އީޕީއޭ އަށް މި އަހަރު އެންމެ ގިނައިން ހުށަހެޅިފައިވަނީ ގަވާއިދާއި ޚިލާފަށް ރުއްގަސް ނެގުމުގެ މައްސަލަ
ދިރުންތަކަށް ލިބޭ ގެއްލުމުގެ އަސަރު ތިމާވެއްޓަށް ވަރަށް ބޮޑަށް ކުރޭ
އީޕީއޭގެ ޑިރެކްޓަރ ޖެނެރަލް އިބްރާހީމް ނައީމް
އެންވަޔަރަމެންޓް ޕްރޮޓެކްޝަން އެޖެންސީ (އީޕީއޭ) އަށް މި އަހަރު އެންމެ ގިނައިން ހުށަހެޅިފައި ވަނީ ގަވާއިދާއި ޚިލާފަށް ރުއްގަސް ނެގުމުގެ މައްސަލަކަމަށް އެ އިދާރާއިން ބުނެފިއެވެ.
ރާއްޖެޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން އީޕީއޭގެ ޑިރެކްޓަރ ޖެނެރަލް އިބްރާހީމް ނައީމް ވިދާޅުވީ އީޕީއޭ އަށް މިހާރު އެންމެ ގިނައިން ހުށަހަޅަނީ ޤަވާއިދާއި ޚިލާފަށް ރުއްގަސް ނެގުމާއި، ގަވާއިދާއި ޚިލާފަށް ވެލި ނެގުމުގެ މައްސަލަ ކަމަށެވެ. މި ފަދަ ކަންކަމަކީ އެކަމުގެ ސަބަބުން ތިމާވެއްޓަށް ވަރަށް ބޮޑަށް އަސަރުކުރާ ކަންކަން ކަމަށާއި އެފަދަ ކަންކަން މަދުކުރުމަށް އީޕީއޭއިން އަބަދުވެސް ވަރަށް ޚާއްސަ ސަމާލުކަމެއްދޭ ކަމަށް އޭނާ ވިދާޅުވިއެވެ. މީގެ އިތުރުން މިހާރު އެފަަދަ މައްސަލަތައް ހިނގާނަމަ އާއްމުން އެކަންކަން ރިޕޯޓްކުރާ މިންވަރު ވެސް އިތުރުވެފައިވާ ކަމަށް ނައީމް ވިދާޅުވިއެވެ.
މީގެ އިތުރުން ތަފާތު އެކި ދިރުންތަކަށް ގެއްލުންދޭ މައްސަލަ އާއި ޤަވާއިދާއި ޚިލާފަށް އެތަކެތި ހިފާ ކައިބޮއި ހަދާ މައްސަލަ ވެސް އެ އިދާރާ އަށް ހުށަހެޅޭ ކަމަށް ނައީމް ވިދާޅުވިއެވެ. އޭގެ ތެރޭގައި ވެލާ ބިސް ނެގުމާއި، ވެލާ މަސް ކެއުން ފަދަ ކަންކަން ފާހަގަކޮށްލެވެއެވެ. ހަމައެހެންމެ މިޔަރު ފަދަ މަސްމަހާއި މެއްސަށް އެއް ގަޑިއަކަށް ތާވަލުކޮށްގެން ކާންދިނުން ފަދަ ކަންކަން ހިނގުން މިހާރު އާއްމުވެފައިވާ ކަމަށް އޭނާ ވިދާޅުވިއެވެ. މިފަދަ ކަންކަމަކީ އޭގެ ސަބަބުން މިޔަރުގެ ފިތުރަަތާއި ޚިލާފު ކަންކަން އޭގެ ކިބައިގައި އަށަގަނެ، އެ މިޔަރުތަކުގެ ފަރާތުން އެހެން ބަޔަކަށް ނުރައްކަލެއް ކުރިމަތިވުމަށް މަގުފަހިކުރުވަފާނެ ކަމެއް ކަމަށް އޭނާ ވިދާޅުވިއެވެ.
އެހެންކަމުން އެފަދަ ކަންކަން ކުރުން ހުއްޓާލުމަށް ނައީމް ވަނީ ޢިލްތިމާސްކުރައްވާފައެވެ. ނައީމް ވިދާޅުވީ މިފަދަ މައްސަލަތަކާއި ގުޅިގެން ނަސޭހަތްދިނުމަށްފަހު އިސްލާހުނުވާނަމަ ޖޫރިމަނާ ކުރާ ކަމަށެވެ. އެހެންނަމަވެސް ޖޫރިމަނާކުރުމަކީ މިކަމުގެ ހައްލުކަމަށް ބަލައިގެން ނުވާނެ ކަމަށާއި ވަށައިގެންވާ ދިރުންތަަކަށް ރައްކަތެރިވުމަކީ އެންމެންގެ ޒިންމާއެއް ކަމަށް ހަދަން ޖެހޭ ކަމަށް ވެސް ނައީމް ވިދާޅުވިއެވެ.
