އިނގިރޭސި ޕްރިމިއާ ލީގުގައި އެވަންޓަންއާ ދެކޮޅަށް ކުޅުނު މެޗުން ޓޮޓެންހަމް ބަލިވެއްޖެ އެވެ.

އެވަޓަންގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗުގައި އެ ޓީމުން ވަނީ 3-2 އިން ޓޮޓެންހަމްގެ މައްޗަށް ކުރި ހޯދައިފަ އެވެ. މެޗުގައި އެވަޓަން އިން ވަނީ ތިން ލަނޑު ޖަހައިގެން ލީޑު ހޯދައިފަ އެވެ. އޭގެ ފަހުން ޓޮޓެންހަމް އިން ވަނީ ދެ ލަނޑު ޖަހައިފަ އެވެ.

މެޗު ފަށައިގެން 13 ވަނަ މިނެޓުގައި އެވަޓަން އަށް ލީޑު ނަގައިދިނީ ޑޮމިނިކް ކަލްވާޓް ލެވިން އެވެ. އޭގެ ފަހުން މެޗުގެ 30 ވަނަ މިނެޓުގައި އިލިމާން އެންޑިއާޔޭ ވަނީ އެވަޓަންގެ ދެ ވަނަ ލަނޑު ޖަަހައި ލީޑު ފުޅާ ކޮށްފަ އެވެ. މެޗުގައި އެވަޓަންގެ ތިން ވަނަ ލަނޑަކީ، ޓޮޓެންހަމްގެ އާޗީ ގްރޭ އަތުން ބައި ކޮޅަށް ވަތް ލަނޑެކެވެ.

މެޗުގެ ދެ ވަނަ ހާފުގައި ޓޮޓެންހަމް އިން ވަނީ ދެ ލަނޑު ޖަހައިފަ އެވެ. މެޗުގެ 77 ވަނަ މިނެޓުގައި ޓޮޓެންހަމްގެ ފުރަތަމަ ލަނޑު ޖެހީ ޑެޖާން ކުލުސެވްސްކީ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ޓޮޓެންހަމްގެ ދެ ވަނަ ލަނޑު ޖެހީ ރިޗާލިސަން އެވެ.

މި ނަތީޖާ އާއެކު ޓޮޓެންހަމް އޮތީ ލީގު ތާވަލްގެ 15 ވަަނައިގަ އެވެ. އެއީ މިހާތަނަށް ކުޅެފައިވާ 22 މެޗުން 24 ޕޮއިންޓާ އެކު އެވެ. ޓޮޓެންހަމަށް ވުރެ އެއް މެޗު މަދުން ކުޅެގެން 16 ވަނައިގައި އެވަޓަން އަށް ލިބެނީ 20 ޕޮއިންޓެވެ. މި ދެ ޓީމަށް ވެސް ލީގު ތާވަލްގައި ރެލިގޭޝަންގެ ބިރު އެބަ އޮތެވެ.