ޔުއެފާ ޗެމްޕިއަންސް ލީގުގެ ގަދަ 16 އަށް ކޮލިފައިވުމަށް ލިބުނު ފުރުސަތު ލިވަޕޫލްއިން ގެއްލުވާލައިފިއެވެ.

ޗެމްޕިއަންސް ލީގުގެ ގްރޫޕް 'އީ' ގައި ލިވަޕޫލް އާއި ސެވިއްޔާ ކުޅުނު މެޗު ނިމިފައި ވަނީ 3-3 ގެ ނަތީޖާއަކުން އެއްވަރުވެގެންނެވެ. މި މެޗުން މޮޅުވިނަމަ ލިވަޕޫލްއަށް ގަދަ 16އިން ޖާގަ ލިބޭނެއެވެ. އެހެނަސް މި މެޗު އެއްވަރުވުމާއި ވިދިގެން މި ގްރޫޕުގައި ދެން ކުޅޭ މެޗުން ލިވަޕޫލް އެންމެ މަދުވެގެން ޕޮއިންޓެއް ހޯދައިގެން ފުދޭނެއެވެ.

ދެ ޓީމުގެ ފަރާތުން ވެސް ފޯރިގަދަ ކުޅުމެއް ފެނިގެން ދިޔަ މި މެޗުގައި ލިވަޕޫލްއިން ވަނީ ސެވިއްޔާއަށް ޖަވާބުދޭނެ ފުރުސަތުނުދީ ތިން ލަނޑު ޖަހާފައެވެ. އެގޮތުން މެޗުގެ 2 ވަނަ މިނެޓުގައި ރޮބާޓޯ ފިރްމީނޯގެ ލަނޑުން އެ ޓީމަށް ލީޑު ލިބިގެންދިޔައިރު އެ ޓީމުގެ ދެވަނަ ލަނޑު ފިރްމީނޯ ތަނަވަސްކޮށްދިން ފުރުސަތަކުން މެޗުގެ 22 ވަނަ މިނެޓުގައި ޖަހައިދިނީ ސަދިއޯ މާނޭއެވެ. މެޗުގެ 30 ވަނަ މިނެޓުގައި ލިވަޕޫލްގެ ތިންވަނަ ލަނޑު ވެސް ޖަހައިދިނީ ފިރްމީނޯއެވެ.

ތިން ލަނޑުގެ ލީޑެއްގައި އޮވެ ލިވަޕޫލްއިން ފުރަތަމަ ހާފު ނިންމާލިއިރު ސެވިއްޔާ ދެވަނަ ހާފަށް ނުކުތީ ނަތީޖާ ބަދަލުކޮށްލުމުގެ އަޒުމުގައެވެ. އެގޮތުން 51 ވަނަ މިނެޓުގައި ވިސާމް ބިން ޔަދާރްގެ ލަނޑުން ސެވިއްޔާ ނަތީޖާގެ ފަރަގު ކުޑަކުރިއިރު އެ ޓީމުގެ ދެވަނަ ލަނޑު 60 ވަނަ މިނެޓުގައި ލިބުނު ޕެނަލްޓީއަކުން ވެސް ޖަހައިދިނީ އޭނާއެވެ.

ލިވަޕޫލްގެ ޑިފެންސުން ތަކުރާރުކޮށް ހަދަމުން ދިޔަ ގޯސްތަކުގެ ނަތީޖާއަކަށް ވެގެންދިޔައީ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައި ގުއިޑޯ ޕިޒާރޯ ސެވިއްޔާއަށް ލަނޑެއް ޖަހައިދީ މެޗުގެ ނަތީޖާ ހަމަހަމަ ކޮށްދިނުމެވެ. މި ލަނޑާއެކު ސެވިއްޔާއިން މެޗުން ޕޮއިންޓެއް ހޯދިއިރު އެ ޓީމުން ވަނީ އަމިއްލަ ދަނޑުގައި ބަލިނުވުމުގެ ރެކޯޑު 26 މެޗަށް އިތުރުކޮށްފައެވެ.

މި ގްރޫޕުގެ ދެވަނަ މެޗުގައި ރަޝިއާގެ ސްޕާޓަކް މޮސްކޯއާއި ސްލޮވޭނިއާގެ މަރިބޯ ބައްދަލު ކުރި މެޗު ނިމިފައި ވަނީ 1-1 ގެ ނަތީޖާއަކުން އެއްވަރުވެގެންނެވެ. މި މެޗުގައި ފެނިގެން ދިޔަ ހުރިހާ ލަނޑެއް ވެސް ފެނިގެން ގޮސްފައިވަނީ މެޗުގެ ފަހު 10 މިނެޓުގެ ތެރޭގައެވެ. އެގޮތުން މެޗުގެ 82 ވަނަ މިނެޓުގައި ޒެ ލުއިސްގެ ލަނޑުން ސްޕާޓަކް މޮސްކޯއަށް ލީޑު ލިބިގެންދިޔައިރު މަރިބޯއިން މެޗުގެ ނަތީޖާ ހަމަހަމަކޮށްފައިވަނީ ފުރިހަމަ ވަގުތު ހަމަވެގެން ރެފްރީ ކުޅެން ދެއްކި އިތުރު ވަގުތުގެ ތެރޭގައެވެ. މި ލަނޑު މަރިބޯއަށް ޖަހައިދިނީ ބެންޗުން ކުޅެން އެރި ޖަސްމިން މެސަނޮވިޗްއެވެ.

މި ގްރޫޕުގެ އެއްވަނައިގައި ނުވަ ޕޮއިންޓާއެކު ލިވަޕޫލް އޮތްއިރު ދެވަނައިގައި އަށް ޕޮއިންޓާއެކު އޮތީ ސެވިއްޔާއެވެ. ހަ ޕޮއިންޓާއެކު ތިންވަނައިގައި ސްޕާޓަކް މޮސްކޯ އޮތްއިރު ގްރޫޕުގެ ފުލުގައި ދެ ޕޮއިންޓާއެކު އޮތީ މަރިބޯއެވެ.