ނޫސްވެރިޔާ އަހުމަދު ރިލްވާން އަބްދުﷲ ގެއްލުނުތާ ހަތަރު އަހަރު ފާހަގަކުރުމަށް ބުދަ ދުވަހު ހިނގާލުމެއް ބާއްވައިފިއެވެ.
މި ހިނގާލުން ކުރިއަށް ގެންގޮސްފައިވަނީ މަޖީދީ މަގު ޗާނދަނީމަގާއި ގުޅޭ ހަތަރު އަނގޮޅު ކަންމަތިން ފެށިގެން މާފަންނުގައި ހުންނަ ޒުވާނުންގެ މަރުކަޒާއި ހަމައަށެވެ.
މި ހިންގާލުން ކުރިއަށް ގެންދިއުމަށް މީގެ ކުރީގެ ފަހަރުތަކާއި ޚިލާފަށް ފުލުހުން ހުރަސްއަޅާފައި ނުވާތީ ހިނގާލުން ވަނީ ކުރިއަށްގެންގޮސްފައެވެ.
މި ހިނގާލުމުގައި ބައިވެރިވީ ރިލްވާނުގެ އާއިލާއާއި ހެޔޮއެދޭ ފަރާތްތަކާއި، ބައެއް ވަކީލުންނާއި މަދަނީ ޖަމިއްޔާތަކުގެ އިތުރުން ބައެއް ނޫސްވެރިންނެވެ.
ހިނގާލުމުގައި ވާހަކަދެއްކި ބައެއް ބޭފުޅުންގެ ވާހަކަތަކަށް ބާލާއިރު، ރިލްވާނުގެ އެކުވެރި އަދި މިހާރު ޓްރާންސްޕޭރެންސީ މޯލްޑިވްސްގެ ސީނިއަރ ޕްރޮޖެކްޓް ކޯޑިނޭޓަރު އަހުމަދު ތޮލާލް ވިދާޅުވީ، ރިލްވާން ގެއްލިގެން ރައީސްއާއި ސުވާލުކުރުމުން "ދެން ނޫސްވެރިއަކު ގެއްލުނީއޭ. ދެން ނޫސްވެރިއަކު ގެއްލުނީމާ ހޯދާނެއޭ" ވިދާޅުވުމަކުން ނުފުދޭކަމަށާއި، ރައީސުލް ޖުމްހޫރިއްޔާގެ ކުރިފުޅުމަތީ ކޮންމެ ރައްޔިތަކީވެސް ހަަމަހަމަ މީހަކަށް ވާންޖެހޭނެކަމަށެވެ. އެކަމަކު އެމަނިކުފާނުގެ ކިބައިން ފެނިގެން ދިޔައީ ޕޯޑިއަމްތަކަށް އަރާ ވަޑައިގެން އެއްވެސް ސީރިއަސްކަމެއް ނެތި މަޖަލަކަށް ހައްދަވައިގެން ރިލްވާންއޭކިޔައިގެން އެއްދުވަހާ ދެފަހަރު ދެގޮތަށް ވާހަކަ ދައްކަވައި ހީ ސަމާސާ ކުރެއްވިތަންކަމަށެވެ. އޭނާ ވިދާޅުވީ މި މައްސަލައިގައި އިހުމާލުވި ފުލުހުންނާއި، ދައުލަތުގެ މުއައްސަސާތަކުގެ ވެރިންނާއި ހުރިހާއެންމެން ކޮންމެވެސް ދުވަހަކުން އިންސާފުގެ ކުރިމައްޗަށް އަންނަން ޖެހޭނޭކަމަށެވެ.
މި އިވެންޓްގައި ވާހަކަ ދައްކަވަމުން ގާނޫނީ ވަކީލް ހިސާން ހުސެއިން ވިދާޅުވީ، މައްސަލައިގެ ވަރަށް ކުރީކޮޅުއްސުރެ ފުލުހުން މި މައްސަލައިގައި އިހުމާލުވަމުންދާކަން ފާހަގަކުރެވުނު ކަމަށާއި، 2014 ވަނަ އަހަރުގެ އޮކްޓޫބަރުގައި ފުލުހުންގެ އިހުމާލު މައްސަަލައިގައި އޮތްކަމަށް ފޮލިސް އިންޓެގްރިޓީ ކޮމިޝަނަށް އާއިލާއިން ހުށައެޅިކަމަށެވެ. އޭނާ ވިދާޅުވީ ކޮންމެވެސް ދުވަހަކުން ރިލްވާނުގެ މައްސަލައިގައި އިންސާފު ލިބޭނެ ކަމަށެވެ. އެކަމަކު ނޭނގޭކަމަކީ އެ އިންސާފު ލިބޭނެ ދުވަހެއްކަމަށް ހިސާން ވިދާޅުވިއެވެ. ހިސާން ވިދާޅުވިގޮތުގައި މި މައްސަލައިގައި އެންމެފަހުން ކްރިމިނަލް ކޯޓުން ކުރި ހުކުމުން ދޭހަވީ ތަހުގީގު ފުރިހަމަ ނުވާކަން ކަމަށެވެ. ތަހުގީގުގައި ބަލަންޖެހޭ ކަންކަން ފުލުހުން ބަލާފައި ނުވާކަަމަށެވެ. ހިސާން ވިދާޅުވިގޮތުގައި އެކަންކަމަކީ ބަލަން ޖެހޭ ކަންކަމަށް ވީ ހިދުވެސް ނުބަލައި ދޫކޮށްލީ އެކަމުގެ އަޑީގައި ބަޔަކު ތިބެ އެކަމަށް ނުފޫޒް ފޯރުވާތީކަަން ދޭހަވާކަމަށެވެ.
ރިލްވާނާއި ގުޅޭގޮތުން އަންގާރަ ދުވަހު ރައީސް ޔާމީން ދެއްކެވި ވާހަކަފުޅަށް އިޝާރާތްކުރައްވާ ހިސާން ވިދާޅުވީ، ދިވެހި ސަރުކާރަށް މި މައްސަލައިގައި އެތަށް ހަގީގަތެއް އެނގިހުރެ ފޮރުވަން މަސައްކަތްކުރާކަމަށެވެ.
މި ހިނގާލުމަށްފަހު ވާހަކަ ދައްކަވަމުން ޑިމޮކްރަސީ ނެޓްވޯކްގެ އެގްޒެކްޓިވް ޑިރެކްޓަރ ޝަހިންދާ އިސްމާއިލް ވަނީ ރިލްވާންގެ މައްސަަލައިގެ އާ ތަހުގީގެއް ހިންގައި ދިނުމަށް ކަމާގުޅޭ ފަރާތްތަކަށް ގޮވާލާފައެވެ. އަދި އެކަން ކުރަންވާނީ ކްރިމިނަލް ކޯޓްގެ ގާޒީ މައްސަލައިގެ ހުކުމް އިއްވަމުން ފާހަގަކުރެއްވި ހަތް ނުކުތާވެސް ހަމަވާގޮތަަށް ކަމަށް ޝަހިންދާ ވިދާޅުވިއެވެ. މީގެ އިތުރުން ރިލްވާނުގެ އާއިލާއާއި، ރަށްޓެހިންނާއި، މަދަނީ ޖަމިއްޔާތަކުން ހުށައެޅި މައުލޫމާތުވެސް އެއްކޮށް އިންސާފުވެރި ޝަރީއަތެެއް ހިންގައި ދިނުމަށް އޭނާ ގޮވާލެއްވިއެވެ.
ރިލްވާނުގެ މަންމަ ބުނީ ރައީސުލް ޖުމްހޫރިއްޔާ އޭނާގެ ދަރިފުޅާ ގުޅޭގޮތުން ދެއްކި ވާހަކައަށް ދުވަހަކުވެސް މާފުނުކުރާނެކަމަށެވެ. އަދި ރައީސުލް ޖުމްހޫރިއްޔާ ދެފަހަރު ދެގޮތަށް ވިދާޅުވީ ކީއްވެތޯއާއި އޭނާގެ ދަރިފުޅު ރިލްވާނު އަދި ފެންނާނެކަމަށް ވިދާޅުވުމުން އަދިވެސް މި ހުރީ އޭނާ އެނބުރި އަންނާނެކަމުގެ އިންތިޒާރުގައި ކަމަށެވެ.
