ޓޭލާ ސުވިފްޓާއި ޓްރެވިސް ކެލްސީ ކައިވެނިކޮށްފި
ނިއުޔޯކްގެ މެޑިސަން ސްކުއެރ ގާޑަންގައި ބޭއްވި މި ކުލަގަދަ ކައިވެނީގެ ރަސްމިއްޔާތުގައި ދުނިޔޭގެ މަޝްހޫރު ގިނަ ތަރިންތަކެއް ބައިވެރިވެފައިވާއިރު، މި ހަފުލާއާ ގުޅިގެން އެ ސަރަހައްދުގެ ސަލާމަތީ ކަންކަން ވަނީ ވަރަށް ބޮޑަށް ވަރުގަދަކޮށްފައި. މި އުފާވެރި މުނާސަބަތާ ގުޅުވައިގެން އެ ދެމަފިރިން ވަނީ އެކި ޗެރިޓީތަކަށް 26 މިލިއަން ޑޮލަރު ހަދިޔާކޮށްފައި. 2023 ވަނަ އަހަރުން ފެށިގެން ލޯބީގެ ގޮތުން ގުޅިގެން އުޅޭ މި ދެ ތަރިންގެ ކައިވެންޏަކީ އެމެރިކާގެ މީޑިއާތަކުން "ރޯޔަލް ވެޑިން" އެއްގެ ގޮތުގައި ސިފަކުރާ ބޮޑު ހަފުލާއެއް.
ނިއުޔޯކް ނިކްސް އާއި ކްލީވްލޭންޑް ކެވެލިއާސް ބައްދަލުކުރި އެމެރިކަން ފުޓްބޯލް ފޯރިގަދަ މެޗު ބަލާލުމަށް މަޝްހޫރު ލަވަކިޔުންތެރިޔާ ޓޭލާ ސުވިފްޓާއި ކެންސަސް ސިޓީ ޗީފްސްގެ ކުޅުންތެރިޔާ ޓްރެވިސް ކެލްސީ އެކުގައި ބައިވެރިވަނީ. | އޭއެފްޕީ
ދުނިޔޭގެ މަޝްހޫރު ޕޮޕް މިއުޒިކް ތަރި ޓޭލާ ސުވިފްޓާއި އެމެރިކަން ފުޓްބޯޅަ ކުޅުންތެރިޔާ ޓްރެވިސް ކެލްސީ ކައިވެނިކޮށްފި ކަމަށް ލަވަކިޔުންތެރިޔާގެ ޕަބްލިސިސްޓް ހުކުރު ދުވަހު އިއުލާންކޮށްފި އެވެ. ތިން އަހަރުވީ ލޯބީގެ ގުޅުމަށްފަހު މި ދެ ތަރިން ކައިވެނިކޮށްފައިވަނީ ނިއުޔޯކްގެ މެޑިސަން ސްކުއެރ ގާޑަންގައި ބޭއްވި ކުލަގަދަ ހަފުލާއެއްގަ އެވެ.
މެންހަޓަންގެ ކުޅިވަރު އެރީނާގެ ބޭރުގައި ހަރުކޮށްފައިވާ ބޮޑެތި ސްކްރީންތަކުން "ޖަސްޓް މެރިޑް" ނުވަތަ ކައިވެނިކޮށްފިކަން އަންގައިދޭ ލިޔުންތައް ވަނީ ދައްކާލާފައެވެ. ގްރެމީ އެވޯޑް ހާސިލްކޮށްފައިވާ ޓޭލާ ސުވިފްޓާއި ކެންސަސް ސިޓީ ޗީފްސްގެ ތަރި ކެލްސީ ކައިވެނިކޮށްފައިވާކަން ސުވިފްޓްގެ ޕަބްލިސިސްޓް ވަނީ އީމެއިލް މެދުވެރިކޮށް ކަށަވަރުކޮށްދީފަ އެވެ.
"ޓޭލާ ސުވިފްޓް އެންޑް ޓްރެވިސް ކެލްސީ އާ މެރިޑް!" މި ސުރުޚީގެ ދަށުން ޕަބްލިސިސްޓް ނެރުނު ބަޔާނުގައިވާ ގޮތުން، ކައިވެނީގެ ރަސްމިއްޔާތު ކުރިއަށް ގެންގޮސްދިނީ މަޝްހޫރު ކޮމެޑީ އެކްޓަރު އެޑަމް ސޭންޑްލާ އެވެ. އެ ބަޔާނުގައި ސޭންޑްލާ ސިފަކޮށްފައިވަނީ އެ ދެމަފިރިންގެ ގާތް އެކުވެރިއެއްގެ ގޮތުގަ އެވެ.
މި ކައިވެނީގެ ހަފުލާގައި ސުވިފްޓްގެ ކޮއްކޮ އޮސްޓިން ސުވިފްޓް "މޭން އޮފް އޮނާ" ގެ ގޮތުގައި ބައިވެރިވިއިރު، ކެލްސީގެ ބޭބެ އަދި ކުރީގެ ފުޓްބޯޅަ ތަރި ޖޭސަން ކެލްސީ ހުރީ "ބެސްޓް މޭން" ގެ ގޮތުގަ އެވެ.
ބަޔާނުގައިވާ ގޮތުން ކައިވެނީގެ ހަފުލާގައި ދެމަފިރިންވެސް ތިބީ މަޝްހޫރު ފެޝަން ބްރޭންޑް "ކްރިސްޓިއަން ޑިއޯ" އިން ފަރުމާކޮށްފައިވާ ހެދުންތަކުގަ އެވެ.
ހޫނުމިން 38 ޑިގްރީ ސެލްސިއަސް އަށްވުރެ މަތީގައި ހުރި މި ހޫނު ދުވަހު، ޖެނިފާ ލޮޕޭޒް، އެޑް ޝީރަން، އީތަން ހޯކް، ޖިމީ ފެލަން އަދި އެބީ ވަމްބަކް ފަދަ މަޝްހޫރު ތަރިން މެޑިސަން ސްކުއެރ ގާޑަންއަށް ވަންނަނިކޮށް ނޫސްވެރިންނަށް ވަނީ ފެނިފަ އެވެ.
"އެމެރިކާގެ ރޯޔަލް ވެޑިން" ގެ ގޮތުގައި ސިފަކުރެވޭ މި ކައިވެނީގެ ހަފުލާއަށް އަންނަ މަޝްހޫރު ފަރާތްތައް ދެކިލުމަށް، ސުވިފްޓްގެ ފޭނުން ނުވަތަ "ސުވިފްޓީސް" ވަނީ އެ ސަރަހައްދަށް ޖަމާވެފަ އެވެ. ކައިވެންޏަށް ނިއުޔޯކްގެ ކާރޫބާރޫ ބޮޑު މި ސަރަހައްދުގައި ސަލާމަތީ ކަންކަން ވަނީ ވަރަށް ވަރުގަދަކޮށްފަ އެވެ.
ސުވިފްޓްގެ ލަވަތަކަކީ އޭނާގެ ލޯބީގެ ގުޅުންތަކާއި ވަކިވުންތަކުގެ މައްޗަށް ބިނާކޮށްފައިވާ ލަވަތަކަކަށް ވާއިރު، ކައިވެންޏަށްފަހު ނެރޭ އަލްބަމްތަކަށް އިންތިޒާރުކުރާ ކަމަށް އެ ސަރަހައްދަށް އައިސްހުރި ފޭން އަކު ބުންޏެވެ. "އަހަރެން ގަބޫލުކުރަނީ މި ކައިވެންޏާ ގުޅޭގޮތުން އޭނާ ވަރަށް ރީތި ލަވަތަކެއް ލިޔާނެ ކަމަށް،" އޭނާ ބުންޏެވެ.
މި ބޮޑު ހަފުލާއަށް ތައްޔާރުވުމުގެ ގޮތުން، މި ހަފުތާގެ ފާއިތުވި ދުވަސްތަކުގައި މެންހަޓަންގެ މި މަޝްހޫރު އެރީނާއަށް ކާބޯތަކެއްޗާއި ސެޓް ތައްޔާރުކުރާ ސާމާނު އުފުލުމުގައި މަސައްކަތްތެރިން ވަނީ ގިނަ ވަގުތުތަކެއް ހޭދަކޮށްފަ އެވެ. އެމްޕަޔަރ ސްޓޭޓް ބިލްޑިންގްގެ ސޯޝަލް މީޑިއާ އެކައުންޓުން ބުނި ގޮތުގައި، ކައިވެނީގައި ނޫކުލަ ބޭނުންކުރުމަކީ ނަސީބުވެރި ކަމެއްގެ ގޮތުގައި ބެލެވޭތީ، ހުކުރު ދުވަހުގެ ހަވީރު އެ އިމާރާތުގެ މަތީގައިވާ ބައްތިތައް ފަނޑު ނޫކުލައަކަށް ބަދަލުކުރުމަށް ވަނީ ހަމަޖެހިފަ އެވެ.
އެމެރިކާގެ މީޑިއާތަކުން ރިޕޯޓްކޮށްފައިވާ ގޮތުގައި، އިނގިރޭސިވިލާތުގެ އިސްތިއުމާރުން މިނިވަންވިތާ 250 އަހަރު ފުރޭ މުނާސަބަތާ ދިމާކޮށް އައި ބަންދު ދުވަސްތަކުގެ ފެށުމުގައި، މި ދެމަފިރިން ވަނީ 1،000 މީހުންނަށް ކޮކްޓެއިލް ހަފުލާއެއް ބާއްވާފަ އެވެ. އަދި މި ހަފުތާގެ ތެރޭގައި ނިއުޔޯކާއި އެހެނިހެން ސިޓީތަކުގެ އެކި ޗެރިޓީތަކަށް 26 މިލިއަން ޑޮލަރު ހަދިޔާކޮށްފައިވާ ކަމަށް ބުރާސްފަތި ދުވަހު ޕަބްލިސިސްޓް މެދުވެރިކޮށް އެ ދެމަފިރިން ވަނީ ހާމަކޮށްފަ އެވެ.
މި ދެމަފިރިންގެ ލޯބީގެ ވާހަކަ ފެށުނީ 2023 ވަނަ އަހަރު އެވެ. އެއީ ސުވިފްޓްގެ ކޮންސެޓެއްގެ ބެކްސްޓޭޖުން އޭނާއާ ބައްދަލުކުރަން ކެލްސީ ކުރި މަސައްކަތް ނާކާމިޔާބުވުމުން، އެކަމުގެ މާޔޫސްކަން ޕޮޑްކާސްޓެއްގައި ކިޔައިދިނުމާ ގުޅިގެން ސުވިފްޓްގެ ސަމާލުކަން އެކަމަށް ހުއްޓުނު ހިސާބުންނެވެ.
މި ދެމަފިރިންގެ އުމުރަކީވެސް 36 އަހަރެވެ. ގުޅުން ބަދަހިވަމުން ދިޔަވަރަކަށް، ސުވިފްޓްގެ ކޮންސެޓްތަކާއި، ކެލްސީ ކުޅޭ ކެންސަސް ސިޓީ ޗީފްސްގެ މެޗުތަކުންނާއި، "ސަޓަޑޭ ނައިޓް ލައިވް" ޝޯއިން މި ދެމީހުން އެކުގައި ފެންނަން ފެށި އެވެ. އަދި 2025 ވަނަ އަހަރުގެ އޮގަސްޓް މަހު އިންސްޓަގްރާމް މެދުވެރިކޮށް އެންގޭޖްމަންޓް އިއުލާންކުރީ "ތިޔަބޭފުޅުންގެ އިނގިރޭސި ޓީޗަރާއި ޖިމް ޓީޗަރު ކައިވެނިކުރަނީ" ކަމަށް ބުނެ އެވެ.
ދުނިޔޭގައި މިހާތަނަށް އުފެދުނު އެންމެ ކާމިޔާބު މިއުޒީޝަނުންގެ ތެރޭގައި ހިމެނޭ، "ލަވް ސްޓޯރީ" އަދި "ޝޭކް އިޓް އޮފް" ފަދަ މަޝްހޫރު ލަވަތަކުގެ ވެރިޔާ ސުވިފްޓް ވަނީ 14 ގްރެމީ އެވޯޑް ހާސިލްކޮށްފަ އެވެ. އަދި އޭނާގެ ދުނިޔޭގެ ކޮންސެޓް ދަތުރުތަކުން ރެކޯޑްތައް މުގުރާލައި، އޭނާ ވަނީ ބިލިއަނަރަކަށް ވެފަ އެވެ.
ނޭޝަނަލް ފުޓްބޯލް ލީގު (NFL) ގެ އެންމެ މަޝްހޫރު އެއް ކުޅުންތެރިޔާ ކަމަށްވާ ކެލްސީ ވަނީ، މަޝްހޫރު ކުއާޓަރބެކް ޕެޓްރިކް މަހޯމްސްއާއެކު ކެންސަސް ސިޓީ ޗީފްސްއަށް ތިން ސުޕަ ބޯލް ކާމިޔާބުކޮށްދިނުމުގައި އެހީތެރިވެދީފަ އެވެ. މީގެ އިތުރުން އޭނާއަކީ މަގުބޫލު ޕޮޑްކާސްޓެއް ކަމަށްވާ "ނިއު ހައިޓްސް" ގެ ކޯ-ހޯސްޓްވެސް މެއެވެ.
ކެލްސީ އެންމެ ފުރަތަމަ ސުވިފްޓާ ބައްދަލުކުރަން މަސައްކަތް ކުރީ، ސުވިފްޓްގެ "އެރާސް ޓުއާ" ގެ ތެރެއިން ކެންސަސް ސިޓީގެ އެރޯހެޑް ސްޓޭޑިއަމްގައި ބޭއްވި ކޮންސެޓަށްފަހު އެވެ. ނަމަވެސް ސަލާމަތީ ސަބަބުތަކަށްޓަކައި އެކަން ކާމިޔާބު ނުވުމުން، އޭނާގެ ފޯނު ނަންބަރު ޖަހާފައިވާ ރަހުމަތްތެރިކަމުގެ އަތުގައި އަޅާ އުޅަލެއް ސުވިފްޓަށް ނުދެވުމުން "ދެރަވި" ކަމަށް އޭނާގެ ޕޮޑްކާސްޓްގައި ބުނެފައިވެ އެވެ.
މިކަމާ ގަޔާވިކަން ހާމަކުރަމުން ސުވިފްޓް ފަހުން "ނިއު ހައިޓްސް" ގެ އެޕިސޯޑެއްގައި ބުނީ، ކެލްސީގެ އެ އަމަލުން އޭނާއަށް ހަނދާންވީ 80 ގެ އަހަރުތަކުގެ ފިލްމެއްގެ މަންޒަރެއް ކަމަށެވެ.
