އިސްދޫއިން އިބޫއަށް "ރަސްކަލެއްގެ" ލަގަބު
7 އޯގަސްޓު 2018 | އަންގާރަ 13:04އިސްދޫ އިން އިބޫ އަށް ދެންނެވި މަރުޙަބާއަށް އެރަށުގެ މީހުން ކިޔައި އުޅެނީ "ހިއްޗަށް އެރުވުން"
އިސްދޫއިން އިބޫއަށް މަރުޙަބާ ދަންނަވަނީ
ގުޅިފައިވާ ސިޔާސީ ޕާޓީތަކުގެ ފަރާތުން ރިޔާސީ އިންތިހާބުގައި ވާދަކުރައްވާ އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހު (އިބޫ) ލ. އަތޮޅު އިސްދޫއަށް ވަޑައިގެންނެވެމުން އެރަށުގެ ރައްޔިތުން "ރަސްކަލެއްގެ" ލަގަބު އަރުވައި، އެމަނިކުފާނަށް މަރުޙަބާ ދަންނަވައިފިއެވެ.
ލ. އަތޮޅަށް ކުރައްވާ ކެމްޕެއިން ދަތުރުފުޅުގެ ތެރެއިން އިބޫ އެންމެ ފުރަތަމަ އަންގާރަ ދުވަހު ހެނދުނު ވަޑައިގެންނެވީ އެ އަތޮޅު އިސްދޫއަށެވެ. އިސްދޫއަށް އިބޫ ވަޑައިގެންނެވުމުން އެ ރަށު ބަނދަރު ސަރަހައްދުން ހާއްސަ "އޮނަަރ ގާރޑެއް" އިބޫ އަށް ވަނީ އަރުވާފައެވެ. އެ ރަށުގެ ރައްޔިތުން ބުނާ ގޮތުން އެއީ ރަސްކަލެއްގެ ރަމްޒީ ލަގަބު އިބޫއަށް އަރުވައި އެމަނިކުފާނަށްކީ ހާއްސަ މަރުޙަބާއެއް ކަމަށެވެ. އެކަމަށް އެރަށުގެ ރައްޔިތުން ކިޔައި އުޅެނީ "ހިތްޗަށް" ވަޑައިގަތުމެވެ.
އިސްދޫ ރައްޔިތުން އާންމުކޮށް "ހިތްޗަށް" އެރުވުމުގެ ކުޅިވަރު ކުޅެނީ ހާއްސަ ދުވަސްތަކުގައެވެ. އީދު ފަދަ ދުވަސްތަކުގައި މިހާރު ވެސް މި ސަގާފީ ކުޅިވަރު ކުޅެއުޅެއެވެ. އެގޮތުން ރަސްގެފާނަށް މަރުޙަބާ ދެންނެވުމުގެ ގޮތުން އެންމެ ކުރީގައި ތިބެނީ މިރަށުގެ ރައްޔިތުން ކިޔާ ގޮތުން "ކުދި ބޭކަލުންނެވެ". އަދި ރަސްގެފާނު ވަޑައިގެންނެވުމުން ރަސްގެފާގެ ބޯމަތީގައި ހަތްކޮޅު އަބުރާނެއެވެ. އަދި ސިލޭރު ދަނޑި ހިފައިގެން ރަސްގެފާންގެ ފަހަތުގައި "ކުދި ބޭކަލުން" ތިބެއެވެ.
އިސްދޫން އިބޫއަށް މަރުޙަބާ ދަންނަވަނީ
"މިއީ މިރަށު މީހުން އީދު ފަދަ މުނާސަބަތުތަކުގައި ކުރިއަށް ގެންދާ ކުޅިވަރެއް. އިބޫ މި ރަށަށް ވަޑައިގެނެވުން އަޅުގަނޑުމެން ވަރަށް އުފާވެއްޖެ. އެހެންވެ ރަސްގެފާނެއްގެ ލަގަބު މި އެރުވީ. ރައީސް ޔާމީންގެ ވެރިކަމުގައި އެމަނިކުފާނަށް މި ރަށަށް ވަޑައިގަންވާކަން ކެރިވަޑައެއްނުގެންނެވި،" އިސްދޫއިން ވާހަކަ ދެއްކި ދުވަސްވީ މީހެއް ބުންޏެވެ.
އިބޫ އިސްދޫއަށް ވަޑައިގެންނެވުމުން އެމަނިކުފާނުގެ އިސްތަށިފުޅު މަތީގައި "ހަތްކޮޅު" ހުރީ ނަގާފައެވެ. އަދި ކުދި ބޭކަލުން "ހަތްކޮޅު" ހިފައިގެން ހުންނަ މީހުންގެ ފަތުގައި ތިބީ ސިލޭރު ދަނޑީގެ ބަދަލުގައި، ގުޅިފައިވާ ސިޔާސީ ޕާޓީތަކުގެ ދިދަ ހިފައިގެންނެވެ. ބަނދަރު މަތީގައި ތިބި އާންމު ރައްޔިތުންނާ އިބޫ ސަލާމްކުރެއްވިއިރު، އެމަނިކުފާނުގެ ބޯމަތީގައި "ހަތްކޮޅު" ދިޔައީ އަބުރަމުންކަން ފާހަގަކޮށްލެވެ.
އިސްދޫން އިބޫއަށް މަރުޙަބާ ދަންނަވަނީ
މިއީ މިހާރަތަނަން އިބޫ އަތޮޅުތެރެއަށް ކުރައްވާ ކެމްޕެއިން ދަތުރުފުޅުތަކުގެ ތެރެއިން އެންމެ ތަފާތު ގޮތަކަށް މަރުޙަބާ ދެންނެވި ފަހަރެއެވެ.
އިބޫ ދެން ވަޑައިގަންނަވަނީ ލ. ގަމަށެވެ. ލ. ގަމަށް ވަޑައިގަތުމަށް ފަހު އެ ރަށުގައި ގުޅިފައިވާ ސިޔާސީ ޕާޓީތަކުގެ އޮފީސް ހުޅުވައިދެއްވާނެއެވެ. އަދި ލ. އަތޮޅަށް ކުރައްވާ ކެމްޕެއިން ދަތުރުފުޅުގައި ބާއްވާ ބޮޑު ޖަލްސާ ލ. ގަމު ތުނޑީ ބަނދަރު ސަރަހައްދުގައި މިރޭ 21:00 ގައި އޮންނާނެވެ. މި ޖަލްސާގައި ވީހާ ވެސް ގިނަ އަދަދެއްގެ ރައްޔިތުން ބައިވެރިވުމަށް ގުޅިފައިވާ ޕާޓީތަކުން ގޮވާލާފައިވާއިރު، ޖުމްހޫރީ ޕާޓީގެ ބާނީ ގާސިމް އިބްރާހިމްގެ އަނބިކަނބަލުން އަދި އެޕާޓީގެ ކައުންސިލް މެމްބަރު އައިޝަތު ނަހުލާ ބައިވެރިވަޑައިގަންނަވާކަން ފާހަގަކޮށްލެވެ.
އިސްދޫން އިބޫއަށް މަރުޙަބާ ދަންނަވަނީ
ގަމުގައި ބޮޑު ޖަލްސާއަށް ފަހު، އިބޫ ދެން ވަޑައިގަންނަވާނީ އެ އަތޮޅު މާވަށު، މާމެންދޫ، ހިތަދޫ އަދި ފޮނަދޫއަށެވެ. މި ދަތުރުފުޅުގައި އެމްޑީޕީގެ ނާއިބު ރައީސް މުހައްމަދު ޝިފާޒާއި، އަދާލަތު ޕާޓީގެ ނާއިބު ރައީސް އަލީ ޒާހިރާއި، ޖުމްހޫރީ ޕާޓީގެ ނާއިބު ލީޑަރު ޑރ. ހުސެއިން ރަޝީދާއި، ރައްޔިތުންގެ މަޖިލީހުގެ ގަމު ދާއިރާގެ މެމްބަރު ފައްޔާޒު އިސްމާއިލްގެ އިތުރުން މެމްބަރު ރޮޒޭނާ އާދަމާއި، މެމްބަރު އިމްތިޔާޒު ފަހުމީ އަދި މެމްބަރު މުހައްމަދު ވަހީދު (ލޯޔަރު ވައްޑޭ) ބައިވެރިވަޑައިގަންނަވާއެވެ.
