އަނެއްކާ ވެސް މާރާމާރީ ގެ މައްސަލައެއްގައި ފުލުހަކު ހައްޔަށް! ހަމަލާ ދިނީ ޗެކް ޕޮއިންޓު ގައި ތިބި ފުލުހުންނަށް

ފުލުހުންގެ ދައުރު އަދާކުރުމަށް ހުރަސް އަޅައި، މާރާމާރީ ހިންގުމުގެ މައްސަލައެއް ގައި ފުލުހަކު ހައްޔަރު ކޮށްފި އެވެ. 

ފުލުހުންގެ ދައުރު އަދާކުރުމަށް ހުރަސް އަޅައި، ފުލުހުންނާ މާރީމާރީ ހިންގި ކަމުގެ ތުހުމަތުގައި ހައްޔަރު ކޮށްފައިވަނީ މ. ކޮޅުފުށީ / ލިލީނައިޓް ، އުމުރުން 22 އަހަރުގެ މުހައްމަދު މައުސޫމް އެވެ. 

މި މައްސަލައިގައި އޭނާ ގެ ބަންދަށް ކްރިމިނަލް ކޯޓުން ވަނީ 2 ދުވަސް ޖަހާފަ އެވެ. 

މައުސޫމް ގެ ބަންދަށް ކްރިމިނަލް ކޯޓުން 2 ދުވަސް ޖެހި އިރު ކޯޓު އަމުރުގައި ވަނީ އޭނާ އަކީ ފުލުހެއް ކަން ފާހަގަކޮށް، އެއީ ގާނޫނު ނެގެހެއްޓުމުގައި މަތީ ދަރަޖައަކަށް ޒިންމާ އޮތް ފަރާތެއް ކަން ވެސް ފާހަގަ ކޮށްފަ އެވެ. 

އެހެން ކަމުން މައުސޫމް މިފަދަ އަމަލެއް ހިންގި ކަމަށް ތުހުމަތުވާތީ މުޖުތަމައުގެ ސަލާމަތާއި ރައްކާތެރި ކަމަށްޓަކައި އޭނާ ބަންދު ކުރުމަށް ފެންނަ ކަމަށް ވެސް ކޯޓު އަމުރުގައި ވެ އެވެ. 

ފުލުހުންގެ މިފަދަ މައްސަލަތައް ފެންމަތިވާ މިންވަރު އިތުރު ވަމުން ދާއިރު މި ފަހުން ވެސް  ސެލޫނެއް ގެ ތެރޭގައި މާރާމާރީ ހިންގި މައްސަލައެއްގައި ފުލުހަކު ހައްޔަރުކޮށް ބަންދުގެ މުއްދަތު ޖަހާފައި ވެ އެވެ. އޭނާ މިހާރު ވަނީ ސަސްޕެންޑު ކޮށްފަ އެވެ. 

އޭގެ އިތުރުން ފާއިތުވި ނޮވެމްބަރު މަހު ކުޑަކުދިންތަކެއް ކުޅުނު ފުޓްސަލް މެޗެއްގައި ހިނގި ހަމަނުޖެހުމަކާއި ގުޅިގެން، ފުލުހަކު ކުޑަކުއްޖަކަށް އަނިޔާވެދާނެ ގޮތަކަށް އަމަލުކޮށް ބިރު ދެއްކި ކަމަށް ބުނާ މައްސަލައެއް ފުލުހުން ވަނީ ތަހުގީގު ކުރަން ފަށާފަ އެވެ. 

މިއީ  ފަހަކަށް އައިސް ފުލުހުންގެ މައްޗަށް ތުހުމަތުކުރެވޭ އެތައް މައްސަލަތަކެއްގެ ތެރެއިން އެއް މައްސަލަ އެވެ. ފުލުހުންގެ ފަރާތުން ހިންގާ ކަމަށް ތުހުމަތުކުރެވޭ އަނިޔާވެރި އަމަލުތަކާއި، ބާރުގެ ބޭނުން ނަހަމަ ގޮތުގައި ހިފުމާއި، ރައްޔިތުންނާ ދެކޮޅަށް ހިންގާ ކަމަށް ތުހުމަތުކުރެވޭ އަނިޔާވެރި އަމަލުތަކުގެ ޝަކުވާތައް ފަހަކަށް އައިސް އިތުރުވަމުން އަންނަކަން ފާހަގަކުރެވެ އެވެ. ފުލުހުންގެ އިދާރާ ތެރެއިން ކުރާ ވައްކަމާ ކޮރަޕްޝަންގެ އަޑު ވަނީ ގަދަވެފަ އެވެ.