އަލް ފެއިހާ އަތުން މޮޅުވެ، އަލް ޙިލާލް އެއް ވަނައިގައި

ސައުދީ ޕްރޯ ލީގުގައި އަލް ފެއިހާއާ ދެކޮޅަށް ކުޅުނު މެޗުން މޮޅުވެ، އަލް ޙިލާލް އިން އެއް ވަނައިގައި ދެމި އޮވެއްޖެ އެވެ.

ހުކުރު ދުވަހުގެ ރޭ އަލް ފެއިހާއާ ދެކޮޅަށް ކުޅުނު މެޗު އަލް ޙިލާލް އިން ކާމިޔާބު ކުރީ 3-0ންނެވެ. އެ ޓީމުން މެޗުގެ ފުރަތަމަ ހާފުގައި އެއް ލަނޑު ޖެހިއިރު، އަނެއް ދެ ލަނޑު ވެސް ޖެހީ ފަހު ހާފުގަ އެވެ.

މެޗު ފަށައިގެން ފަސް ވަނަ މިނެޓުގައި އަލް ޙިލާލަށް ލީޑު ނަގައިދިނީ މާކޮސް ލިއޮނާޑޯ އެވެ. އޭގެ ފަހުން ފުރަތަމަ ހާފުގައި ވެސް އެ ޓީމުން ވަނީ އިތުރު ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ. މެޗުގައި އަލް ޙިލާލްގެ ދެ ވަނަ ލަނޑު، 65 ވަނަ މިނެޓުގައި ޖެހީ ސަލީލް އަލް ދައުސާރީ އެވެ. އަދި އެ ޓީމުގެ ފަހު ލަނޑު މެޗުގެ 81 ވަނަ މިނެޓުގައި ޖެހީ މުޙައްމަދު އަލް ޤަޓާނީ އެވެ.

މޮޅާއެކު އަލް ޙިލާލް އެއް ވަނައިގައި އޮތީ ތިން ޕޮއިންޓުގެ ލީޑަކުންނެވެ. އެއީ މިހާތަނަށް ކުޅުނު ހަތް މެޗުން 21 ޕޮއިންޓާ އެކު އެވެ.