ހުޅުމާލެ، ވިލިމާލެ އަދި ތިލަފުށީގައި ފައިލޭރިއާއަށް ޓެސްޓު ކުރުމުގެ މަސައްކަތްކުރަނީ
24 ޑިސެމްބަރު 2023 | އާދީއްތަ 02:10ހެލްތް ޕްރޮޓެކްޝަން އެޖެންސީ އެޗްޕީއޭއިން އެ މަސައްކަތް ކުރަން ތައްޔާރުވެފައި މި ވަނީ ހުޅުމާލެއިން ވެސް މި ބައްޔަށް ޕޮޒިޓިވް މީހަކު ފެނުމާއި ގުޅިގެން
މަދިރި
ހުޅުމާލެ، ވިލިމާލެ އަދި ތިލަފުށީގައި ފައިލޭރިއާއަށް ޓެސްޓު ކުރުމުގެ މަސައްކަތްކުރަން ނިންމައިފިއެވެ.
ހެލްތް ޕްރޮޓެކްޝަން އެޖެންސީ އެޗްޕީއޭއިން އެ މަސައްކަތް ކުރަން ތައްޔާރުވެފައި މި ވަނީ ހުޅުމާލެއިން ވެސް މި ބައްޔަށް ޕޮޒިޓިވް މީހަކު ފެނުމާއި ގުޅިގެންނެވެ.
ހުޅުމާލެ އިން ފައިލޭރިއާ އަށް ޕޮޒިޓިވްވި މީހާއާއެކު މިހާތަނަށް ފައިލޭރިއާ ޖެހިފައިވާ 26 މީހަކު ރާއްޖެ އިން ވަނީ ފެނިފައެވެ. ފައިލޭރިއާ ޖެހިފައިވާ ބަޔަކު މީގެ ދުވަސްކޮޅެއް ކުރިން އެންމެ ފުރަތަމަ ފެނުނީ ކުޅުދުއްފުށި ސިޓީންނެވެ. ކުޅުދުއްފުށިން ފައިލޭރިއާގެ ކޭސްތަކެއް ފެނިފައިވަނީ ބިދޭސީ މަސައްކަތްތެރިންނަށް ހާއްސަކޮށްގެން ކުރިއަށްގެންދިޔަ ސްކްރީނިންގ ކޭމްޕެއްގެ ތެރެއިންނެވެ.
އެގޮތުން ބައްޔަށް ޕޮޒިޓިވްވި ފަރާތްތައް ރާއްޖެ އައީ ފައިލޭރިއާ އާއްމުކޮށް ފެންނަ ޤައުމުތަކުން ކަމަށް އެޗްޕީއޭއިން ވަނީ ބުނެފައެވެ.
ފައިލޭރިއާއަކީ 2016 ވަނަ އަހަރު ރާއްޖެއިން ނައްތާލެވިފައިވާ ކަމަށް ޑަބްލިއުއެޗްއޯއިން ކަނޑައަޅާފައިވާ ބައްޔެކެވެ.
