އީސްރާއީލުގެ ނިއުކްލިއަރ ޕްރޮގްރާމް އާ ބެހޭ ގިނަ އަދަދެއްގެ ސިއްރު މައުލޫމާތު އީރާނުގެ ޖާސޫސުން ހޯދައިފި

އިސްރާއީލުގެ ނިއުކްލިއަރ ޕްރޮގްރާމް އާ ބެހޭ ސިއްރު މައުލޫމާތު އެކުލެވޭ ގިނަ އަދަދެއްގެ ޑޮކިއުމެންޓް އީރާނުގެ ޖާސޫސުން ހޯދައިފި ކަމަށް އީރާނުން ބުނެފިއެވެ.

"އަޅުގަނޑުމެން ޒަޔަނިސްޓް ސަރުކާރުން ހޯދި ލިޔެކިޔުންތަކަކީ އެމީހުންގެ ނިއުކްލިއަރ ވަސީލަތްތަކާ ގުޅޭ މަޢުލޫމާތު" ކަމަށް އީރާނުގެ އިންޓެލިޖެންސް މިނިސްޓަރ އިސްމާއިލް ޚަތީބު އާދީއްތަ ދުވަހު އައިއާރުއައިބީ ނިއުސް އަށް ވިދާޅުވިއެވެ.

"މި ލިޔެކިޔުންތަކާއި އެ ސަރުކާރުގެ އެހެނިހެން މުހިންމު ރެކޯޑުތަކުގެ ސަބަބުން އީރާނުގެ ހަމަލާދޭ ޤާބިލުކަން އިތުރުވެގެންދާނެ" ކަމަށް އޭނާ ވިދާޅުވިއެވެ.

މިކަމާ ގުޅިގެން ކުރިން ޝާއިއު ކޮށްފައިވާ ޚަބަރު ތަކުގައިވާ ގޮތައް "އެތައް ހާސް" ލިޔެކިޔުން ލިބުނުތޯ ސުވާލު ކުރުމުން، އޭނާ ވިދާޅުވީ "މިއީ ވަރަށް ބޮޑު ކުރިއެރުމެއް، އަދި ޙަޤީޤަތުގައި 'އެތައް ހާސް ލިޔެކިޔުން' ކަމަށް ބުނުމަކީ ހޯދިފައިވާ އެއްޗެހީގެ އަދަދާ އަޅާބަލާއިރު ވަރަށް ކުޑަ ބަހެއް" ކަމަށެވެ.

ހޮނިހިރު ދުވަހު، މަޢުލޫމާތު ލިބިފައިވާ ފަރާތްތަކުން އައިއާރުއައިބީ ނިއުސް އަށް ބުނެފައި ވަނީ މި ޖާސޫސީ މައުލޫމާތު ހޯދުމަކީ އިސްރާއީލު ސަރުކާރަށް ދެވުނު އެންމެ ބޮޑެތި ހަމަލާތަކުގެ ތެރެއިން ހަމަލާ އެއް ކަމަށެވެ.

މައުލޫމާތު ދިން ފަރާތުން ބުނެފައިވަނީ، ލިޔެކިޔުންތައް ހޯދުމުގެ މަސައްކަތް ކުރެވުނީ އެތައް ދުވަހެއް ކުރިން ކަމުގައި ވީ ނަމަވެސް ތަކެތީގެ ގިނަކަމާއި އެތަކެތި ރައްކާތެރި ކަމާއެކު އީރާނަށް ގެންދަން ޖެހޭތީ، އެތަކެތި ކަނޑައެޅިފައިވާ ރައްކާތެރި ތަންތަނަށް ފޯރު ކޮށްދިނުމަށް ޓަކައި ކުރިން ޚަބަރު ނުފެތުރުމަށް މަޖުބޫރުވީ ކަމުގައެވެ.

އެމީހުން އިތުރަށް ބުނެފައިވަނީ ލިޔެކިޔުންތަކުގެ ގިނަކަމުގެ ސަބަބުން އެތަކެތި މުރާޖަޢާ ކުރުމާއި، ފޮޓޯތަކާއި ވީޑިއޯތައް ބެލުމަށް ވަރަށް ގިނަ ވަގުތު ހޭދަވެފައިވާ ކަމަށެވެ.

ހަތީބު ވިދާޅުވެފައި ވަނީ "ފުރިހަމަ އަދި ބޮޑު މަސައްކަތެއް" ކުރެވިފައިވަނީ އިސްރާއީލުން ހިފާފައިވާ ސަރަހައްދުގެ ތެރޭގައި ކަމަށާއި، އެ އަނިޔާވެރި ސަރުކާރުގެ "ސްޓްރެޓިކް، އޮޕަރޭޝަނަލް އަދި ސައިންޓިފިކް މަޢުލޫމާތު" ގިނަ އަދަދަށް އީރާނަށް ގެނައުމުގައި ކާމިޔާބު ވެފައިވާ ކަމަށެވެ.

އިސްރާއީލުގެ ސިއްރު މައުލޫމާތު ތަކެއް އީރާނަށް ލިބިފައިވާ ކަމުގެ ޚަބަރު ފެތުރުނީ އީރާނަށް ޖާސޫސީ މައުލޫމާތު ފޯރުކޮށްދޭން އުޅުމުގެ ކުށުގެ ތުހުމަތުގައި ދެމީހަކު ހައްޔަރުކުރި ކަމަށް އިސްރާއީލުގެ ސަރުކާރުގެ އިސްވެރިން އިޢުލާނުކުރިތާ ދެ ހަފުތާއަށް ވުރެ ގިނަ ދުވަސް ފަހުންނެވެ.

ނަމަވެސް، ޚަތީބު ވިދާޅުވެފައި ވަނީ މަޢުލޫމާތު ލިބުނު ގޮތްތައް ސިއްރު ކުރެވިފައިވާ ކަމަށާއި އަދި އަވަހަކަށް އެކަން ހާމަ ނުކުރާނެ ކަމަށެވެ. "އެހެން ނަމަވެސް އަޅުގަނޑުމެން އިރާދަކުރެއްވިއްޔާ އަވަހަށް އެ ލިޔެކިޔުންތައް ޝާއިޢު ކުރާނަން" ކަމަށް އޭނާ ވިދާޅުވިއެވެ.

ނިއުކްލިއަރ ބާރެއްގެ ގޮތުގައި ފުޅާ ދާއިރާއެއްގައި ބެލެވޭ އިސްރާއީލުން އެ ޤައުމުގެ ނިއުކްލިއަރ ޕްރޮގްރާމް ފެށީ 1952 ގައި ފްރާންސް އަދި އެމެރިކާގެ ޓެކްނޮލޮޖީގެ އެހީތެރި ކަމާއެކުގައެވެ.

އެކި އަސްކަރީ ތިންކްޓޭންކްތަކުގެ ހޯދުންތަކުން އެނގޭ ގޮތުގައި އިސްރާއީލު ސަރުކާރުން ފުރަތަމަ އުފެއްދި ނިއުކްލިއަރ ހަތިޔާރު އުފެއްދީ 1967-1968 ގެ ތެރޭގައެވެ.

1986 ގައި، އިސްރާއީލުގެ ޑިމޯނާ ނިއުކްލިއަރ ފެސިލިޓީގެ ޓެކްނީޝަނެއް ގެ ގޮތުގައި މަސައްކަތް ކުރި މީހަކު އިސްރާއީލުގެ ސިއްރު ނިއުކްލިއަރ ޕްރޮގްރާމްގެ ވާހަކަތައް ފަޅާ އަރުވާލިއެވެ. މިކަމުގެ ސަބަބުން އޭނާގެ މައްޗަށް 1988 ގައި ޣައްދާރުވުމުގެ ކުށް ސާބިތުކޮށް 18 އަހަރުގެ ޙުކުމެއް އިއްވުނެވެ.