މަގުމަތީގައި އުޅޭ ބުޅަލުގެ މައްސަލަ ހައްލު ކުރަން ހަދާ "ކެޓް ޝެލްޓަރ" ގެ މަސައްކަތުގެ 70 އިންސައްތަ މަސައްކަތް ނިމިއްޖެ: މޭޔަރ އާޒިމް
މިއީ އާޒިމްގެ މާލޭ ސިޓީ މޭޔަރ ކަމުގެ އިންތިޚާބުގެ ވައުދެއް
މާލޭގެ މަގުތަކުގައި އުޅޭ ބުޅާތަކުގެ ސަބަބުން މީހުންނަށް ކުރިމަތިވާ އުނދަގޫތައް ވަރަށް ބޮޑު
މާލޭގެ މަގުތަކުގައި އުޅޭ ބުޅަލުގެ މައްސަލަ ހައްލު ކުރަން ހަދާ "ކެޓް ޝެލްޓަރ" ގެ މަސައްކަތުގެ 70 އިންސައްތަ މަސައްކަތް ނިމިއްޖެ ކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެއެވެ.
ލޮނުޒިޔާރަތް ޕާކުގައި ބޭއްވި މާލެ ސިޓީ ކައުންސިލްގެ ރައްޔިތުންގެ ބައްދަލުވުމުގައި އާދިއްތަ ދުވަހުގެ ރޭ ވާހަކަ ދައްކަވަމުން، ރާއްޖެއާއި ރާއްޖެއިން ބޭރުން އަންނަ މީހުން އެންމެ ގިނައިން ޒިޔާރަތް ކުރާ ރަށަކީ މާލެ ކަމަށް ވެފައި، މާލެއިން ލިބޭ ކޮންމެ ފަސޭހައަކީ އަދި ކޮންމެ އުނދަގުލެއްމެ އެންމެން ތަޙައްމަލް ކުރަންޖެހޭ ކަމަކަށް ވާއިރު، މި ހުރިހާ ފަރާތްތަކަށް ވެސް، މާލޭގެ މަގުތަކުގައި އުޅޭ ބުޅާތަކުގެ ސަބަބުން ކުރިމަތިވާ އުނދަގޫތައް ވަރަށް ބޮޑު ކަމަށް ވުމާއެކު، މިކަން ހައްލު ކުރުމަށް ހަދާ "ކެޓް ޝެލްޓަރ" ގެ 70 އިންސައްތަ މަސައްކަތް މިހާރު ނިމިފައިވާ ކަން އާޒިމް ފާހަގަ ކުރެއްވިއެވެ.
މާލޭ ސިޓީ މޭޔަރ ކަމުގެ އިންތިޚާބުގެ ވައުދެއްގެ ގޮތުން، އިންތިޚާބު ކާމިޔާބު ކުރެއްވުމަށް ފަހު އާޒިމް ފެއްޓެވި މި މަސައްކަތް ނިންމާލެވި، އަންނަ ސެޕްޓެމްބަރު މަހުގެ ތެރޭގައި އެތަނުގެ ބޭނުން ހިފަން ފެށޭނެ ކަމަށް މާލޭ ސިޓީ ކައުންސިލުން ކުރިން ވަނީ ހާމަކޮށްފައެވެ.
