އިސްރާއީލުގެ އެއަރ ބޭސްތަކަށް އަމާޒުކޮށް ޙަމަލާ ދިންކަމަށް އީރާނުގެ ރިވޮލިއުޝަނަރީ ގާޑުން ބުނެފިއެވެ.

އީރާނުގެ އިސްލާމިކް ރިވޮލިއުޝަނަރީ ގާޑު ކޯޕްސް (އައިއާރުޖީސީ) އިން އަންގާރަ ދުވަހުގެ ރޭ ނެރުނު ބަޔާނެއްގައި ބުނެފައިވަނީ، އެ ފަރާތުން އެންމެ ފަހުން ދިން މިސައިލް އަދި ޑްރޯން ޙަމަލާތަކުގެ އަމާޒަކީ ވަކިން ޚާއްޞަކޮށް އީރާނުގެ ސަރަޙައްދަށް ޙަމަލާ ދިނުމަށް ބޭނުންކުރި އިސްރާއީލުގެ އެއަރ ބޭސްތައް ކަމަށެވެ.

"އިސްރާއީލަށް އީރާނުން ދޭ ޙަމަލާތައް ދެމިގެންދާނީ ހުއްޓުމެއްނެތި، ކޮމްޕްލެކްސްކޮށް، ގިނަ ފަށަލައި އެކުލެވޭ ގޮތައް އަދި ހަލުވި މިނުގައެވެ... އަޅުގަނޑުމެން އަމާޒުކުރީ ޒަޔަނިސްޓު ވެރިކަމުން އީރާނުގެ ސަރަޙައްދަށް ޙަމަލާ ދިނުމަށް ބޭނުންކުރި އެއަރ ބޭސްތަކަށެވެ،" އެ ބަޔާނުގައި ބުނެފައިވެއެވެ.

މީގެ ކުރިން، އިސްރާއީލުގެ އަމާޒުތަކަށް އީރާނުން ދިހަވަނަ ބުރުގެ ޙަމަލާތައް ދިން ކަމަށް އިރާނުގެ ރަސްމީ މީޑިއާ އިން ރިޕޯޓުކޮށްފައިވެއެވެ.

އަންގާރަ ދުވަހުގެ މެންދުރުފަހު އީރާނުގެ އެކި ސަރަޙައްދު ތަކުން އިސްރާއީލަށް އަމާޒުކޮށް މިސައިލްތަކާއި ޑްރޯންތައް ދޫކޮށްލި ކަމަށް އެ ނޫސް އޭޖެންސީން ބުނެފައިވެއެވެ.