އާސަހަރާގެ މަސައްކަތް ނިންމަން އަނެއްކާވެސް ދިނީ ތާރީޚެއް
ކޮންސްޓްރަކްޝަން މަސައްކަތް މި މަހުގެ 7 ގައި ނިމޭނެ
އާސަހަރާ
މޫސުން ރަނގަޅު ނަމަ އާސަހަރާގެ ކޮންސްޓްރަކްޝަން މަސައްކަތްތައް މި މަހުގެ 7 ވަނަ ދުވަހަށް ނިމޭނެކަމަށް މާލެ ސިޓީ ކައުންސިލުން ބުނެފިއެވެ.
އާސަހަރާ މަރާމާތުކުރުމަށް ބަންދުކޮށް އެތަނުގައި މީހުން ވަޅުލުން ވަގުތީ ގޮތުން ހުއްޓާލީ މިދިޔަ އަހަރުގެ މެއި މަހުގައެވެ. އާސަހަރާ ވަގުތީގޮތުން ބަންދުކޮށްފައިވާތީ މީހުން ވަޅުލާނީ ހުޅުމާލޭ ސަހަރާގައެވެ.
ނަމަވެސް މިހާތަނަށް އައި އިރު އާސަހަރާގެ މަސައްކަތް ނުނިމި ދެ ފަހަރެއްގެ މަތިން އެތަނުގެ މަސައްކަތް ބަޔަކާއި ހަވާލުކޮށްފައިވެއެވެ. މެއި މަހު އާސަހަރާ ބަންދުކޮށް އެތަނުގެ މަރާމާތު ނިމި 2 މަސް ފަހުން ހުޅުވޭނެކަމަށް އެއިރު ސިޓީ ކައުންސިލުން ބުނެފައިވެއެވެ.
އާސަހަރާގެ މަސައްކަތް ނުނިމި ދިގުލައިގެން ގޮސްފައިވާ އިރު، މި ފަހުން ކުރި އިރުވައިމޫސުމުގެ ވިއްސާރައިގައި، ހުޅުމާލެ ސަހަރާގައި މީހުން ވަޅުނުލެވިގެން އާސަހަރާގައި އަނެއްކާވެސް މީހުން ވަޅުމުގެ މަސައްކަތް ވަނީ ފަށާފައެވެ. އެއީ ވިއްސާރަވެ ފެން ތިލަވުމުގެ ސަބަބުން ހުޅުމާލޭ ސަހަރާ ފޫޓަކަށް ވުރެ އަޑިއަށް ކޮނުމާއެކު ފެން އަރާ މީހުން ވަޅުލުމުގައި ދަތިތައް ދިމާވާތީއެވެ.
މި މައްސަލައާއި ގުޅިގެން ސިޓީ ކައުންސިލުން ބުނީ ކޮންސްޓްރަކްޝަން މަސައްކަތް 1 ޑިސެމްބަރުގައި ހަވާލުކޮށްގެން މި ޖެނުއަރީ މަހުގެ 7 ވަނަ ދުވަހު ނިންމަން ހަވާލުކޮށްފައިވާ ކަމަށެވެ. ސިޓީ ކައުންސިލުން ބުނީ ކޮންސްޓްރަކްޝަންގެ މަސައްކަތް ނިމި ދެން ކުރިއަށްދާނީ ފިނިޝިންގ މަސައްކަތް ކަމަށެވެ.
އާސަހަރާއަށް ބޮޑެތި ބަދަލުތަކެއް ގެންނަން ކައުންސިލުގެ އާންމު ޖަލްސާގައި ނިންމައި، އެ މަޝްރޫއުގެ ދަށުން އިމާރާތަށް ގެންނަން ޖެހޭ ބަދަލުތައް ގެނައުމުގެ މަސައްކަތް ފެށިއެވެ. މާލެ ސިޓީގެ މޭޔަރުކަމުގައި ހުންނަވައިގެން މިހާރުގެ ރައީސް ޑރ. މުހައްމަދު މުއިއްޒު ފެއްޓެވި މި މަސައްކަތް ނުނިމި ދިގުލައިގެން ގޮސް ރައްޔިތުން ދަނީ އެތަކެއް ތަކުލީފުތަކެއް އުފުލަމުންނެވެ.
