ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ދެ ވަނަ ލެގުގައި ޕީއެސްވީއާ އެއްވަރުވީ ނަމަވެސް، އާސެނަލް އިން މުބާރާތުގެ ކުއާޓާ ފައިނަލްގެ ފުރުސަތު ހޯދައިފި އެވެ.

މި ދެ ޓީމު ޕީއެސްވީގެ އަމިއްލަ ދަނޑުގައި ކުޅުނު މެޗު އާސެނަލް އިން ކާމިޔާބު ކުރީ 7-1 ގެ ތަފާތު ބޮޑު ނަތީޖާ އަކުންނެވެ.

އެހެންކަމުން އާސެނަލްގެ އަމިއްލަ ދަނޑުގައި ބުދަ ދުވަހުގެ ރޭ އޮތް ދެ ވަނަ ލެގަށް ނިކުތްއިރު ވެސް، އާސެނަލް އަށް އޮތީ ކުއާޓާ ފައިނަލްގެ ފުރުސަތު ބޮަޑުވެފަ އެވެ.

އާސެނަލްގެ އަމިއްލަ ދަނޑުގައި ކުޅުނު މެެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި އާސެނަލް އިން ދެ ފަހަރެއްގެ މަތިން ލީޑު ވެސް ނެގި އެވެ. ނަމަވެސް ދެ ފަހަރު ވެސް ޕީއެސްވީން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ހަ ވަނަ މިނެޓުގައި އާސެނަލަށް ލީޑު ނަގައިދިނީ އޮލެކްސަންޑަ ޒިންޗެންކޯ އެވެ. އެއީ ރަހީމް ސްޓާލިން ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން ޕީއެސްވީން ނަތީޖާ ހަމަހަމަ ކުރީ އިވާން ޕެރިސިޗް ޖެހި ލަނޑުންނެވެ.

މެޗުގެ ފުރަތަމަ ހާފު ނިމުމުގެ ކުރިން ދެ ވަނަ ފަހަރަށް އާސެނަލަށް ލީޑު ނަގައިދިނީ ޑެކްލަން ރައިސް އެވެ. އެ ލަނޑު ޖަހަން ރައިސް އަށް ވެސް ފުރުސަތު ތަނަވަސްކޮށްދިނީ ސްޓާލިން އެވެ. އޭގެ ފަހުން މެޗުގެ 70 ވަނަ މިނެޓުގައި ޕީއެސްވީ އަށް ދެ ވަނަ ފަހަރަށް ނަތީޖާ ހަމަހަމަ ކޮށްދިނީ ކުހައިބް ޑިރޫޝް އެވެ.

މުބާރާތުގެ ކުއާޓާ ފައިނަލްގައި އާސެނަލް ނިކުންނާނީ އެންމެ ފަހުގެ ޗެމްޕިއަން ރެއާލް މެޑްރިޑާ ދެކޮޅަށެވެ.