ނ.އަތޮޅު ކައުންސިލްގެ ރައީސް، ކައުންސިލަށް ދައްކަން ޖެހޭ އެއްލައްކައަށް ވުރެ ގިނަ ފައިސާ އޮތީ ނުދައްކާ: އޮޑިޓް

ނ.އަތޮޅު ކައުންސިލަށް އެކި ފަރާތްތަކުން ދައްކަންޖެހޭ ގިނަ އަދަދެއްގެ ފައިސާ ނުލިބޭ ކަމަށާއި، ކައުންސިލްގެ ރައީސް، މުހައްމަދު ބަޝީރު ވެސް ދައްކަވަން ޖެހޭ އެއްލައްކައަށް ވުރެ ގިނަ ފައިސާ ނުދައްކާ އޮތްކަން 2023 ވަނަ އަހަރުގެ އޮޑިޓް ރިޕޯޓުން ހާމަވެއްޖެ އެވެ.

ކައުންސިލުގެ އިދާރާއިން ފޯރުކޮށްދީފައިވާ ޚިދުމަތްތަކަށް ލިބެންޖެހޭ ފައިސާ ދަފްތަރުގައި 2023 ވަނަ އަހަރުގެ ނިޔަލަށް 960،124 ރުފިޔާ ލިބެންޖެހޭ ހިމަނާފައިވާކަން ފާހަގޮށް ރިޕޯޓުގައި ބުނީ، އޮޑިޓަށް ފޯރުކޮށްދީފައިވާ ލިބެންޖެހޭ ފައިސާގެ ދަފްތަރުގައި ހިމަނާފައިނުވާ އިތުރު އެއް މިލިއަން ދެ ލައްކަ ހަތްދިހަ ތިން ހާސް ނުވަ ސަތޭކަ ނުވަދިހަ ފަސް ރުފިޔާ 2023 ވަނަ އަހަރުގެ ނިޔަލަށް ކައުންސިލުގެ އިދާރާއަށް ލިބެންޖެހޭ ކަމަށް އެކި ލިޔެކިއުންތަކުން ފާހަގަކުރެވިފައިވާ ކަމަށެވެ. 

އެހެންކަމުން 2023 ވަނަ އަހަރު ނިމުނުއިރު ޖުމްލަ ދެ މިލިއަން ދުއިސައްތަ ތިރީސް ހަތަރު ހާސް އެއްސަތޭކަ ނަވާރަ ރުފިޔާ ކައުންސިލް އިދާރާއަށް ލިބެންޖެހޭ ކަމަށެވެ. އަދި ކައުންސިލުން ފޯރުކޮށްދޭ އެކި ޚިދުމަތްތަކާއި ކުލީގެ ގޮތުގައި 31 ޑިސެންބަރު 2023 ގެ ނިޔަލަށް 960،124 ރުފިޔާ ލިބެންޖެހޭ ކަމަށް ކައުންސިލުން ފޯރުކޮށްދީފައިވާ ދަފްތަރުގައި ހިމަނާފައިވާއިރު، އޭގެތެރެއިން 151،349 ރުފިޔާ 28 ސެޕްޓެމްބަރު 2024 އާ ހަމައަށް ކައުންސިލަށް ލިބިފައިވާ ކަމަށެވެ. 

މީގެ އިތުރުން ކައުންސިލް އިދާރާއަށް ލިބެންޖެހޭ ފައިސާ ހޯދުމަށް އެކަށީގެންވާ ފިޔަވަޅު އަޅާފައިނުވާކަން ފާހަގަކޮށްފައިވެ އެވެ. އަދި ލިބެންޖެހޭ ފައިސާގެ ދަފްތަރުގައި 50،000 ރުފިޔާ އަށްވުރެ ބޮޑު އަދަދުތައް ދައްކަން ޖެހޭ ފަރާތްތަކުގެ މައުލޫމާތު ވެސް ވަނީ އާންމު ކޮށްފަ އެވެ. 

އެގޮތުން، 

1. އަތޮޅު ކައުންސިލްގެ ރައީސް: 118,220 ރުފިޔާ
2. މިނިސްޓްރީ އޮފް އެންވަޔަރަމެންޓް: 114,500 ރުފިޔާ
3. މިނިސްޓްރީ އޮފް ނޭޝަނަލް ޕްލޭނިން: 100,105 ރުފިޔާ
4. ނ. ކެނދިކުޅުދޫ ކައުންސިލް: 71,350 ރުފިޔާ
5. މިނިސްޓްރީ އޮފް ހެލްތު: 61,500 ރުފިޔާ
6. ނ. މަނަދޫ ކައުންސިލް: 52,645 ރުފިޔާ

އޮޑިޓް ރިޕޯޓުގައި ބުނީ، އަތޮޅު ކައުންސިލްގެ ރައީސް ދައްކަންޖެހޭ 118,220 ރުފިޔާގެ ތެރެއިން 89,820 ރުފިޔާއަކީ ސްޓޭޓް ހައުސްގެ ކުލީގެ ގޮތުގައި ދައްކަންޖެހޭ ފައިސާ ކަމަށެވެ.  މި ފައިސާއަކީ 20 މޭ 2021 ގައި ނެރެފައިވާ ސާކިއުލާ "އަތޮޅުތަކުން، އަތޮޅު ކައުންސިލްގެ ރައީސްގެ އެކޮމޮޑޭޝަނާއި ފަރިއްކޮޅު ހަމަޖެއްސުމާބެހޭ" ގައި ބަޔާންކޮށްފައިވާ އުސޫލުގެ ދަށުން ދައްކަންޖެހޭ ފައިސާ އެވެ.

މިއީ ނ. އަތޮޅު ކައުންސިލްގެ ރައީސް ސްޓޭޓް ހައުސްގައި ހުންނެވުމުގެ އިންތިޒާމް ހަމަޖައްސާފައިވުމާ ގުޅިގެން، 19 މޭ 2021 އިން ފެށިގެން 31 ޑިސެމްބަރު 2023 ގެ ނިޔަލަށް ކުލީގެ ގޮތުގައި ދައްކަންޖެހޭ ފައިސާގެ ތެރެއިން މިހާތަނަށް ލިބިފައިނުވާ ފައިސާ ކަމަށް ރިޕޯޓުގައި ބުނެފައިވެ އެވެ. 

މީގެ އިތުރުން، ކައުންސިލްގެ ރައީސް ދައްކަންޖެހޭ ފައިސާގެ ތެރޭގައި ޖުމުލަ 28,400 ރުފިޔާއަކީ ލޯންޗު ދަތުރުތަކަށް ލިބެންޖެހޭ ފައިސާ އެވެ. މީގެ ތެރޭގައި ކެމްޕޭން ހަރަކާތްތަކަށް ކޮށްފައިވާ ދަތުރުތަކަށް ދައްކަންޖެހޭ ފައިސާ ހިމެނޭކަން ވެސް އޮޑިޓް ރިޕޯޓުގައި ބުނެފައިވެ އެވެ. 

އޮޑިޓް ރިޕޯޓުގައި ބުނީ، ދައުލަތުގެ އެކި މުއައްސަސާތަކުން ކައުންސިލަށް ލިބެންޖެހޭ ފައިސާއަކީ މައިގަނޑު ގޮތެއްގައި އެ މުއައްސަސާތަކުން ކޮށްފައިވާ ލޯންޗު ދަތުރުތަކުގެ ބިލްތަކަށް ދައްކަންޖެހޭ ފައިސާ ކަމަށެވެ. 

އޮޑިޓް ރިޕޯޓުގައި ވަނީ ކައުންސިލުން މި ފައިސާތައް ހޯދުމަށް ކުރަންޖެހޭ މަސައްކަތްތައް ކުރުމަށް އިރުޝާދު ދީފަ އެވެ.