މާލެ ސިޓީ ކައުންސިލް އޮތީ އާއްމުން އެތަނަކީ އޮތްތަނެއް ކަަމަށް ޤަބޫލު ނުކުރާ ހާލުގައި - އާޒިމް
ފުށިދިއްގަރުފަޅު ހިއްކަމުން ދަނީ ރައީސް ޑރ.މުހައްމަދު މުއިއްޒުގެ ހުވަފެނެއްް ހަގީގަތަކަށް ހެދުމަށް ކަމަށް އާޒިމް ވިދާޅުވި
އެމްޑީޕީގެ މޭޔަރު ކެންޑިޑޭޓް އަދި އެމްޓީސީސީގެ ކުރީގެ ސީއީއޯ އާދަމް އާޒިމް
މާލެ ސިޓީ ކައުންސިލް އޮތީ އާއްމުން މިއަދު އޮތްތަނެއް ކަަމަށް ޤަބޫލު ނުކުރާ ހާލުގައި އެމްޑީޕީގެ މޭޔަރު ކެންޑިޑޭޓް އަދި އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
މާފަންނުގައި ބޭއްވި ކަންމަތީ ބައްދަލުވުމުގައި ވާހަކަދައްކަވަމުން، މިއަދު މާލެ ސިޓީ ކައުންސިލޭ ބުނުމުން އާއްމުން އިސް ޖަހާލާ ކަމަށާއި އެތަނާއި މެދު ދެރަވެ ހިތާމަކުރާ ކަމަށް އާޒިމް ވިދާޅުވިއެވެ. އޭގެ ބަދަލުގައި އެތަނަކީ އާއްމުން ބަލައިގަންނަ އިތުބާރުކުރާތަނަކަށް ހަދަން ޖެހޭ ކަމަށް އާޒިމް ވަނީ ވިދާޅުވެފައެވެ. ރައްޔިތުންނަށް ދޭ ޔަޤީންކަމަކީ މާލެ ސިޓީ ކައުންސިލަކީ ރައްޔިތުން ޤަދަރުކުރާ ތަނަކަށް އެތަން ހައްދަވާދެއްވާނެކަމުގެ ޔަޤީންކަން ކަމަށް ވެސް އާޒިމް ވިދާޅުވިއެެވެ. އާޒިމް ވަނީ އެކަން ކުރެވޭނެ ގޮތް އެމަނިކުފާނަށް އެނގިލައްވާ ކަމަށާއި އެމަނިކުފާނުގެ ހުރި ތަޖުރިބާ އެކަމަށް ބޭނުން ކުރައްވާނެ ކަމަށް ވިދާޅުވެފައެވެ.
މާލެ އަށް ދިމާވެފައިވާ މައްސަލަތައް ހައްލުކުރެވޭނީ ތަޖުރިބާ ހުރި ބޭފުޅަކަށް ކަަމަށާއި އެކަމަށްޓަކާ ބޭނުންވާ ތަޖުރިބާ އެމަނިކުފާނުގެ ކިބައިގައި ހުރި ކަމަށް އާޒިމް ވަނީ ފާހަގަކުރައްވާފައެވެ. ސިޓީ ކައުންސިލަށް އިތުބާރު ހޯދުމަށް އެތަނަކީ ދެ ފުށްފެންނަ ގޮތަށް ކަންކަން ހިނގާ، މަކަރާއި ހީލަތް ނުހަދާ ތަނަކަށް އެތަން ހައްދަވާނެ ކަަމަށް އާޒިމް ވިދާޅުވިއެވެ. އެމަނިކުފާނަށް މާލޭސިޓީގެ މޭޔަރކަން ލިބިވަޑައިގެންފި ނަމަ ސިޓީ ކައުންސިލްގެ ޚަރަދުތަކާއި އެތަނުގެ ބެލުމުގެ ދަށުގައި ހުރި ބިމުގެ ތަފްސީލް ހާމަކުރައްވާނެ ކަމަށް އާޒިމް ވިދާޅުވިއެވެ. އާޒިމް ވަނީ ކައުންސިލްގެ ހިންގުމުގެ އެއްވެސް ކަމެއް ސިއްރު ނުކުރައްވާނެ ކަމަށް ވެސް ވިދާޅުވެފައެވެ.
އިތުރަށް އާޒިމް ވިދާޅުވީ މާލޭގެ ރައްޔިތުންނާއި އަބަދުވެސް ގާތް ގުޅުމެއް ބާއްވާނެ ކަމަށެވެ. މިހާރުވެސް 300 އެއްހާގެއަށް މާލެ ސަރަހައްދުން ވަޑައިގަންނަވާފައިވާ ކަމަށާއި އެމަނިކުފާނު މަސައްކަތް ކުރަމުން ދަނީ އާއްމުންގެ ހުވަފެންތައް ހަގީގަތަކަށް ހަދަން ކަމަށް އާޒިމް ވިދާޅުވިއެވެ. އާޒިމް ވަނީ ފުށިދިއްގަރުފަޅު ހިއްކަމުން ދަނީ ރައީސް ޑރ.މުހައްމަދު މުއިއްޒުގެ ހުވަފެނެއްް ހަގީގަތަކަށް ހެދުމަށް ކަމަށާއި އެއީ އާއްމުންނަށް ހެޔޮއެދިވަޑައިގެން ރައީސް ކުރައްވާ ކަމެއް ނޫން ކަމަށް ސިފަކުރައްވާފައެވެ. ނަމަވެސް ރައްޔިތުންނަށް ފަސޭހަކަންކަން ކޮށްދޭނީ އެމްޑީޕީން ކަމަށާއި އެމްޑީޕީގެ މޭޔަރެއް ހޮވަންވީ އެ ސަބަބާއި ހުރެ ކަަމަށް އާޒިމް ވިދާޅުވިއެވެ.
