ނަތަންޔާހޫ ހައްޔަރުކުރުމާ މެދު އިސްރާއީލުން ކޮށްފައިވާ އިއުތިރާޒު ބަލައިނުގަތުމަށް އައިސީސީގެ ޗީފް ޕްރޮސެކިއުޓަރ ގޮވާލައްވައިފި

ޣައްޒާ ގައި ހިނގަމުންދާ 13 މަސްދުވަހުގެ ހަނގުރާމައާ ގުޅޭ ތަޙުޤީޤަށް ނަތަންޔާހޫ ހައްޔަރުކުރުމާ މެދު އިސްރާއީލުން ހުށަހަޅާފައިވާ އިއުތިރާޒުތައް ބަލައިނުގަތުމަށް އިންޓަރނޭޝަނަލް ކްރިމިނަލް ކޯޓުގެ ޗީފް ޕްރޮސެކިއުޓަރ އެކޯޓުގެ ފަނޑިޔާރުންނަށް ދަންނަވައިފިއެވެ.

ހޯމަ ދުވަހުގެ ރޭ ކަރީމް ޚާން ވަނީ އިސްރާއީލުން ހުށަހެޅި އިސްތިއުނާފަށް ރަސްމީ ޖަވާބެއް ހުށަހަޅުއްވާފައެވެ.

މި އިސްތިއުނާފަކީ ދަ ހޭގްގައި ހުންނަ ކޯޓުގެ އިޚްތިޞާޞާ ގުޅޭގޮތުން އިސްރާއީލުން ހުށަހެޅި އިސްތިއުނާފެކެވެ.

ކޯޓުގެ ފަނޑިޔާރުން ވަނީ ފާއިތުވި އަހަރު އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ އާއި، އޭނާގެ ކުރީގެ ދިފާއީ ވަޒީރު އަދި ހަމާސްގެ އަސްކަރީ އިސްވެރިޔާ ހައްޔަރުކުރުމުގެ ވޮރަންޓް ނެރެފައެވެ.

ހައްޔަރު ކުރުމުގެ އަމުރު ނެރުނު ފަރާތްތަކަށް ތުހުމަތުކުރެވެނީ ޣައްޒާ ގައި ހިނގަމުންދާ ހަނގުރާމައާ ގުޅިގެން އިންސާނިއްޔަތާ ޚިލާފު ކުށްތަކެއް ކުރިކަމަށެވެ.

އަމިއްލަ ޤައުމުގައިވެސް ކޮރަޕްޝަންގެ ތުހުމަތުތަކާ ކުރިމަތިލާންޖެހިފައިވާ އިސްރާއީލުގެ ލީޑަރު މި އަމުރު ނެރުމާ ގުޅިގެން "ދުނިޔޭގެ ތާރީޚުގައި ކަޅު ދުވަހެއް" ކަމުގައި ވިދާޅުވެ، މި ތުހުމަތުތަކާ ދެކޮޅަށް ހަނގުރާމަކުރައްވާނެ ކަމަށް ވިދާޅުވެފައިވެއެވެ.

އައިސީސީ އިން ބަލާ މައްސަލަތަކުގައި ވަކިވަކި ފަރުދުންނަކަށް އެ ކޯޓުން ނެރޭ ހައްޔަރުކުރުމުގެ ވޮރަންޓަކަށް އިއުތިރާޒެއް ނުކުރެވޭނެއެވެ. ނަމަވެސް އިސްރާއީލު ދައުލަތަށް މުޅި ތަޙުޤީޤަށް އިއުތިރާޒުކުރެވިދާނެއެވެ. އިސްރާއީލުން ޑިސެމްބަރު މަހު ހުށަހެޅި އިސްތިއުނާފުގެ ލިޔުމުގައި ބުނެފައިވަނީ އެ ޤައުމުގެ ލީޑަރުންނާ ދެކޮޅަށް ކުރެވޭ ތުހުމަތުތައް އެ ޤައުމުގައި އަމިއްލައަށް ބެލިދާނެ ކަމަށާއި، އިސްރާއީލުގެ ރައްޔިތުންނާ ދެކޮޅަށް ތަޙުޤީޤު ކުރިއަށްގެންދިއުމަކީ ދައުލަތުގެ މިނިވަންކަމަށް އަރައިގަތުން ކަމަށެވެ.

އައި.ސީ.ސީ އުފެދުނީ 2002 ވަނަ އަހަރު، ދުނިޔޭގައި ހިންގާ އެންމެ ނުރައްކާތެރި، އަނިޔާވެރި ޖަރީމާތަކުގެ ޒިންމާ އުފުލަންޖެހޭ ފަރުދުންނާމެދު ދަޢުވާކުރުމަށް އޮތް އެންމެ ފަހުގެ ފުރުޞަތުގެ ގޮތުގައި އުފެދުނު ދާއިމީ ކޯޓެއްގެ ގޮތުގައެވެ. މީގެ ތެރޭގައި ހަނގުރާމައިގެ ކުށްތަކާއި، އިންސާނިއްޔަތާ ޚިލާފު ކުށްތަކާއި، ނަސްލު ނައްތާލުމުގެ ކުށްތަކާއި، އަދި އަނިޔާވެރިކަމުގެ ކުށްތައް ހިމެނެއެވެ.

ކޯޓުގެ 125 މެންބަރު ޤައުމުތަކުގެ ތެރޭގައި ފަލަސްޠީނާއި، ޔޫކްރެއިނާއި، ކެނެޑާ އަދި ޔޫރަޕިއަން ޔޫނިއަންގެ ހުރިހާ ޤައުމުތައް ހިމެނެއެވެ. ނަމަވެސް އެތައް ޤައުމަކުން ކޯޓުގެ އިޚްތިޞާޞް ޤަބޫލުނުކުރެއެވެ. މީގެ ތެރޭގައި އިސްރާއީލާއި، އެމެރިކާ އާއި، ރަޝިޔާ އަދި ޗައިނާ ހިމެނެއެވެ.

ޚާންގެ 55 ޞަފްޙާގެ ޖަވާބުގައި ވިދާޅުވެފައިވަނީ، އައި.ސީ.ސީ އުފެއްދި ރޯމް ސްޓެޓިއުޓުން ކޯޓަށް ހުއްދަދީފައިވަނީ މެންބަރު ޤައުމުތަކުގެ ސަރަޙައްދުގައި ހިނގާ ކުށްތަކާ ގުޅޭގޮތުން ދަޢުވާކުރުމަށް ކަމަށާއި، ކުށްކުރި މީހުންގެ ޤައުމަކީ ކޮބައިކަން ބެލުން މުހިންމެއް ނޫން ކަމަށެވެ.

ކުރިއަށް އޮތް މަސްތަކުގައި ފަނޑިޔާރުން މިކަމުގައި ގޮތެއް ނިންމަވާނެ ކަމަށް ރިޕޯޓްތައް ބުނެއެވެ.