އާސެނަލް ކަޓުވާލައި، ޔުނައިޓެޑު އަނެއް ބުރަށް

އިނގިރޭސި އެފްއޭ ކަޕްގެ ތިން ވަނަ ބުރުގައި އާސެނަލާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން މުބާރާތުގެ އަނެއް ބުރުން ޖާގަ ހޯދައިފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި ކުޅުނު މެޗު ޔުނައިޓެޑުން ކާމިޔާބު ކުރީ ޕެނަލްޓީ ޖަހައިގެންނެވެ. މެޗުގެ ފުރިހަމަ ވަގުތު ހަމަވީއިރު، ދެ ޓީމު އޮތީ 1-1 އިން އެއްވަރުވެފަ އެވެ. ނަތީޖާ ނެރުމަށް ޖެހި ޕެނަލްޓީ ޔުނައިޓެޑުން ކާމިޔާބު ކުރީ 5-3 އިންނެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ޔުނައިޓެޑުންނެވެ. މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ޔުނައިޓެޑަށް ލީޑު ނަގައިދިނީ ބްރޫނޯޯ ފެނާންޑޭސް އެވެ. އޭނާ އެ ލަނޑު ޖަހަން ފުރުސަތު ތަނަަވަސްކޮށްދިނީ އަލެހާންދްރޯ ގާނާޗޯ އެވެ. މެޗުގައި ޔުނައިޓެޑަށް އެންމެ ބޮޑު ގެއްލުމެއް ދެއްކީ، މެޗުގެ 61 ވަނަ މިނެޓުގައި އެ ޓީމުގެ ޑިއޭގޯ ޑަލޮޓް އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ

އެއް ކުޅުންތެރިޔަކު މަދުކޮށް ކުޅެމުން ދިޔަ ޔުނައިޓެޑު ކޮޅަށް ލަނޑު ޖަހައި، އާސެނަލް އިން ނަތީޖާ ހަމަހަމަ ކުރީ 63 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ ގަބްރިއަލް މަގާޅައެސް އެވެ. އޭގެ ފަހުން މެޗުގައި ލީޑު ނަގާނެ ފުރުސަތު ވެސް އާސެނަލަށް ލިބުނެވެ. މެޗުގެ 70 ވަނަ މިނެޓުގައި އާސެނަލަށް ލިބުނު ޕެނަލްޓީ މާޓިން އޮޑެގާޑް ފޮނުވާލި ނަމަވެސް، އެ ޕެނަލްޓީ ކާމިޔާބުވާ ގޮތެއް ނުވި އެވެ.

މެޗުގެ ނަތީޖާ ނެރުމަށް ޖެހި ޕެނަލްޓީގައި ޔުނައިޓެޑުން ވަނީ ފަސް ޕެނަލްޓީ ވެސް ކާމިޔާބު ކޮށްފަ އެވެ. އެއީ ފެނާންޑޭސް، އަމަދު ޑިއާލޯ، ލެނީ ޔޯރޯ، ލިސާންދްރޯ މާާޓިނޭޒް އަދޮ ޔޯޝުއާ ޒިރްކްޒީގެ ޕެނަލްޓީ އެވެ. އާސެނަލަށް ކާމިޔާާބު ކުރެވުނީ ތިން ޕެނަލްޓީ އެވެ. އެއީ އޮޑެގާޑް، ޑެކްލަން ރައިސް އަދި ތޯމަސް ޕާޓޭގެ ޕެނަލްޓީ އެވެ. އާސެނަލްގެ ކައި ހަވާޓްޒް ފޮނުވާލި ޕެނަލްޓީ ކާމިޔާބެއް ނުވި އެވެ.