ޑޭވިސް ކަޕް: ބެލްޖިއަމް ބަލިކޮށް ފްރާންސް ޗެމްޕިއަންކަން ހޯދައިފި

ދުނިޔޭގެ ގައުމުތަކުގެ ގައުމީ ޓެނިސް ޓީމުތަކުގެ މެދުގައި ކުޅޭ ޑޭވިސް ކަޕްގެ ޗެމްޕިއަންކަން ފްރާންސްއިން ހޯދައިފިއެވެ.

މި އަހަރުގެ މުބާރާތުގެ ޗެމްޕިއަންކަން ފްރާންސްއިން ހޯދީ ފައިނަލުގައި ތިން މެޗު ދެ މެޗުން ބެލްޖިއަމްގެ ޓެނިސް ޓީމު ބަލިކޮށްގެންނެވެ.

މި މުބާރާތުގެ ފައިނަލްއިން ބެލްޖިއަމް ޖާގަ ހޯދީ ސެމީ ފައިނަލުގައި ތިން މެޗު ދެ މެޗުން އޮސްޓްރޭލިއާ ބަލިކޮށްގެންނެވެ. ހަމައެހެންމެ ފްރާންސްއިން ފައިނަލުގެ ޖާގައެއް ކަށަވަރުކުރީ ސެމީގައި ތިން މެޗު އެއް މެޗުން ސާބިއާ ބަލިކޮށްގެންނެވެ.

ފްރާންސްގެ ލިލޭގައި ހުންނަ 'ސްޓޭޑް ޕިއަ މޮރޯއި'ގައި ކުޅުނު ފައިނަލްގެ ފުރަތަމަ މެޗުގައި ބެލްޖިއަމްގެ ޑޭވިޑް ގޮފިންވަނީ ސީދާ ތިން ސެޓުން ފްރާންސްގެ ލޫކާ ޕުޔީ ބަލިކޮށް އެ ގައުމަށް ލީޑު ނަގައިދީފައެވެ. މި މެޗުގެ ސެޓުތައް ގޮފިން ގެންދިޔައީ 7-5، 6-3 އަދި 6-1 އިންނެވެ.

އެހެން ނަމަވެސް ފްރާންސްގެ ޖޯ ވިލްފްރިޑް ސޮންގާ ވަނީ ސީދާ ތިން ސެޓުން ބެލްޖިއަމްގެ ސްޓީވް ޑާސިސް ބަލިކޮށް އެ ގައުމަށް ފައިނަލްގެ ނަތީޖާ ހަމަހަމަކޮށްދީފައެވެ. މި މެޗުގެ ސެޓުތައް ސޮންގާ ގެންދިޔައީ 6-3، 6-2 އަދި 6-1 އިންނެވެ.

ފައިނަލްގެ ލީޑު ފްރާންސްއަށް ފުރަތަމަ ފަހަރަށް ލިބިގެންދިޔައީ ޑަބަލްސް މެޗު އެ ގައުމުން ކާމިޔާބު ކުރުމުންނެވެ. އެގޮތުން ފްރާންސްގެ ރިޗާޑް ގެސްކުއެޓްއާއި ޕިއާ ހިއުސް ހާބާޓްވަނީ ތިން ސެޓު އެއް ސެޓުން ބެލްޖިއަމްގެ ރުބެން ބެމެލްމަންސްއާއި ޖޯރިސް ޑެލޫގެ ޕެއާ ބަލިކޮށްފައެވެ. މި މެޗުގެ ފުރަތަމަ ސެޓު ފްރާންސްގެ ކުޅުންތެރިން 6-1 އިން ގެންދިޔަ ނަމަވެސް ބެލްޖިއަމްގެ ކުޅުންތެރިން ވަނީ ދެވަނަ ސެޓު 6-3 އިން ގެންގޮސް މެޗުގެ ނަތީޖާ ހަމަހަމަކޮށްފައެވެ. އެހެނަސް ފްރާންސްގެ ކުޅުންތެރިން ވަނީ ފަހުން ކުޅުނު ދެ ސެޓު 7-6 އަދި 6-4 އިން ގެންގޮސް މެޗުގެ ނަތީޖާ ހަމަހަމަކޮށްފައެވެ.

ބެލްޖިއަމްއަށް ޗެމްޕިއަންކަން ލިބޭނެ ކަމުގެ އުއްމީދު އައުވެގެން ދިޔައީ ފައިނަލްގެ ހަތަރު ވަނަ މެޗު ސީދާ ތިން ސެޓުން އެ ގައުމުގެ ގޮފިން ކާމިޔާބުކުރުމުންނެވެ. އެގޮތުން ފްރާންސްގެ ޖޯ ވިލްފްރިޑް ސޮންގާއާއި ދެކޮޅަށް ކުޅުނު މެޗުގެ ސެޓުތައް ގޮފިން ގެންދިޔައީ 7-6، 6-3 އަދި 6-2 އިންނެވެ.

ދެ ޓީމުވެސް އެއްވަރުވެ އޮވެ މުބާރާތުގެ ފަހު މެޗު ކުޅުނުއިރު ފްރާންސްއަށް ޗެމްޕިއަންކަން ލިބިގެންދިޔައީ ފަހު މެޗު ސީދާ ތިން ސެޓުން އެ ގައުމުގެ ލޫކާ ޕުޔީ ކާމިޔާބުކުރުމުންނެވެ. ބެލްޖިއަމްގެ ސްޓީވް ޑާސިސްއާއި ދެކޮޅަށް ކުޅުނު މެޗުގެ ސެޓުތައް ޕުޔީ ގެންދިޔައީ 6-3، 6-1 އަދި 6-0 އިންނެވެ.

މިއީ ޑޭވިސް ކަޕް ބޭއްވި 106 ވަނަ ފަހަރަށްވާއިރު މިއީ ފްރާންސްއިން މި މުބާރާތް ކާމިޔާބުކުރި 10 ވަނަ ފަހަރެވެ. ހަމައެހެންމެ މިއީ 2001 ވަނަ އަހަރުގެ ފަހުން އެ ގައުމުން މި މުބާރާތް ކާމިޔާބުކުރި ފުރަތަމަ ފަހަރެވެ.