ލޯބިވެރިންގެ ނަން ހިމަނައި ތައްޔާރުކުރި ލަވަ އެއް ނަމަވެސް، "ތެންކިއު، ނެކްސްޓް"ގައި އެ މީހުންނަށް އެއްވެސް ރުޅިވެރިކަމެއް ހިއްސާކޮށްފައެއް ނުވެއެވެ.

ލަވައިގެ ވީޑިއޯ ހޮނިހިރު ދުވަހު ރިލީޒްކޮށްފައިވާއިރު، އެއިން ފެނިގެންދަނީ ކާމިޔާބު ފިލްމްތަކުގެ މަންޒަރުތަކެވެ.

އެގޮތުން "މީން ގަރލްސް"، "ތަރޓީން ގޮއިން އޮން ތަރޓީ"، "ބްރިންގް އިޓް އޮން" އަދި "ލީގަލީ ބްލޮންޑް"ގެ މަންޒަރުތައް އާރިއާނާ ވަނީ ރިކްރިއޭޓްކޮށްފައެވެ. އަދި އެ ފިލްމްތަކުން ފެންނަ ބައެއް ކާސްޓުން ވެސް ފެނެއެވެ. ލަވައިގެ "މީން ގަރލްސް" ބައިގައި އާރިއާނާގެ މަންމަގެ ރޯލުން ފެންނަނީ ކިމް ކާޑޭޝިއަންގެ މަންމަ ކްރިސް ޖެނަރއެވެ.

މި ވީޑިއޯ ރިލީޒް ކުރުމާ އެކު ތައުރީފް ކުރަމުންދާ ފަރާތްތަކުގެ ތެރޭގައި ހޮލީވުޑްގެ މަޝްހޫރު ފަންނާނުން ހިމެނެއެވެ. އޭގެ ތެރޭގައި "ތަރޓީން ގޮއިން އޮން ތަރޓީ"ގެ ތަރިންކަމުގައިވާ ޖެނިފަރ ގާނަރ އާއި މާކް ރަފަލޯ އަދި "ލީގަލީ ބްލޮންޑް"ގެ ތަރި ރީސް ވިދަސްޕޫން ހިމެނެއެވެ.