ބޯކޮށް ވަރޭވެހޭ ދުވަސްވަރު މާލޭގައި ފެންބޮޑުވާ މައްސަލަ ހައްލުކުރުމަށް ސަރުކާރުން އެކަށީގެންވާ މަސައްކަތެއް ނުކޮށް އޮއްވާ، އިތުރު ގްލޯބަލް ދެ ޕަމްޕު ގެނައުމަށް މާލެ ސިޓީ ކައުންސިލުން ނިންމައިފިއެވެ.

ކައުންސިލުން، އިތުރު 2 ޕަމްޕު ގެންނަން ނިންމީ ބުދަ ދުވަހު ކުރިއަށް ދިޔަ ކައުންސިލްގެ 4 ވަނަ ދައުރުރުގެ 187 ވަނަ ރަސްމީ ޢާންމު ޖަލްސާގައެވެ.

މި ޖަލްސާގައި ވާހަކަ ދައްކަވަމުން، މާލެ ސިޓީގެ މޭޔަރ އާދަމް ޢާޒިމް ވިދާޅުވީ، އަލަށް ގެނައުމަށް ނިންމާފައިވާ ޕަމްޕުތައް ބޭނުން ކުރުމަށް ހަމަޖެހިފައި ވަނީ، ހެންވޭރު ކޮޅުގައި ކަމަށެވެ. ހިތް ފަސޭހަ ސިޓީއެއްގެ ގޮތުގައި މާލެ ބޭވުމަކީ، ކައުންސިލުން އެންމެ އިސްކަމެއް ދީގެން ކުރަމުން އަންނަ އެއް މަސައްކަތް ކަމަށް ވެސް، މޭޔަރ ޢާޒިމް ވިދާޅުވިއެވެ.

މޭޔަރ ޢާޒިމް ވިދާޅުވީ، މާލެ ސިޓީ ކައުންސިލުން އެންމެ ފުރަތަމަ ގެނައި ދެ ޕަމްޕު މިހާރު ވަނީ އޮޕަރޭޓްކޮށް މެއިންޓެއިންސްގެ ކަންކަން ބެލެހެޓުމަށް، އެމްއެންޑީއެފްގެ ފަޔާ އެންޑް ރެސްކިއު އާ ހަވާލުކޮށްފައި ކަމަށާއި އެ ދެ ޕަމްޕު ބޮޑަށް ބޭނުން ކުރަމުން އަންނަނީ، މާލޭ ސިޓީގައި އެންމެ ބޮޑަށް ފެން ބޮޑުވާ، މާފަނު ކޮޅުގައި ކަމަށް ވެސް މޭޔަރ ޢާޒިމް ވިދާޅުވީއެވެ.

މާލެ ސިޓީ ކައުންސިލްގެ ފެންހިންދާ ގްލޯބަލް ދެ ޕައްޕު އޮޕަރޭޓްކޮށް ބެލެހެޓުމަށް އެމްއެންޑީއެފްގެ ފަޔާ އެންޑް ރެސްކިއުއާ އަންގާރަ ދުވަހު ވަނީ ހަވާލުކޮށްފައެވެ. މި ދެ ޕަމްޕު، ކައުންސިލްގެ ފަރާތުން އެމްއެންޑީއެފާ ހަވާލު ކޮށްފައިވަނީ، އަންގާރަ ދުވަހު ހަވީރު، މާލެއަށް ކުރި ވިއްސާރައިގައި ވާރޭ ވެހި، މާލޭގައި ފެންބޮޑުވި ސަރަހައްދުތަކުން ފެން ހިންދުމަށް ފަހުއެވެ.

ޕަމްޕުތައް ހަވާލު ކުރެއްވުމަށް ފަހު، މާލޭ ސިޓީގެ މޭޔަރ އާދަމް ޢާޒިމް ވިދާޅުވެފައި ވަނީ، މާލެއަށް ބޯކޮށް ވާރޭވެހުމުން، ރައްޔިތުންނަށް ލިބެމުންދާ ގެއްލުންތަކުން ރައްޔިތުން ސަލާމަށް ކުރުމަށް ޓަކައި، މި ކައުންސިލުން ގެނެސްފައިވާ ގްލޯބަލް 2 ޕަމްޕު، އޮޕަރޭޓްކޮށް، މެއިންޓެއިންސްގެ ކަންކަން ބެލެހެޓުމަށް، އެމް.އެން.ޑީ.އެފްގެ ފަޔާ އެންޑް ރެސްކިއުއާ އަންގާރަ ދުވަހު ހަވާލު ކުރައްވާފައިވާ ކަމަށެވެ. އަދި މާލޭގައި ފެންބޮޑުވާ ކޮންމެ ފަހަރަކު، އެ ކަމުން ރައްޔިތުން ސަލާމަތް ކުރުމަށް ޓަކައި، އެމް.އެން.ޑީ.އެފުން ކުރަމުންދާ މަސައްކަތަކަށް، މޭޔަރ ޢާޒިމްވަނީ ފަށްފަށުން ޝުކުރު ދަންނަވާފައެވެ.

މީގެ އިތުރުން މޭޔަރ ޢާޒިމް ވިދާޅުވެފައިވަނީ ޙަވާލުކުރެވުނު މި 2 ޕަމްޕުގެ ސަބަބުން އެމް.އެން.ޑީ.އެފްގެ މަސައްކަތަށް ވަރަށް ބޮޑު ފަސޭހަތަކެއް ލިބިގެންދާނެކަމަށް އުންމީދުކުރައްވާ ކަމަށެވެ.

އެންމެ ފުރަތަމަ މާލެ ސިޓީ ކައުންސިލުން ގެނައި ދެ ޕަމްޕަކީ ވެސް، ކައުންސިލްގެ ޓެކްނިކަލް ޓީމަކުން ޚާއްޞަ ދިރާސާތަކެއް ހެދުމަށް ފަހު، ގެނައި ޕަމްޕު ތަކެކެވެ. މިހާރު މާލޭގައި ފެން ހިންދުމަށް ބޭނުންކުރާ ޕަމްޕުތަކަށް ވުރެ 10 ގުނަ ބާރު މިނުގައި، މިއިން ކޮންމެ ޕަންޕަކުން ވެސް ފެން ހިންދައެވެ.

މާލޭ ސިޓީ ކައުންސިލުން ފެންހިންދުމަށް މި އަހަރުގެ ކުރީ ކޮޅު ރާއްޖެ ގެނައި 2 ޕަންޕަކީ، ފެން ގަނގު ތެރޭގައި ހުންނަ، ތިން އިންޗި ފުޅާމިނުގެ ސޮލިޑް، ހޮޅިތެރެއިން ބޭރު ކޮށްލެވޭ ޕަމްޕެއް ކަމަށާއި، މި ޕަމްފުން މިނެޓަކު 11356.24 ލީޓަރުގެ ފެން ބޭރު ކޮށްލެވޭނެ ކަމަށް ވެސް، މޭޔަރ ޢާޒިމް ވިދާޅުވި އެވެ. އަދި މީގެ ކުރިން މާލޭގައި ފެންހިންދުމަށް ބޭނުން ކުރަމުން އައީ މިނެޓަކު 1300 ލީޓަރާއި 900 ލީޓަރުގެ ފެން ބޭރުކުރާ ޕަމްޕުތައް ކަމަށް ވެސް މޭޔަރ ޢާޒިމް ވިދާޅުވި އެވެ.

މާލޭގައި މީގެ ކުރިން ފެންހިން ދަމުންއައީ ދޯނިފަހަރުގައި، ދިޔަހިއްކުމަށް ބޭނުންކުރާ ކަހަލަ ޕަމްޕު ތަކުންނެވެ.