ބުރާސްފަތި ދުވަހު ލަންޑަނަށް ދަތުރުކުރަމުން ދިޔަ 242 މީހުން ތިބި އެއަރ އިންޑިއާ ގެ މަތިންދާބޯޓެއް ވެއްޓުނު ހާދިސާގައި އެ ބޯޓުން ދަތުރު ކުރި އެކަކު ވެސް ދިރި ތިބޭނެ ކަމަށް ނުބެލެވޭ ކަމަށް އިންޑިއާގެ އަހްމަދާބާދު ސިޓީގެ ފުލުހުން ބުނެފިއެވެ.

އަދި މަތިންދާބޯޓު ވެއްޓުނު ސަރަހައްދަކީ މީހުން ދިރިއުޅޭ އަދި އޮފީސްތައް ހުރި ސަރަހައްދަކަށް ވާތީ އިތުރު މަރުތަކެއް ވެސް މިހާދިސާގެ ސަބަބުން ހިނގައިފާނެ ކަމަށް ފުލުހުން ބުނެފައިވެއެވެ.

"މި ހާދިސާގައި ދިރިތިބި އެއްވެސް މީހަކު ނުހުންނާނެ ކަމަށް ބެލޭ،" ސިޓީގެ ފުލުސް ކޮމިޝަނަރު ޖީ.އެސް. މަލިކް، އޭއެފްޕީ އަށް ވިދާޅުވިއެވެ. "އަދި މަތިންދާ ބޯޓު ވެއްޓިފައި ވަނީ މީހުން ދިރިއުޅޭ އަދި ބައެއް އޮފީސްތައް ހުރި ސަރަހައްދަކަށް ވާތީ، އިތުރު މަރުތަކެއް ވެސް ހިނގައިފާނެ."

242 މީހުން ތިބި އެއަރ އިންޑިއާގެ ފްލައިޓް 171، ބޯއިންގ 8-878 ޑްރީމްލައިނަރ ލަންޑަނަށް ދަތުރު ކުރަމުން ދިޔަ އެއަރ އިންޑިއާގެ މަތިންދާބޯޓެއް އިންޑިއާގެ ހުޅަނގު ފަރާތު ސިޓީ އަހްމަދު އާބާދުން ފުރުމަށްފަހު މިނެޓުތަކެއްގެ ތެރޭގައި ވެއްޓެމުން ދިޔަ މަންޒަރު ފެންނަ ވީޑިއޯ އެއް އާންމު ވެފައި ވެއެވެ. އެ ވިޑީއޯ އިން ފެންނަ ގޮތުގައި ބޯޓު ވެއްޓުމާއެކު އަލިފާން ރޯވެ ބޯ ދުން އަރަން ފެށިއެވެ.

އިންޑިއާގެ ފެޑެރަލް ސިއްހީ ވަޒީރު ވިދާޅުވެފައިވަނީ މި ހާދިސާ ގައި "ގިނަ ބަޔަކު" މަރުވެފައިވާ ކަމަށެވެ.

100 އަށްވުރެ ގިނަ ހަށިގަނޑު އިންޑިއާގެ އަހްމަދް އާބާދުގެ ހޮސްޕިޓަލަކަށް ގެންގޮސްފައިވާ ކަމަށް ފުލުހުން ބުނެފައިވެއެވެ.

އިންޑިއާގެ ސީ.އެން.އެން ނިއުސް-18 ޓީވީ ޗެނަލުން ބުނެފައިވަނީ މަތިންދާބޯޓު ވެއްޓިފައި ވަނީ ސަރުކާރުގެ ބީ.ޖޭ. މެޑިކަލް ކޮލެޖް ހޮސްޓަލްގެ ކާ ކޮޓަރީގެ މައްޗަށް ކަމަށާއި، އެކަމުގެ ސަބަބުން ގިނަ އަދަދެއްގެ މެޑިކަލް ދަރިވަރުން މަރުވެފައިވާ ކަމަށެވެ. އެ ޗެނަލުން ބުނެފައިވަނީ "މަތިންދާބޯޓު ވެއްޓިފައިވާ އިމާރާތަކީ ޑޮކްޓަރުންގެ ހޮސްޓަލެއް ކަމަށެވެ.

އިންޑިއާގެ ބޮޑުވަޒީރު ނަރެންދްރަ މޯދީ ބުރާސްފަތި ދުވަހު ވިދާޅުވެފައިވަނީ މި ހާދިސާ އިން އޭނާ އަށް ކުއްލި ހައިރާން ކަމެއް ލިބިވަޑައިގެންނެވި ކަމަށެވެ.

"އަހްމަދް އާބާދުގައި ހިނގި މި ހިތާމަވެރި ހާދިސާ އިން އަޅުގަނޑުމެންނަށް ލިބުނީ ޝޮކެއް، ހިތާމައެއް. މިއީ ބަހުން ބަޔާން ކުރަން ދަތި ހިތާމަވެރި ކަމެއް،" އެއަރ އިންޑިއާގެ މަތިންދާ ބޯޓު ވެއްޓުނު ހާދިސާ އާ ގުޅިގެން އެކްސްގައި ޕޯސްޓް ކުރެއްވި މެސެޖެއްގައި މޯދީ ވިދާޅުވެފައިވެއެވެ.

"މި ހިތާމަވެރި ވަގުތުގައި، އަޅުގަނޑުގެ ފިކުރު ވަނީ މި ހާދިސާއިން އަސަރުކުރި އެންމެންނާ އެކުގައެވެ،" އޭނާ ވިދާޅުވިއެވެ.

އިންޑިއާ ގައި މީގެ ކުރިންވެސް ވަނީ އެތައް ބައެއްގެ ފުރާނަ ގެއްލުނު މަތިންދާބޯޓު ހާދިސާތަކެއް ހިނގާފައެވެ. އޭގެ ތެރޭގައި 1996 ގައި ނިއު ދިއްލީގެ މަތިން ދެ މަތިންދާބޯޓު ޖެހި، ގާތްގަނޑަކަށް 350 މީހުން މަރުވި ހާދިސާ ހިމެނެއެވެ.

2010 ވަނަ އަހަރު، އެއަރ އިންޑިއާ އެކްސްޕްރެސްގެ މަތިންދާބޯޓެއް އިންޑިއާގެ ދެކުނު ހުޅަނގު ފަރާތުގައިވާ މަންގަލޯރު އެއަރޕޯޓުގައި ވެއްޓި އަލިފާން ރޯވެ، މަތިންދާބޯޓުގައި ތިބި 166 މީހުންގެ ތެރެއިން ފަސިންޖަރުންނާއި ފަޅުވެރިން ހިމެނޭ ގޮތުން 158 މީހުން މަރުވިއެވެ.

އޭގެ އަހަރުތަކެއް ކުރިން، 1985 ވަނަ އަހަރުގެ ޖޫން މަހު މޮންޓްރިއަލްއިން ލަންޑަނަށް ދަތުރުކުރަމުންދިޔަ އެއަރ އިންޑިއާގެ ބޯއިންގ 747 މަތިންދާބޯޓެއް އަޔަރލޭންޑްގެ ކައިރިން ކަނޑަށް ވެއްޓި، މަތިންދާބޯޓުގައި ތިބި 329 މީހުން މަރުވެފައިވެއެވެ.