ބިން ދޫކުރުމަށް ހުޅުމާލެއިން އިތުރު ބައެެއް ހިއްކަނީ
ހުޅުމާލެއިން އިތުރުކުރެވޭ ބިމާއެކު 1،500 ގޯތި ދޫކުރެވޭނެ
ޕްލޭނިންގ މިނިސްޓްރީން ހޯމަ ދުވަހު ބޭއްވި ނޫސްވެރިންގެ ބައްދަލުވުން
މާލެ ސަރަހައްދުން ގޯތި ދޫކުރުމުގެ މަސައްކަތަށް ހުޅުމާލެއިން އިތުރު ބައެއް ހިއްކުމުގެ މަސައްކަތް ކުރެވޭނެ ކަމަށް، ޕްލޭނިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
މާލޭ ސަހަރައްދުން ގޯތި ދޫކުރުމާ ގުޅޭގޮތުން ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަކަށް ޖަވާބުދެއްވަމުން މިނިސްޓަރު އަސްލަމް ވިދާޅުވީ، މާލޭ ސަހަރައްދުން ގޯތި ދޫކުރުމަށް ހަމަޖެހިފައިވަނީ ގިރާވަރުންނާއި، ގުޅީފަޅު އަދި ހުޅުމާލެއިން ކަމަށެވެ.
މިގޮތުން ގިރާވަރު ފަޅު ހިއްކުމުގެ މަސައްކަތް މިހާރުވެސް ކުރިއަށްދާކަމަށާއި، ޑްރެޖަރު މޮބިލައިޒްކޮށް، ގުޅީފަޅު ހިއްކުމުގެ މަސައްކަތްވެސް، ޖުލައި މަހުން ފެށިގެން ކުރިއަށްދާނެ ކަމަށެވެ. އަދި ހުޅުމާލޭ ދެވަނަ ފިޔަވަހިންވެސް ބައެއް ހިއްކުމުގެ މަސައްކަތް ކުރެވޭނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ ހުޅުމާލެއިން އިތުރުކުރެވޭ ބިމާއެކު 1،500 ގޯތި ހުޅުމާލެއިން ދޫކުރެވޭނެ ކަމަށެވެ.
ބިންވެރިޔާ ސްކީމުގެ ދަށުން 10،314 މީހުންނަށް ގޯތި ލިބެއެވެ. ގޯތި ލިބޭ މީހުންގެ ވަގުތީ ލިސްޓު މިހާރު އާންމުކޮށްފައިވާއިރު، ގޯއްޗަށް ޝަރުތު ހަމަވާ އެންމެންނަށް ގޯތި ދިނުމަށް ރައީސް ވަނީ ނިންމަވާފައެވެ. މިގޮތުން ޝަރުތުހަމަވާ އަނެއް 9،544 މީހުންނަށް ގޯތި ދޭނެކަމަށާއި، ހުޅުމާލެއިން އިތުރުކުރެވޭ ބިން މި މަސައްކަތަށް ބޭނުންކުރެވޭނެ ކަމަށް މިނިސްޓަރ ވިދާޅުވިއެވެ.
މާލޭ ސަރަހައްދުން 5،000 ގޯތި ދޫކުރުމަށް ނިންމާފައިވާއިރު ހުޅުމާލެއިން މަދުވެގެން 1,000 ގޯތި، ގުޅީފަޅުން މަދުވެގެން 2,000 ގޯތި އަދި ގިރާވަރު ފަޅު ހިއްކައި، އެބިމުންވެސް މަދުވެގެން 2,000 ގޯތި މާލޭ ރަށްވެހިންނަށް ދެއްވުމަށް ރައީސް ވައުދުވެވަޑައިގެންނެވިއެވެ.
