އާބަން ޑިވެލޮޕްމަންޓް ބިލުން ލާމަރުކަޒީ ނިޒާމު ފުޑާލާނެ، މިއީ ޑިމޮކްރަސީއަށް ދޭ ނުރައްކާތެރި ހަމަލާއެއް: ފައްޔާޒު
21 އޯގަސްޓު 2024 | ބުދަ 19:04މިއީ އަތްއުރާލައިގެން ތިބެވޭވަރުގެ ކަމެއް ނޫން
ބުދަ ދުވަހުގެ ރޭ ކުރިއަށް ގެންދިޔަ ގައުމީ މަޖިލިސް ބައްދަލުވުމުގެ ތެރެއިން
އާބަން ޑިވެލޮޕްމަންޓް ނަމުގައި ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ބިލުން ލާމަރުކަޒީ ނިޒާމު ފުޑާލާނެ ކަމަށާއި، މިއީ ޑިމޮކްރަސީއަށް ދޭ ނުރައްކާތެރި ހަމަލާއެއް ކަމަށް އެމްޑީޕީގެ ޗެއަރޕާސަން ފައްޔާޒު އިސްމާއިލް ވިދާޅުވެއްޖެއެވެ.
ބުދަ ދުވަހުގެ ރޭ ކުރިއަށް ގެންދިޔަ އެމްޑީޕީގެ ގައުމީ މަޖިލީހުގައި ފައްޔާޒު ވިދާޅުވީ މިސަރުކާރުން މަސައްކަތް ކުރަމުންދަނީ މުޅި ލާމަރުކަޒީ ނިޒާމު ފުޑުފުޑު ކޮށްލުމަށް ކަމަށާއި، އެމަންޒަރު މިހާރު ފެންނަމުންދާ ކަމަށެވެ.
އާބަން ސެންޓަރުގެ ގޮތުގައި ކަނޑައެޅޭ ބައެއް ސަރަހައްދުތަކުގެ ކަންކަން ސަރުކާރަށް ނިންމޭ ގޮތަށް އޮތުމުން ބައެއް ކައުންސިލަރުން ވެސް ކަންބޮޑުވުންފާޅުކޮށްފައިވާތީ އެކަމާ ގުޅިގެން ފައްޔާޒު ވިދާޅުވީ މިއީ ކަންބޮޑުވުމެއް ކަމަށާއި، އަތްއުރާލައިގެން ތިބެވޭވަރުގެ ކަމެއް ނޫން ކަމަށެވެ، އަދި އެފަދަ ބަދަލެއް ގެނައުން ނުދިނުމަށް ކުރަންޖެހުނު ހުރިހާ ކަމެއް ކުރާނެ ކަމަށް ފައްޔާޒު ވިދާޅުވިއެވެ.
މީގެ އިތުރުން ފައްޔާޒު ވިދާޅުވީ އެމްޑީޕީން އަބަދުވެސް މަސައްކަތް ކުރަނީ ޑިމޮކްރަސީ ކުރިއެރުވުމަށް ކަމަށެވެ. އެގޮތުން ފާއިތުވި 5 އަހަރު ލާމަރުކަޒީ ނިޒާމަށް ދިން ބާރުތައް ފައްޔާޒު ފާހަގަކުރެއްވިއެވެ.
ފައްޔާޒު ވިދާޅުވީ ޑިމޮކްރަސީ ހިފަހައްޓާ ކުރިއެރުވުމަށް ލާމަރުކަޒީ ނިޒާމާ ކައުންސިލަރުން ރޯލު ވަރަށް މުހިންމު ކަމަށެވެ. ނަމަވެސް އާބަން ޑިވެލޮޕްމަންޓް ނަމުގައި ހުށަހަޅާފައިވާ ބިލަކީ ޑިމޮކްރަސީއަށް ދޭ ނުރައްކާތެރި ހަމަލާއެއް ކަމަށް ފައްޔާޒު ވިދާޅުވިއެވެ.
