މާލެސިޓީގެ މީހުން ވަޅުލުމަށް ހާއްސަކުރެވިފައިވާ އާސަހަރާގެ ޖާގަ އިތުރުކުރުމަށް ކުރި އިއުލާނަށް އަންދާސީ ހިސާބު ހުށަހެޅި ފަރާތްތަކުގެ ތެރެއިން ބިޑް ކާމިޔަބުކުރި ފަރާތުން އެ މަސައްކަތް ފުރިހަމަކޮށްފައިނުވާތީ، މިހާރު ނުކުރެވި ހުރި މަސައްކަތްކޮށްދޭނެ ފަރާތެއް ހޯދުމަށް އަލުން ބީލަން ހުށަހެޅުމަށް މާލެ ސިޓީ ކައުންސިލުން ހުޅުވާލައިފިއެވެ.

އާސަހަރާ ތަރައްގީކުރުމުގެ މަސައްކަތް މެއި 27 ގައި ފެށުމަށް ނިންމައި، މަރާމާތުގެ މަސައްކަތް ނިމެންދެން މައްޔިތުންގެ ކަށުކަމާކެމީގެ ކަންކަން ހުޅުމާލޭ ސަހަރާގައި ކުރިއަށް ގެންދެވޭނެ އިންތިޒާމް މާލޭ ސިޓީ ކައުންސިލުން ހުޅުމާލެ އަށް ވަނީ ބަދަލުކޮށްފައެވެ. އޭރު ސިޓީ ކައުންސިލުން ބުނެފައިވަނީ ދެ މަސް ދުވަސްތެރޭގައި އެތަނުގެ މަސައްކަތް ނިންމާނެކަމަށެވެ. އާސަހަރާ މިސްކިތް ލަސްވާ ސަބަބު ދެނެގަތުމަށް އަދަދު ނޫހުން ސެޕްޓެމްބަރ މަހުގެ ފަހުކޮޅު ސުވާލުކުރުމުން އާސަހަރާގެ މަރާމާތުގެ މަސައްކަތް ނިންމުމަށް އަދި އިތުރު ދެ މަސްދުވަސް ނަގާނެ ކަމަށް ކައުންސިލުން ވަނީ ބުނެފައެވެ. ސަހަރާގެ މަސައްކަތް ދިގުލައިގެންދާ ސަބަބެއް ކަމަށް ސިޓީ ކައުންސިލުން ބުނީ މަޝްރޫއަށް އިތުރުކުރި ސްކޯޕުގެ ދަށުން މިސްކިތުގެ ޖާގަ އިތުރުކުރަން ނިންމާފައިވާ ދިމާލުގައި ހުރި އެމްޑަބްލިއުއެސްސީގެ "ބޯހޯލް" އެއްގެ މަސައްކަތް ކުރަމުންދާތީ ކަމަށެވެ. ނަމަވެސް ކުރަމުންދަނީ ބޯހޯލް އާ ގުޅޭ ކޮން މަސައްކަތެއް ކަން އޮފިޝަލު ސާފުކޮށް ދެއްވާފައެއް ނުވެއެވެ.

މިކަމާ ގުޅިގެން ސުވާލުކުރުމުން އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު ރާއްޖެއެމްވީއަށް ވިދާޅުވެފައިވަނީ އެ ބޯހޯލް އާ ހެދި ސަހަރާގެ މަސައްކަތަށް ބުރޫ ނާރާނެ ކަމަށާއި އެ މަސައްކަތް ލަސްވުމާއި ބޯހޯލްއާ ގުޅުމެއް ނެތް ކަމަށެވެ. މި މަސައްކަތް ހަވާލުކުރުމުގައި ކޮރަޕްޝަން ހިމެނޭކަމަށް ރާއްޖެއެމްވީއަށް މައުލޫމާތު ލިބުމާއި ގުޅިގެން އެކަން ސާފުކުރަން ރާއްޖެއެމްވީން ވަނީ މަސައްކަތްކޮށްފައެވެ. އެގޮތުން މި މަޝްރޫއު ހަވާލުކުރީ ކޮން ކުންފުންޏަކާތޯ އަދި މަޝްރޫއުގެ އަގަކީ ކޮބައިތޯ ކައުންސިލުން އޮޅުން ފިލުވުމަށް އެކި މެމްބަރުންނަށް ގުޅި ނަމަވެސް ޖަވާބެއް ނުލިބުނެވެ. ރާއްޖެއެމްވީން ގުޅުމުން މާލެ ސިޓީ ކައުންސިލުގެ ތަރުޖަމާނު މަރިޔަމް ޝިއުނާ ވިދާޅުވީ އެ މައުލޫމާތު ބެއްލުވުމަށްފަހު ހިއްސާ ކުރައްވާނެ ކަމަށެވެ. އެހެންނަމަވެސް ފަހުން ވަނީ ފޯމު ހުށަހަޅައިގެން އެ މައުލޫމާތު ހޯދުމަށް އެދިފައެވެ.

މަސައްކަތް ދިގުލައިގެން ގޮސްފައިވާއިރު ސިޓީ ކައުންސިލުން އޮކްޓޯބަރ 25 ވަނަ ދުވަހު ކުރި އިއުލާނުގައި ބުނެފައިވަނީ މައުލޫމާތު ސާފުކުރުން އޮކްޓޯބަރ 30 ވަނަ ދުވަހު އަދި އަގު ހުށަހެޅުން ނޮވެމްބަރ 2 ވަނަ ދުވަހު އޮންނާނެކަމަށެވެ.