ސްޕެޝަލިސްޓް ހިދުމަތްތަކާއި، ލެބޯޓަރީއާއި މޮޅު ޑޮކްޓަރުންގެ ހިދުމަތާއެކު "ސްޓާ މެޑިކަލް" ގެ ނަމުގައި އައު ކްލިނިކެއް ހުޅުވައިފި
މ. ގޯލްޑެން ޓަވަރުގައި ހުޅުވި "ސްޓާ މެޑިކަލް" އިން އާސަންދައިގެ ޚިދުމަތާއެކު ސްޕެޝަލިސްޓް ޑޮކްޓަރުންނަށް ދެއްކުމާއި، ލެބޯޓަރީ، ސްކޭން އަދި އެކްސްރޭގެ ޚިދުމަތް ލިބޭނެއެވެ. މި ކްލިނިކަކީ ނުކުޅެދުންތެރިކަން ހުންނަ ފަރާތްތަކަށް ފަސޭހައިން ޚިދުމަތް ހޯދޭނެ ގޮތަށް ފަރުމާކޮށްފައިވާ ތަނެއް ކަމުން، ކޮންމެ ދުވަހެއްގެ ހެނދުނު 8 އިން ރޭގަނޑު 11 އަށް އެ ތަނުން ފަރުވާ ހޯދޭނެއެވެ. މީގެ އިތުރުން މާބަނޑު މީހުންނަށް ޚާއްޞަ އެން.އެސް.ޓީ ޓެސްޓާއި ނަރުހުންގެ އެކި ޚިދުމަތްތައް ވެސް މި ކްލިނިކުން ފޯރުކޮށްދެއެވެ.
ސްޓާ މެޑިކަލް ކްލިނިކް، މިތަނުން ސްޕެޝަލިސްޓް ހިދުމަތްތަކުގެ އިތުރުން އާންމު ހިދުމަތްތައް ވެސް ލިބޭ. | ރާއްޖެ އެމްވީ
ސްޕެޝަލިސްޓް ހިދުމަތްތަކާއި، ލެބޯޓަރީއާއި ރާއްޖޭގައި ފާހަގަކޮށްލެވޭ މޮޅު ޑޮކްޓަރުންގެ ހިދުމަތާއެކު "ސްޓާ މެޑިކަލް" ގެ ނަމުގައި އައު ކްލިނިކެއް ހުޅުވައިފި އެވެ.
ސްޓާ ކްލިނިކް ހުޅުވައިދެއްވީ މިނިސްޓަރ އޮފް ޔޫތު އެމްޕަވަރމަންޓް، ސްޕޯޓްސް އެންޑް ފިޓްނަސް އަބްދުﷲ ރާފިއު އެވެ. ކްލިނިކާއި ގުޅޭގޮތުން ރާއްޖެއެމްވީއާއި ވާހަކަ ދައްކަވަމުން އެ ކްލިނިކްގެ ނަރުހެއް ކަމަށްވާ ފާތިމަތު ފަރީމާ ވިދާޅުވީ ސްޓާ މެޑިކަލްއިން ދޭ ޚިދުމަތްތަކުގެ ތެރޭގައި ޚާއްޞަ ބަލިތަކުގެ ފަރުވާ ހިމެނޭ ކަމަށެވެ. އެގޮތުން އަންހެނުންގެ ހާއްސަ ބަލިތަކާއި، އެތެރެހަށީގެ ބަލިތަކާއި، ކުޑަކުދިންގެ ހާއްސަ ޑޮކްޓަރުން ކްލިނިކުން ބައްލަވާނެ ކަމަށެވެ. އޭގެ އިތުރުން ޢާއްމު ބަލިތަކުގެ ޑޮކްޓަރުންވެސް ކްލިނިކުން ބައްލަވާނެ ކަމަށެވެ. އެގޮތުން މެޑިކަލް ހެދުމާއި، ލެބޯޓަރީގެ ހިދުމަތާއި، ސްކޭންގެ ހިދުމަތުގެ އިތުރުން އެކްސްރޭގެ ޚިދުމަތް މިހާރުން ފެށިގެން ކްލިނިކުން ލިބެން ހުންނާނެ ކަމަށެވެ.
ފަރީމާ ވިދާޅުވީ އައު ހިދުމަތްތައް އަދި ތައާރަފް ކުރަމުންދާނެ ކަމަށެވެ. އަދި އެ މައުލޫމާތުތައް ސޯޝަލް މީޑިއާ މެދުވެރިކޮށް ހާމަކުރަމުންދާނެ ކަމަށެވެ.
އަންހެނުންގެ ވަރަށް ޚާއްޞަ ޓެސްޓްތައް، މިސާލަކަށް މާބަނޑު ދުވަސްވަރު ދަރިފުޅުގެ ތޮޅުން ނުވަތަ ދަރިފުޅުގެ ވިންދު ހުންނަ ވަރު ބެލުމުގެ ޓެސްޓް ހެދުން. ދެން ވަރަށް ކުދިކުދި އާދައިގެ ޚިދުމަތްތަކުގެ ތެރޭގައި ލޭގެ ޕްރެޝަރ ބަލައިލަދިނުން، ހަކުރު ބަލައިލަދިނުން، އަދި އޭގެއިތުރުން އިންޖެކްޝަން ޖެހުމާއި ބޭސް އެޅުން، ނެބުލައިޒްކުރަން މިފަދަ ކަންތައްތައްވެސް އަޅުގަނޑުމެންގެ މި ޚިދުމަތްތަކުގެ ތެރޭގައި ހިމެނޭނެ. މުޅިން އަލަށް އަޅުގަނޑުމެންގެ ޚިދުމަތް ފަށައިގަނެގެން މި ދަނީ. މި ތަނުގައި ޚާއްޞަ ކަންތައްތަކުގެ ތެރޭގައި މި ހިމެނެނީ އެކްސްރޭ ނެގުން، ސްކޭން ހެދުން، ދެން އޭގެއިތުރުން ވެސް މި ދެންނެވި ކަހަލަ ނޮން ސްޓްރެސިންގ ޓެސްޓް އެން.އެސް .ޓީ މި ކިޔަނީ. އެއީ މާބަނޑު ދުވަސްވަރު ހަދާ ޚާއްޞަ ޓެސްޓުތަކެއް އެއީ. މިފަދަ ޓެސްޓުތައް ހެދިގެންދާނެ. ދެން ލެބޯޓްރީގެ ޚިދުމަތްތަކީވެސް ހަމަ މި ތަނުގައި ދެވިގެންދާނެ ހިދުމަތްތަކެއް.ފާތިމަތު ފަރީމާ
ފަރީމާ ވިދާޅުވީ ކްލިނިކް ރަސްމީކޮށް ހުޅުވިގެން ދިޔައީ ހޯމަ ދުވަހު ކަމަށެވެ. އަދި ކޮންމެ ދުވަހެއްގެ ހެނދުނު 8 އިން ފެށިގެން ރޭގަނޑު 11 ޖަހަން ދެން ކްލިނިކް ހުޅުވިފަ ހުންނާނެ ކަމަށެވެ. އަދި ކްލިނިކަށް އެޕޮއިންޓްމަންޓް ހެދުމަށް ވެސް ފޯނުން ގުޅާލައިގެން ނުވަތަ އެސް.އެމް.އެސް މެދުވެރިކޮށް ވެސް ހަމަ އެޕޮއިންޓްމަންޓް ހެދޭނެ ކަމަށެވެ.
އޭނާ ވިދާޅުވީ ޚިދުމަތްތައް ވީހާވެސް ލުއި ފަސޭހަކުރުމަށްޓަކައި އާއްމުންގެ އެއްބާރުލުން ވެސް ބޭނުންވާ ކަމަށެވެ. އެގޮތުން ކްލިނިކުން ރަނގަޅުކުރަން ހުންނަ ކަންތައްތައް ފީޑްބެކްގެ ގޮތުގައި ދިނުމުން އެކަންކަން ބަލައިގަންނާނެ ކަމަށެވެ.
ހުޅުވާލީ ހަމަ އާސަންދައިގެ ޚިދުމަތާ އެކުގައި މިތަން. ދެން އަޅުގަނޑު އުންމީދުކުރަނީ ހަމަ ޚިދުމަތް ހޯއްދަވައި ބޭފުޅުންނަށް ވެސް ވަރަށް ލުއިފަސޭހަކަމާއެކުގައި މިތަނުން ޚިދުމަތްތައް ލިބޭނެކަމަށް. އަޅުގަނޑުމެންގެ މި ޚާއްޞަ ޑޮކްޓަރުންނަކީ ހަމަ ރާއްޖޭގައި ވަރަށް ބަލައިގަންނަ ޑޮކްޓަރުން، މިސާލަކަށް އަންހެނުންގެ ޑޮކްޓަރުން، ކުޑަކުދިންގެ ޑޮކްޓަރުން. މި ޑޮކްޓަރުންނަކީ ހަމަ ރާއްޖޭގައި ވަރަށް ތަޖުރިބާކާރު ޚިދުމަތްތެރިން. އެހެންވީމާ، އާ ޑޮކްޓަރުންނެއް ނޫން، އާއްމު ގޮތެއްގައި ރާއްޖޭގައި މި ބައްލަވާ ހުރިހާ ގިނަ ކްލިނިކްތަކުގައި އަދި ސަރުކާރު ހޮސްޕިޓަލްތަކުގައި ބައްލަވާ ޑޮކްޓަރުން މި ތަނުގައި ގިނައިން ބައްލަވާނީ.ފާތިމަތު ފަރީމާ
ފަރީމާ ވިދާޅުވީ ދެން އިތުރަށް އާ ޚިދުމަތްތައް ތަޢާރަފުކުރަމުންގެންދާނެ ކަމަށެވެ. އަދި އުއްމީދަކީ އާންމުން ބަލައިގަންނަ ރަނގަޅު ފެންވަރުގެ ހިދުމަތްތަކެއް ކްލިނިކުން ފޯރުކޮށްދިނުން ކަމަށެވެ.
މި ކްލިނިކް ފަރުމާކޮށްފައިވަނީ ބަލިމީހުންނަށް ފަސޭހައިން ވަދެ ނުކުމެވޭ ގޮތަށް އަދި ވީލްޗެއަރގައި އުޅޭ ފަރާތްތަކަށް ވެސް ފަސޭހައިން ވަދެ ހިދުމަތް ހޯދޭނެ ގޮތަށެވެ. މީގެ އިތުރުން ބަލިމީހުންނަށް ލުއިފަސޭހަ ހިދުމަތްތަކެއް ދިނުމުގެ އިތުރުން، ވީލްޗެއަގައި އުޅޭ ފަރާތްތަކަށް ކިއުގައި މަޑުނުކޮށް ހިދުމަތް ލިބޭނެ އެވެ.
ކްލިނިކުން ލިބޭ ފަރުވާތަކުގެ ތެރޭގައި، ސިކުނޑިއާއި ނާރުގެ ބަލިތަކުގެ ފަރުވާ، އެތެރެހަށީގެ ބަލިތަކުގެ ފަރުވާ، ކުޑަކުދިންގެ ހާއްސަ ބަލިތަކުގެ ފަރުވާ، އަންހެނުންގެ ހާއްސަ ބަލިތަކުގެ ފަރުވާ، ޖެނެރަލް ސާރޖަރީ، އާންމު ބަލިތަކުގެ ފަރުވާ، ހަމުގެ ބަލިތަކުގެ ފަރުވާ، ހޭނެއްތުމުގެ ޑޮކްޓަރުގެ ހިދުމަތް، ނަފްސާނީ ބަލިތަކުގެ ފަރުވާ، ކަށީގެ ބަލިތަކުގެ ފަރުވާ، އަލްޓްރާ ސައުންޑް ސްކޭން، އެކްސްރޭ، އީސީޖީ، އެންއެސްޓީ، ލެބޯޓަރީގެ ހިދުމަތް، ނަރުހުންގެ ހިދުމަތް، އިންޖެކްޝަން ޖެހުން، ނެބުލައިޒް ކުރުން، ލޭނެގުން އަދި ބޭސް އެޅުން ހިމެނެ އެވެ.
ސްޓާ ކްލިނިކް އިންނަނީ ބުރުޒު މަގުގައި ހުންނަ މ. ގޯލްޑެން ޓަވަރުގެ 1 ވަނަ ފަންގި ފިލާގަ އެވެ.
