17 އަހަރުން ދަށުގެ ޓީމު ސިލެކްޝަންސް ހެދީ ކޯޗެއް ނޫން؟
2 ސެޕްޓެމްބަރު 2024 | ހޯމަ 08:32މުހައްމަދު އާދަމަށް ކޯޗުކަން ދިނުމުން ރާއްޖޭގެ ކޯޗުން ދަނީ އެކަމާ ނުރުހުން ފާޅުކުރަމުންނެވެ.
17 އަހަރުން ދަށުގެ ޓީމުގެ ކޯޗު މުހައްމަދު އާދަމް
ސާފް ޗެމްޕިއަންޝިޕުގައި ވާދަކުރަން ތައްޔާރުވާ ރާއްޖޭގެ 17 އަހަރުން ދަށުގެ ގައުމީ ފުޓްބޯޅަ ޓީމުގެ ސިލެކްޝަންސް ހެދީ ކޯޗު މުހައްމަދު އާދަމް ނޫން ކަން ރާއްޖޭގެ މަޝްހޫރު ކޯޗުން ބުނަން ފަށައިފި އެވެ.
މި މައްސަލައިގެ ބާވަތުން ނަން ހާމަކުރަން ނޭނދޭ ފުޓްބޯޅައިގެ އިސް އޮފިޝަލަކު ރާއްޖެ އެމްވީއާ ވާހަކަ ދައްކަމުން ބުނީ ޓީމުގެ ސިލެކްޝަންސް ހެދީ ވިކްޓަރީގެ ކުރީގެ ކޯޗު މުހައްމަދު އާތިފް ކަމަށެވެ.
17 އަހަރުން ދަށުގެ ޓީމުގެ ކޯޗުކަން މުހައްމަދު އާދަމަށް ދިނުމުން ރާއްޖޭގެ ކޯޗުން ދަނީ ނުރުހުން ފާޅު ކުރަމުންނެވެ. ވިކްޓަރީގެ ކުރީގެ ކެޕްޓަން އަދި ކުރިއަރަމުން އަންނަ ޒުވާން ކޯޗު ސޮބާހް މުހައްމަދު ބުނީ މިއީ ޑީލެއް ކަމަށެވެ.
ރާއްޖެއެމްވީ އަށް އެނގިފައިވާ ގޮތުގައި މުހައްމަދު އާދަމްގެ ޓްރޭނިންތަކާމެދު ކުޅުންތެރިން ވެސް ތިބީ ނުރުހިފަ އެވެ. މިކަމާހުރެ ކުޅުންތެރިންގެ ބެލެނެވެރިން ޕެޓިޝަނެއް ހެދުމަށް މިދިޔަ ހަފުތާގައި މަސައްކަތްކޮށްފައިވެ އެވެ.
ރާއްޖޭގެ ކުރީގެ އެއްވަނަ ފޯވަޑް އަދި 19 އަހަރުން ދަށުގެ މުބާރާތުގެ ޗެމްޕިއަންކަން ހޯދާފައިވާ ކޯޗު އާދަމް އަބްދުއްލަތީފް (ލައްޗޭ) ވެސް ވަނީ އެފްއޭއެމުން އުމުރު ފުރާގެ ޓީމުތަކަށް ކޯޗުން ހަމަޖައްސާ ގޮތާމެދު ހިތްހަމަ ނުޖެހުން ފާޅުކޮށްފަ އެވެ.
މުހައްމަދު އާދަމަށް ކޯޗުކަން ދޭން ނިންމީ ނިމިދޔަ އެފްއޭއެމުގެ މެނޭޖްމަންޓުންނެވެ. ކޯޗުކަން ދިނުމުގެ ކުރިން އޭނާ ހުރީ އެފްއޭއެމުގެ އަތޮޅު މުބާރާތް ހިންގައިދޭ ކޮންސަލްޓަންޓަކަށެވެ. އެ މުބާރާތް ވަކި ހިސާބަކުން ހުއްޓާލިއިރު މުހައްމަދު އާދަމް ވެސް އެފްއޭއެމުން ވެސް އެއްވެސް އެއްޗެއް ނުބުނެ އެވެ. އޭނާގެ ކޯޗިން މިހާތަނަށް ފެންނަން އޮތީ ދެ ކުލަބަކުންނެވެ. އެއީ ވިކްޓަރީ އާއި ޔުނައިޓެޑް ވިކްޓަރީންނެވެ. މި ޓީމުގައި ހައެއްކަ މެޗަށް ފަހު އޭނާ ވަނީ ކޯޗުކަން ދޫކޮށްލައިފަ އެވެ. އެންމެ ފަހުން ކުލަބެއްގައި ހުރީ ވިކްޓަރީގެ ޓެކްނިކަލް ޑައިރެކްޓަރަކަށެވެ. މީގެ އިތުރުން އޭނާ ވަނީ 2013 ވަނަ އަހަރު ލަންކާގެ ކުލަބުތައް ކުޅުނު ގޯލްޑްކަޕް ކިޔާ މުބާރާތެއްގެ ޗެމްޕިއަންކަން އެ ގައުމުގެ ޖާވާލޭން ހޯދައިދީފަ އެވެ. ނަމަވެސް ރާއްޖެއަށްވުރެ އެތައް ގޮތަކުން ފުޓްބޯޅައިގެ ހާލަތު ދަށްވެފައި އޮތް ލަންކާގައި ކުޅުނު މި މުބާރާތަކީ ކޮން ފެންވަރެއްގެ މުބާރާތެއް ކަމެއް ނޭނގެ އެވެ.
ރާއްޖޭގެ ފުޓްބޯޅަ އެސޯސިއޭޝަނުގެ ދައުރު ހަމަވެ، ނޯމަލައިޒޭޝަން ކޮމިޓީން ހިންގުމާ ހަވާލުވުމާ ދެމެދު ދިޔަ މަހެއްހާ ދުވަހުގެ ތެރޭގައި އެފްއޭއެމުގެ ކަންކަން ބަލަހައްޓާނެ މީހަކުނެތި އެމީހަކު ބޭނުން ގޮތަކަށް ކަންކަން ކުރި މަންޒަރު ވަނީ ފެނިފަ އެވެ. މި ގޮތުން އެފްއޭއެމްގެ އިމާރާތުން ގިނަ އަދަދެއްގެ ތަކެތި ނެރެ ހެކި ނައްތާލިކަމުގެ ތުހުމަތު ވެސް ވަނީ އެޅިފަ އެވެ.
