ބަލިވެގެން މޮޅުވުން: ފުޓްބޯޅައިގެ ތާރީޚުގައި ކުޅުނު އެންމެ އާދަޔާޚިލާފު މެޗު

ބައެއް ފަހަރު ކުޅިވަރުގެ ގަވާއިދުތައް ހުންނަ ގޮތުން، ބުއްދި ގަބޫލުކުރަން ދަތި ގޮތްގޮތަށް ޓީމުތަކުން އަމަލުކުރަން މަޖުބޫރުވެ އެވެ. އެގޮތުން މޮޅުވުމުގެ ބަދަލުގައި، ގަސްދުގައި ބަލިވާން މަސައްކަތްކުރާ ހާލަތްތައް އާދެ އެވެ.

މިއީ ފުޓްބޯޅައިގެ ތާރީޚުގައި މިހާތަނަށް ކުޅުނު އެންމެ އާދަޔާޚިލާފު މެޗު ކަމަށް ގިނަ ބަޔަކު އެއްބަސްވެ އެވެ. ނަމަވެސް މިއީ މުޅި ދުނިޔެ ނޭވާ ހިފަހައްޓާލައިގެން ބަލަން ތިބި މެޗެއް ނޫނެވެ. އަދި މިއީ ޗެމްޕިއަންކަން ކަނޑައަޅާ ފައިނަލް މެޗެއް ނުވަތަ ޝަރަފުވެރި ތައްޓަކަށް ކުޅުނު މެޗެއްވެސް ނޫނެވެ.

ހަގީގަތުގައި، ބާބަޑޯސް އާއި ގްރެނާޑާ ބައްދަލުކުރި މި މެޗު ފެށުމުގެ ކުރިން ބެލެވުނީ، މިއީ 1994 ވަނަ އަހަރުގެ ކެރީބިއަން ކަޕަށް ކޮލިފައިވާނެ ޓީމެއް ކަނޑައެޅުމަށް ކުޅޭ އާދައިގެ މެޗެއްގެ ގޮތުގަ އެވެ.

މެޗުގެ 83 ވަނަ މިނެޓާ ހަމައަށް ބާބަޑޯސް އޮތީ 2-0 އިން ކުރީގަ އެވެ. ނަމަވެސް އެ ވަގުތު ގްރެނާޑާއިން ލަނޑެއް ޖަހައި ނަތީޖާގެ ފަރަގު ކުޑަކުރި އެވެ. އޭގެ ކުޑަ އިރުކޮޅެއް ފަހުން، ބާބަޑޯސްގެ ކުޅުންތެރިން ބޯޅަ ހޯދައި ޑިފެންޑަރު ޓެރީ ސީލީއަށް ދިނެވެ. ސީލީ އާއި ގޯލްކީޕަރު ހޮރޭސް ސްޓައުޓް ބޯޅަ ބަދަލުކުރުމަށްފަހު، ސީލީ ވަނީ ގަސްދުގައި އަމިއްލަ ގޯލަށް ބޯޅަ ފޮނުވާލައި ނަތީޖާ 2-2 އަށް ބަދަލުކޮށްލާފަ އެވެ.

މެޗުގެ ކަންތައްތައް މިއަށްވުރެ ބޮޑަށް އޮޅުންބޮޅުންވީ ދެން ކަންތައް ހިނގި ގޮތުންނެވެ. ގްރެނާޑާގެ ކުޅުންތެރިންވެސް ބާބަޑޯސްއިން ކަންތައް ކުރި ގޮތަށް، ގަސްދުގައި އަމިއްލަ ގޯލަށް ލަނޑެއް ޖަހަން މަސައްކަތް ކުރި އެވެ. ނަމަވެސް ބާބަޑޯސްގެ ކުޅުންތެރިން ވަނީ ގްރެނާޑާގެ ކުޅުންތެރިން އަމިއްލަ ގޯލަށް ލަނޑު ޖެހިޔަނުދީ ހުރަސްއަޅާފަ އެވެ. އެއާއެކު ގްރެނާޑާގެ ކުޅުންތެރިން ދެން މަސައްކަތް ކުރީ ބާބަޑޯސްގެ ގޯލަށް ލަނޑެއް ޖެހޭތޯ އެވެ. އެކަމަކު އެކަމަށްވެސް ބާބަޑޯސްގެ ކުޅުންތެރިން ހުރަސްއެޅި އެވެ.

މެޗުގެ ފުރިހަމަ ވަގުތު ހަމަވިއިރު، ދެ ޓީމުންވެސް ދިޔައީ ދެ ގޯލަށްވެސް ލަނޑު ޖެހޭތޯ މަސައްކަތް ކުރަމުންނެވެ. ނަމަވެސް އިތުރު ވަގުތުގެ ކުޅުން ފެށުމާއެކު މެޗުގެ އާދައިގެ ފޯމެޓަށް ކުޅުން ބަދަލުވެ، ބާބަޑޯސްއިން "ގޯލްޑަން ގޯލް" އެއް ޖަހައި މެޗު ކާމިޔާބު ކުރި އެވެ.

މިހާ އާދަޔާޚިލާފު ކަންތައްތަކެއް ހިނގަން މެދުވެރިވީ ކީއްވެގެން؟

މުބާރާތުގެ ކޮލިފައިން ބުރު ފޯރިގަދަ ކުރުމުގެ ގޮތުން އިންތިޒާމުކުރާ ފަރާތުން އޮތީ މެޗެއް އެއްވަރުވެގެން ނުވާނެ ކަމަށް ނިންމާފަ އެވެ. މެޗުގެ ފުރިހަމަ ވަގުތު ހަމަވާއިރު ނަތީޖާ އެއްވަރުވެފައި އޮތް ނަމަ، އިތުރު ވަގުތު ކުޅެން ޖެހެ އެވެ. އަދި އިތުރު ވަގުތުގައި ޖަހާ ފުރަތަމަ ލަނޑު ނުވަތަ "ގޯލްޑަން ގޯލް" އަކީ ދެ ލަނޑުގެ ގޮތުގައި ބަލާނެ ކަމަށް ގަވާއިދުގައި އޮތެވެ. މިއީ މާ ބޮޑު ތަފާތެއް އަންނާނެ ކަމެއް ކަމަށް ކުރިން ބެލެވިފައި ނެތް ނަމަވެސް، މުޅި މެޗުގެ ނަތީޖާ ބަދަލުކޮށްލީ މި ގަވާއިދެވެ.

މި ހުރިހާ ކަމެއް ގުޅިފައިވަނީ ކޮލިފައިން ގްރޫޕުގެ ކުރީގެ މެޗުތަކުގެ ނަތީޖާއާ އެވެ. ޕުއެރްޓޯ ރިކޯ އިން ވަނީ 1-0 އިން ބާބަޑޯސް ބަލިކޮށްފަ އެވެ. ނަމަވެސް ގްރެނާޑާ އަތުން 2-0 އިން ޕުއެރްޓޯ ރިކޯ ވަނީ ބަލިވެފައެވެ. މުބާރާތަށް ކޮލިފައިވަނީ ގްރޫޕުގެ އެއްވަނަ ޓީމު ކަމަށްވުމުން، ލަނޑުގެ ތަފާތުން ޕުއެރްޓޯ ރިކޯ އޮތީ މުބާރާތުން ކަޓާފަ އެވެ.

އެހެންކަމުން، ބާބަޑޯސްއަށް މުބާރާތަށް ކޮލިފައިވުމުގެ ހަނި ފުރުސަތެއް އޮތެވެ. އެއީ މަދުވެގެން ދެ ލަނޑުގެ ތަފާތުން ގްރެނާޑާ ބަލިކޮށްގެންނެވެ. އެހެންވެއްޖެ ނަމަ، ޕޮއިންޓާއި ލަނޑުގެ ތަފާތުން ގްރެނާޑާއަށްވުރެ ކުރި ހޯދައިގެން ބާބަޑޯސްއަށް ތާވަލުގެ އެއްވަނަ ލިބޭނެ އެވެ.