ދެ އަހަރު ތެރޭގައި 3 ވަޒީރުން އައްޔަނުކޮށްފި، ރާއްޖޭގެ ޚާރިޖީ ސިޔާސަތު ވަނީ ފެއިލްވެފައި: އަމީތު

މި ސަރުކާރަށް 2 އަހަރުވެގެން ދިޔަ އިރު ޚާރިޖީ ވަޒީރު ކަމަށް ތިން މީހުން އައްޔަނު ކޮށްފައިވާ ކަމަށާއި ރާއްޖޭގެ ޚާރިޖީ ސިޔާސަތަކީ ފެއިލްވެފައިވާ ސިޔާސަތެއް ކަމަށް  ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެންބަރު މުހައްމަދު އަމީތު ވިދާޅުވެއްޖެ އެވެ. 

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން އަމީތު ވިދާޅުވީ ރާއްޖެއަކީ މާލީ ގޮތުން ބަލާއިރު ބޭރުގެ ގައުމުތަކަށް ވަރަށް ބޮޑަށް ބަރޯސާވާން ޖެހިފައިވާ ގައުމެއް ކަމަށާއި ފުރިހަމަ މިނިވަން ދައުލަތެއްގެ ގޮތުގައި އޮތް ނަމަވެސް މާލީ ތަނަވަސްކަން ހުރި ގޮތަށް ބަލާއިރު ދިމާވާ ކާރިސާތަކުގައި އާއި ބަޖެޓްރީ ސަޕޯޓަށް ބަލާއިރު ބޭރުގެ ޖަމިއްޔާތަކާ އެކުވެރި ދައުލަތްތަކުގެ އެހީތެރިކަން ވަރަށް ބޮޑަށް ބޭނުންވާ ކަމަށެވެ. 

އަމީތު ވިދާޅުވީ އެގޮތުން ބަލާއިރު ރާއްޖޭގެ ޚާރިޖީ ސިޔާސަތަކީ ފަސްޓް ލައިން އޮފް ޑިފެންސް ކަމަށް ބުނެވިދާނެ ކަމަށެވެ. އޭނާ ވިދާޅުވީ ޚާރިޖިީ ސިޔާސަތުގެ ކާމިޔާބީ ވަޒަން ކުރެވޭނީ ރާއްޖެއަށް ކުރިމަތިވާ ހާލަތްތަކުގައި އެހެން ގައުމުތަކުން އެހީތެރިކަން ހޯދޭ ނިސްބަތަށް ބަލައިގެން ކަމަށެވެ. ނުވަތަ ތަރައްގީ އަށް ބޭރުގެ އެހީތެރިކަން ހޯދޭ މިންވަރަށް ބަލައިގެން ކަމަށެވެ.

މި ނަޒަރިއްޔާއިން މިންކުރާ ނަމަ މިއަދު ރާއްޖޭގެ ޚާރިޖީ ސިޔާސަތަކީ ފެއިލްވެފައިވާ ސިޔާސަތެކޭ ދެންނެވިދާނެ ކަމަށް އޭނާ ވިދާޅުވި އެވެ. 

ރައީސް މުއިއްޒުގެ ވެރިކަމަށް ދެ އަހަރު ފާއިތުވެގެން ދިޔަ އިރުގައި ބޭރުގެ ގައުމެއްގެ އެހީތެރިކަން ހޯދައިގެން އަޅުގަނޑުމެންނަށް މިހާތަނަށް ހިންގުނު ބޮޑެ އެއްވެސް ޕްރޮޖެކްޓެއް ފެންނާކަަށް ނެތް. ކަންދިމާކުރާ ގޮތުން ދިވެހިރާއްޖެ މި ޖެހިނީ ވަށައިގެން މި ވާ ބައެއް ބޮޑެތި ގައުމުތަކުގެ ވާގިވެރިކަމާއެކުގައި އަޅުގަނޑުމެން ސަވައިވް ވާން މި ޖެހެނީ. އޭގެ ނަތީޖާ އަކަށް ވެގެންދަނީ ވަރަށް ވިސްނުންތެރި ކަމާ، ސްޓްރީޖިކަލީ ގޮތުން މޮޅަށް މި ސިޔާސަތު ބައްޓަން ނުކުރެވިއްޖެ ނަމަ އޭގެ ނޭދެވޭ އަސަރު އަޅުގަނޑުމެންނަށް ވަރަށް ބޮޑަށް ކުރާނެ. 

ރައްޔިތުންގެ މަޖިލީހުގެ މަޑުއްވަރީ ދާއިރާގެ ކުރީގެ މެންބަރު މުހައްމަދު އަމީތު

އަމީތު ވިދާޅުވީ މުވައްޒަފުންނަށް މުސާރަ ދެވުނެއް ކަމަކު ރާއްޖޭގެ އިގްތިސާދު އޮތީ ބަނގުރޫޓުވެފަ ކަމަށެވެ. ބޮޑު އެއްވެސް ޕްރޮޖެކްޓެއް ރާއްޖޭގެ އެއްވެސް ރަށެއްގައި ކުރިއަކަށް ނުދާ ކަމަށާ ކޮންމެ އަހަރެއް ނިމިގެންދާއިރު ބަޖެޓް އޮންނަނީ ޑެފިސިޓްވެފަ ކަމަށެވެ.

އަހަރެއް ނިމުމަށް ފަހު އައު އަހަރަކަށް ބަޖެޓް އެކުލަވާލާއިރު ބޭރުގެ އެހީތައް ލިބޭނެ ކަމަށް، އަދި މިލިއަނުން ޑޮލަރު ލިބޭނެ ކަމަށް އެބޭފުޅުން ލިޔުއްވި ނަމަވެސް އެ އެހީތަކެއް ނުލިބޭ ކަމަށާ އޭގެ މާނައަކީ ރާއްޖޭގެ ޚާރިޖީ ސިޔާސަތު ތަންފީޒު ކުރެވިގެން ދަނީ އެންމެ ރަނގަޅަކަށް ނޫން ކަން ކަމަށް އަމީތު ވިދާޅުވި އެވެ. 

ޚާރިޖީ ވަޒީރަކީ އެހާ އަވަހަށް ބަދަލުވާ ބޭފުޅަކަށް ވާނަމަ އެގައުމެއްގެ ޚާރިޖީ ސިޔާސަތު ރަނގަޅު ނުވާނެ ކަމަށް އަމީތު ވިދާޅުވި އެވެ. އެއީ އެ ދާއިރާގައި މަސައްކަތް ކުރައްވާ ބޭފުޅުން ނުވަތަ ވަޒީރުން މަސައްކަތް ކުރައްވަނީ ގައުމުތަކާއެކު އުފައްދާ ގުޅުމުގެ ތެރެއިން ކަމަށް ވާތީ ކަމަށާ ގައުމުތަކުގެ ވެރިންނާ އަދި ޚާރިޖީ ވަޒީރުންނާ އިސް ބޭފުޅުންނާ ގުޅުމެއް ގާއިމް ކުރެވިގެންނޫން ގޮތަކަށް ރަނގަޅު ޚާރިޖީ ސިޔާސަތެއް ގާއިމެއް ނުކުރެވޭނެ ކަމަށް އޭނާ ވިދާޅުވި އެވެ. 

އަމީތު ވިދާޅުވީ 2 އަހަރު ފާއިތުވެގެން ދިޔައިރު 3 ޚާރިޖީ ވަޒީރުން އައްޔަނުކޮށްފައިވާ އިރު އޭގެ މާނައަކީ ރާއްޖޭގެ ޚާރިޖީ ސިޔާސަތު ރަނގަޅު ނޫން ކަން ކަމަށެވެ.