މޮޅަށް ކުޅުނީ ނިއުކާސަލް، އެ ޓީމު މޮޅުވުން ހައްގު؛ ގާޑިއޯލާ

ކަރަބޯ ކަޕްގެ ތިން ވަނަ ބުރުގައި މޮޅަށް ކުޅުނީ ނިއުކާސަލް ޔުނައިޓެޑު ކަމަށާއި، އެ ޓީމަށް މޮޅުވުން ހައްގު ކަމަށް, މެންޗެސްޓަރ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ކަރަބޯ ކަޕްގެ ތިންވަނަ ބުރުގައި ނިއުކާސަލްއިން ވަނީ ސިޓީގެ މައްޗަށް ކުރި ހޯދައި، އެ ޓީމު މުބާރާތުން ކަޓުވާލާފައެވެ. އެ މެޗަށްފަހު ވާހަކަ ދައްކަމުން ގާޑިއޯލާ ބުނީ، މުބާރާތަކުން ކަޓައިފިނަމަ، ކޮންމެވެސް ވަރެއްގެ ނުތަނަވަސްކަމެއް އޮންނާނެ ކަމަށެވެ. ނަމަވެސް ސިޓީގެ އަމާޒަކީ ހަ ތަށި ކާމިޔާބު ކުރުން ނޫންކަމަށާއި، ތިން ތަށި ކާމިޔާބު ކުރެވުމުން އެ ޓީމު އޮތީ އުފަލުން ކަމަށްވެސް ގާޑިއޯލާ ވަނީ ބުނެފައެވެ. އޭނާ ބުނީ ސިޓީއާ ދެކޮޅަށް ނިއުކާސަލްއިން ކުޅުނީ ވަރަށް މޮޅަށް ކަމަށާއި، އެ ޓީމަށް މޮޅުވުން ހައްގުކަމަށެވެ.

މީގެ އިތުރުން އޭނާ ބުނީ ކަރަބޯ ކަޕުން ކެޓިނަމަވެސް، މި ސީޒަންގައި ސިޓީން ކުރަން ހުރި މަސައްކަތް ހުއްޓިގެން ނުވާނެ ކަމަށެވެ. ޚާއްސަކޮށް އިނގިރޭސި ޕްރިމިއާ ލީގާއި ޔުއެފާ ޗެމްޕިއަންސް ލީގު ދިފާއުކުރުމަށް ކުރަން ހުރި މަސައްކަތައިގެން ކުރިއަށް ދާންޖެހޭނެ ކަމަށް އޭނާ ވަނީ ބުނެފައެވެ. ގާޑިއޯލާ ފާހަގަކުރިގޮތުގައި ސިޓީއަށް ލިބޭނެ އެންމެ ބޮޑު އެއް ހިތްހަމަޖެހުމަކީ އެ ދެ ތަށި ދިފާއުކުރުމެވެ.

އޭނާ ބުނީ ސިޓީން ދެން ތައްޔާރުވާނީ ލީގުގައި ކުރިއަށް އޮތް މެޗަށް ކަމަށާއި، މެޗަކަށްފަހު މެޗަކައިގެން ކުރިއަށް ދާން ބޭނުންވާ ކަމަށެވެ.