ޣައިރު ދީނުގެ އީދުތަކުގައި ބައިވެރިވުމަކީ ހަރާމްކަމެއް، މިފަދަ އަމަލުތަކުން މުޖުތަމައު ސަލާމަތްކުރުމަށް މަސައްކަތް ކުރަންޖެހޭ: ޚުތުބާ

ޣައިރު ދީނުގެ އީދުތައް ފާހަގަކުރުމުގައި މުސްލިމުން ބައިވެރިވުމަކީ ހަރާމްކަމެއް ކަމަށާއި، މިފަދަ އަމަލުތަކުން މުޖުތަމައު ސަލާމަތްކުރުމަށް މަސައްކަތް ކުރަންޖެހޭ ކަމަށް ހުކުރު ޚުތުބާގައި ބުނެފިއެވެ.

''ޣައިރުދީންތަކުގެ ޝިޢާރުތައް ފާޅުކުރުން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ ޝަޢީރާއަކީ ދީނުގެ ކަންތައްތަކުގެ ތެރެއިން އެ ކަންތަކުގައި ހިފަހައްޓާން މާތް الله އަމުރުކުރައްވައިފައިވާ އެންމެހައި ކަންތައްތައް ކަމަށާއި މާތް اللهގެ ޝަޢީރާތަކަށް މާތްކޮށް ހިތުމަކީ މި ޝަޢީރާތަކަށް ހިތްތަކުގައި މަތިވެރި މަގާމު ދިނުން ކަމަށެވެ. ޚުތުބާގައި ބުނީ އިސްލާމްދީނުގެ ޝަޢީރާތަކުގެ ތެރޭގައި ވަކި މޫސުމަކާ ގުޅިފައިވާ ޝަޢީރާތައްވާ ކަމަށެވެ. އެގޮތުން ރަމަޟާން މަހުގެ ރޯދައަކީ ރަމަޟާން މަހާ ގުޅިފައިވާ ކަމެއް ކަމަށާއި، ހައްޖަކީ، ހައްޖު މޫސުމާ ގުޅިފައިވާ ކަމެއް ކަމަށެވެ.

ޞާލިޙު ކޮންމެ އަމަލަކީ اللهގެ ޝަޢީރާއެއްކަން ފާހަގަކޮށް ޚުތުބާގައި ބުނީ މާތް الله އެކަލާނގެ ޝަޢީރާތައް މާތްކުރައްވައިފައިވާތީ މުސްލިމުން ވެސް އެ ޝަޢީރާތައް މަތިވެރިކުރާން ޖެހޭނެ ކަމަށެވެ. މާތް الله އެކަލާނގެ ކަލާމްފުޅު، ކީރިތި ގުރްއާން، މަތިވެރިކުރައްވާއިރު، ޤުރްއާނަށް އިހާނެތިކޮށް ހިތުމުގެ ގޮތުން ކުރެވޭ ކޮންމެ އަމަލަކަށް ދެކޮޅުހަދަން ޖެހޭ ކަމަށް ޚުތުބާގައި ބުނެފައިވެއެވެ. މާތް اللهގެ ޝަޢީރާތަކުގެ ތެރޭގައި މިސްކިތްތައްވާ ކަމަށާއި، އެއީ ބިންމަތީގައި ހުރި އެކަލާނގެ ގެކޮޅުތައް ކަމަށެވެ. އަދި މިސްކިތްތަކަށް ވަދެ އެ ތަންތަން ނުތާހިރުކުރުމަކީ މި ޝަޢީރާއަށް އިހާނެތިކޮށް ހިތުން ކަމަށާއި، މި ކަންކަން ހުއްޓުވާން ޖެހޭ ކަމަށް ޚުތުބާގައި ބުނެފައިވެއެވެ.

މީގެ އިތުރުން ޚުތުބާގައި ބުނީ އިސްލާމްވަންތަކަމާއި ދީނީ ޝަޚްސިއްޔަތު ދެމެހެއްޓުމަކީ، އިސްލާމީ ޝަޢީރާގެ ތެރޭގައި ހިމެނޭ ކަމެއް ކަމަށާއި، މުސްލިމުން އެއްވެސް ކަމެއްގައި ޣައިރު ދީންތަކުގެ މީހުންނާ އެއްގޮތަށް އުޅެގެން ނުވާނެ ކަމަށެވެ. އެގޮތުން މުސްލިމުން ކްރިސްމަސް ފާހަގަކުރުމާއި މި އިޙުތިފާލުތަކުގައި ބައިވެރިވުމަކީ އިސްލާމްދީން ހުއްދަކުރާ ކަމެއްނޫން ކަމަށް ޚުތުބާގައި ބުނެފައިވެއެވެ. އަދި ކްރިސްމަސްގަހާއި ސެންޓަ ކްލޯސް ފަދަ ނަޞާރާއިން އެ މީހުންގެ ދީނަށް ނިސްބަތްކޮށް، ކުރާ ކަންތައްތައް މިއީދުގެ ތެރޭގައި ހިމެނޭ ކަމަށެވެ.

ޚުތުބާގައި ބުނީ ޣައިރު ދީނުގެ އީދުތައް ފާހަގަކުރުމުގައި މުސްލިމުން ބައިވެރިވުމަކީ ހަރާމްކަމެއް ކަމަށާއި، ޚާއްސަކޮށް މިފަދަ އަމަލުތަކުން ރާއްޖޭގެ މުޖުތަމައުތައް ސަލާމަތްކުރުމަށް މަސައްކަތް ކުރަންޖެހޭ ކަމަށެވެ.

ޚުތުބާގައި ބުނީ ދީނާ ޚިލާފު ފިކުރުތަކުގެ އަހުލުވެރިން މުސްލިމުންގެ ހިތްތަކަށް ވެރިވެގަތުމަށް ތަފާތު ދަޅަތަކާއި މަޅިތައް ޖަހައިގެން މުސްލިމުން އެ މީހުންގެ އަގީދާއާއި ދީން މަނާކުރާ ކަންތައްތަކުގެ ތެރެއަށް ވައްޓައިލުމަށް މަސައްކަތް ކުރާ ކަމަށެވެ. އަދި ހެޔޮ ލަފާ އިސްލާމީ މުޖުތަމައެއް ބިނާކުރެވޭނީ އިސްލާމީ ސަގާފަތް ފަތުރައިގެން ކަމަށާއި، އިސްލާމީ އަގީދާއާއި އަހުލާގުގެ މަތީގައި އާއިލާ ބިނާކުރެވިގެން ކަމަށް ޚުތުބާގައި ބުނެފައިވެއެވެ.