ރައީސް މުހައްމަދު މުއިއްޒު ގެ ވެރިކަމުގެ ދެ އަހަރު ތެރޭ ދެވަނަ ފަހަރަކަށް ޗައިނާ އަށް މި ކުރެއްވި ދަތުރުފުޅަކީ ކޮންފަރެންސް އެއްގެ އޮބްޒާވަރެއްގެ ގޮތުގައި ބައިވެރިވެވަޑައިގަތުމަށް ކުރެއްވި ދަތުރުފުޅެއް ކަން ހާމަވެއްޖެ އެވެ.

ރައީސް އޮފީހުން މި ދަތުރުފުޅާ ބެހޭ ގޮތުން ބުނެފައި ވަނީ ރައީސް ޗައިނާ އަށް ކުރައްވަނީ ރަސްމީ ދަތުރުފުޅެއް ކަމަށެވެ.

ދަތުރުފުޅުގައި ޗައިނާ އިން ހޫނު މަރުހަބާ އެއް ދެންނެވި ކަމަށާއި، ޗައިނާގެ ރައީސް އާ ބައްދަލު ކުރެއްވި ކަމަށެވެ. އެހެން ނަމަވެސް، ކޮންފަރެންސަށް ވަޑައިގެންނެވި އިންޑިއާގެ ބޮޑު ވަޒީރު ފަދަ ވެރިންނަށް ޗައިނާ އިން ކީ މަރުހާބާ އަށް ވުރެ ރައީސް މުއިއްޒު އަށް އެ ގައުމުން މަރުހަބާ ކިޔާފައި ވަނީ މާ އާދައިގެ ގޮތަކަށްކަން ފަހުން ވަނީ ހާމަ ވެފައެވެ.

ރައީސް މުޙައްމަދު މުޢިއްޒު، ޕީޕަލްސް ރިޕަބްލިކް އޮފް ޗައިނާގެ ރައީސް، ޝީ ޖިންޕިންގ އާ އެކު ބޭއްވި ބައްދަލުވުމުގައި އެއްވެސް މާނަ ހުރި ކަމަކަށް އެއްބަސްވި ކަމަކަށް ނުވަތަ އައު މަޝްރޫއެއްގެ އެއްބަސްވުމެއް ގައި ނުވަތަ ޗައިނާގެ އެހީތެރިކަން ވަކި ރޮނގަކުން ދިނުމަށް ނިންމި ވާހަކަ އެއް ރައީސް އޮފީހުން ހާމަ ކޮށްފައެއް ނުވެއެވެ.

ރައީސް އޮފީހުން ބުނެފައި ވަނީ، މި ބައްދަލުވުމުގައި "ދިވެހިރާއްޖެ އާ ޗައިނާގެ ގުޅުން މަތީ ހަރުފަތަކަށް ގެންދެވުމަށް ދެ ލީޑަރުން އެއްބަސްވެވަޑައިގެންފައިވާ،" ކަމަށެވެ.

ދެބޭފުޅުންގެ ކުރު ބައްދަލުވުމުގައި ދެކެވިފައިވާ ހުރީ ދެ ގައުމެއްގެ ވެރިން ބައްދަލުވުމުން އާންމު ކޮށް ދެކެވޭ ޒާތުގެ ޑިޕްލޮމެޓިކް ވާހަކަ ތަކެވެ. ވަކި ފާހަގަ ކުރެވޭ ނަތީޖާ އެއް އެ ބައްދަލުވުމުގައި ނުކުތް ކަމެއް ރައީސް އޮފީހުން ނެރުނު ބަޔާނުގައި ފާހަގަ ކޮށްފައެއް ނެތެވެ.

އާދިއްތަ ދުވަހު އިންޑިއާގެ ބޮޑު ވަޒީރު އެކްސް ގައި ކުރެއްވި ޕޯސްޓެއްގައި ރައީސް މުއިއްޒު އާ ސަލާމް ކުރައްވަނިކޮށް ނަންގަވާފައިވާ ފޮޓޯ އެއް ވަނީ ހާމަ ކުރައްވާފައެވެ.

އެ ފޮޓޯ އާ އެކު ލިޔުއްވާފައި ވަނީ "ޓިއަންޖިން ގައި ބޭއްވުނު އެސް.ސީ.އޯ ސަމިޓުގެ ހަވާސާ ގައި ރާއްޖޭގެ ރައީސް މުޢިއްޒުއާ ބައްދަލުވި ވާހަކަ އެވެ. އަދި ތަރައްގީގެ ރޮނގުން އިންޑިއާ އިން ރާއްޖެ އަށް ދޭ އެއްބާރުލުމުގެ ސަބަބުން އަޅުގަނޑުމެންގެ ރައްޔިތުންނަށް ވަރަށް ބޮޑަށް ފައިދާ ކުރާނެ ކަމަށް ވިދާޅުވެފައިވެއެވެ.

މޯދީ ވަނީ އެހެން ލީޑަރުންނާ އެކު ސަލާމް ކުރައްވާ ފޮޓޯ ތަކާ އެކު ހަމަ މިމޭރުމުން އެ ގައުމުތަކާ އިންޑިއާ އާ އޮތް ގުޅުމާ ބެހޭ ގޮތުން ވެސް ޕޯސްޓްތައް ކުރައްވާފައެވެ.

އިންޑިއާގެ ބޮޑު ވަޒީރުގެ ޕޯސްޓުން ހާމަވާ ގޮތުގައި ރައީސް މުއިއްޒު އާ ބައްދަލުވީ ކޮންފަރެންސް ގެ ހަވާސާގައެވެ. ދެ ބޭފުޅުން ސަލާން ކުރައްވައިގެން ތިއްބެވީ ކޮޅަށެވެ. އެއާ ޚިލާފަށް މޯދީގެ ދަތުރުފުޅުގައި އިންތިޒާމު ވެގެން އެހެން ގައުމުތަކުގެ ވަފުދުތަކާ އެކު ބައްދަލު ކުރެއްވި ފޮޓޯ ތައް ވަނީ އާންމު ވެފައެވެ.

ރައީސް ޗައިނާ އަށް ކުރައްވާ މި ދަތުރުފުޅަކީ ސްޓޭޓް ވިޒިޓެއްތޯ އާއި ނުވަތަ އެ ނޫން ދަތުރުފުޅެއް ނަމަ ކޮން ކަމަކާ ގުޅިގެން ކުރައްވާ ދަތުރުފުޅެއްތޯ ރާއްޖެޓީވީ އިން ރައީސް އޮފީހުގެ ތަރުޖަމާނު ހީނާ ވަލީދު އާ ސުވާލު ކުރުމުން ސުވާލަށް ޖަވާބެއް ދެއްވުމުގެ ބަދަލުގައި، ފޮނުއްވީ މުއިއްޒުގެ ދަތުުރުފުޅާ ގުޅިގެން ރައީސް އޮފީހުގެ ރަސްމީ ވެބްސައިޓުގައި ޝާއިއުކޮށްފައިވާ ޚަބަރުގެ ލިންކެވެ.

ރައީސް އޮފީހުން އާންމު ކޮށްފައިވާ ޚަބަރުގައި ބުނެފައި ވަނީ، ޗައިނާގެ ރައީސް ޝީ ޖިންޕިންގ ގެ ދަޢުވަތަކަށް، ޝަންހާއީ ކޯޕަރޭޝަން އޯގަނައިޒޭޝަން (އެސް.ސީ.އޯ) ސަމިޓުގައި ބައިވެރިވެވަޑައިގެންނެވުމަށް އެ ޤައުމަށް ކުރައްވާ ރަސްމީ ދަތުރުފުޅެއްގައި، ރައީސް މުޢިއްޒު ހުކުރު ދުވަހު ޗައިނާއަށް ފުރާވަޑައިގަންނަވައިފި ކަމަށެވެ.

ރައީސް އޮފީހުން މުއިއްޒު ގެ ދަތުރުފުޅަކީ އެސް.ސީ.އޯ ގައި ބައިވެރިވެ ވަޑައިގަތުމަށް ކުރައްވާ ދަތުރުފުޅެއް ކަމަށް ބުނެފައި ވިޔަސް، ޗައިނާގައި އޮންނަ ސަމިޓުގައި މުއިއްޒު އިންނަވާނީ ޖަލްސާ ހިނގާ ގޮތް ބައްލަވާށެވެ. އެ ޖަލްސާ ގައި ވާހަކަ ދެއްކުވުމުގެ ފުރުސަތެއް އަދި ބަހުސް ކުރެވޭ އެއްވެސް ކަމަކާ މެދު އެއްޗެއް ވިދާޅުވުމުގެ ފުރުސަތެއް ލިބިވަޑައެއް ނުގަންނަވާނެ އެވެ.

އެސްސީއޯ އަކީ 2001 ވަނަ އަހަރު ސިޔާސީ ގޮތުންނާއި، ސަލާމަތީ ރޮނގުން ގުޅުން ބަދަހި ކުރުމަށް، ޔޫރޭޝިއާ ސަރަހައްދުގެ 10 ގައުމެއްގެ މައްޗަށް އެކުލެވޭ ގުރޫޕެކެވެ.

ފުރަތަމަ އުފެދުނު އިރު 6 ޤައުމެއްގެ މައްޗަށް މި ސަރަޙައްދީ ޖަމުޢިއްޔާ އޮތް ނަމަވެސް އެސްސީއޯ އިން ވަނީ ފަހަކަށް އައިސް މެމްބަރުޝިޕް އިތުރުކޮށްފައެވެ. މިގޮތުން އިންޑިއާ، ޕާކިސްތާން، އީރާން އަދި ބެލަރޫސް ފަދަ ސިޔާސީ ގޮތުން ބާރުގަދަ ޤައުމުތައް ފުރިހަމަ މެމްބަރުންގެ ގޮތުގައި ހިމަނާފައި ވާއިރު، އަފްޣާނިސްތާން އަދި މި މޮންގޯލިއާ ވަނީ އޮބްޒާވަރުންގެ ގޮތުގައި ބައިވެރިވެފައެވެ.

2001 ވަނަ އަހަރު އެ ޖަމުޢިއްޔާ އުފައްދާފައި ވަނީ، ޗައިނާ، ރަޝިޔާ، ކަޒަކްސްތާން، ކިރްގިސްތާން، ތަޖިކިސްތާން އަދި އުޒްބެކިސްތާނުންނެވެ.

ދިވެހިރާއްޖެ އަކީ އެސް.ސީ.އޯ. ގައި ހިމެނޭ މެމްބަރު ގައުމެއް ނޫނެވެ. އެހެން ނަމަވެސް 5 މެއި 2023 ގައި ދިވެހިރާއްޖެ އަށް "ޑައިލޮގް ޕާރޓްނަރ" ގެ ހައިސިއްޔަތު ދީފައިވެއެވެ. ޑައިލޮގް ޕާޓްނަރުގެ ދަރަޖަ އުފެއްދީ 2008 ވަނަ އަހަރުއެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ޤައުމުތަކުގެ ލީޑަރުންނާ ބައްދަލުކުރެއްވުމަށް ވަނީ ހަމަޖެހިފައި ކަމަށް ބުނެފައިވަނީ، އިންޑިއާގެ ބޮޑު ވަޒީރު ނަރެންދްރަ މޯދީ އާ ސަމިޓުގެ ހަވާސާ ގައި ބައްދަލުވި ގޮތައް ކަމަށް ބެލެވެއެވެ.

ރާއްޖޭގެ ވެރިކަމަށް ވަޑައިގެން މިވީ އެންމެ ދެ އަހަރުގެ ތެރޭގައި، ރައީސް މުއިއްޒު ފާހަގަ ކުރެވިފައިވަނީ ރާއްޖެ އިން ބޭރަށް ދަތުރުފުޅު ކުރެއްވުމަށް އާދަޔާ ޚިލާފު ޝައުގެއް ބެހެއްޓެވި ބޭފުޅެއްގެ ގޮތުގައެވެ. ޗައިނާ އަށް މި ކުރެއްވި ދަތުރުފުޅާއެކު 24 ދަތުރުފުޅު މިހާތަނަށް ރައީސް މުއިއްޒު ވަނީ ރާއްޖެ އިން ބޭރަށް ކުރައްވާފައެވެ.