އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން މެންޗެސްޓަރ ޔުނައިޓެޑު އެއްވަރު ވެއްޖެ އެވެ.

އެވަޓަންގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗު ނިމުނީ 2-2 އިން އެއްވަރުވެގެންނެވެ. މެޗުގައި އެވަޓަން އިން ވަނީ ޔުނައިޓެޑު ކޮޅަށް ދެ ލަނޑު ޖަހައިގެން ލީޑު ނަގައިފަ އެވެ. ނަމަވެސް ދެ ވަނަ ހާފުގައި ދެ ލަނޑު ޖަހައިގެން ޔުނައިޓެޑު ވަނީ މެޗު އެއްވަރު ކޮށްފަ އެވެ.

މެޗުގެ ފުރަތަމަ ހާފުގެ 19 ވަނަ މިނެޓުގައި އެވަޓަން އަށް ލީޑު ނަަގައިދިނީ ބެޓޯ އެވެ. އެއީ ޢަބްދުﷲ ޑޮކޫރޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން ފުރަތަމަ ހާފުގެެ 33 ވަނަ މިނެޓުގައި ޑޮކޫރޭ ވަނީ އެވަޓަންގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. 

މެޗުގައި ލަނޑު ޖެހުމަށް ޔުނައިޓެޑުން ކުރަމުން އައި މަސައްކަތް ކާމިޔާބު ކުރެވުނީ ދެ ވަނަ ހާފުގައި، މެޗުގެ 72 ވަނަ މިނެޓުގަ އެވެ. ޔުނައިޓެޑުގެ ފުރަތަމަ ލަނޑު ޖެހީ ޕޯޗުގަލްގެ ބްރޫނޯ ފެނާންޑޭސް އެވެ. އޭގެ ފަހުން މެޗުގެ ފަހު ދިހަ މިނެޓުގައި މެނުއަލް އުގާޓޭ ވަނީ ލަނޑު ޖަހައި މެޗުގެ ނަތީޖާ ޔުނައިޓެޑަށް ހަމަހަމަ ކޮށްދީފަ އެވެ.

މި ސީޒަންގައި އިންތިހާ އަށް ޔުނައިޓެޑުގެ ނަތީޖާތައް ދަށްވެފައިވާއިރު، އެ ޓީމު އޮތީ ލީގު ތާވަލްގެ 15 ވަަނަ މަގާމުގަ އެވެ. އެއީ މިހާތަނަށް އެ ޓީމު ކުޅެފައިވާ 26 މެޗުން 30 ޕޮއިންޓާ އެކު އެވެ. ހަމަ އެ އަދަަދަށް މެޗު ކުޅެގެން 14 ވަނައިގައި އެވަޓަން އަށް ލިބެނީ 31 ޕޮއިންޓެވެ.

މި ސީޒަންގައި ޔުނައިޓެޑު ވަނީ 12 މެޗަކުން ބަލިވެފަ އެވެ. އެކަމުގެ ސަބަބުން ޔުނައިޓެޑުގެ ކޯޗު ރުބެން އަމޯރިމް އަށް ޕްރެޝަރު ބޮޑުވަމުން އަންނަ ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ.