އެސްޓީއޯއިން ވިއްކާ ތެލުގެ އަގު ހެޔޮކޮށްފި
ޕެޓްރޯލް ލީޓަރަކުން 83 ލާރި އަގުހެޔޮ ކޮށްފައިވާއިރު ޑީސަލް ލީޓަރަކުން 62 ލާރި ވަނީ އަގުހެޔޮ ކޮށްފައި
އެފްއެސްއެމް އީޒީފިލް
ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ޕެޓްރޯލާއި ޑީސަލްގެ އަގު ހެޔޮކޮށްފިއެވެ.
އެސްޓީއޯއިން އާދީއްތަ ދުވަހުގެ ރޭ ބުނީ އެ ކުންފުނިން ވިއްކާ ޕެޓްރޯލާއި ޑީސަލް އަގުހެޔޮ ކުރަން ނިންމާފައިވަނީ މެއި 1 އިން ފެށިގެން ކަމަށެވެ. އެގޮތުން، ޕެޓްރޯލް ލީޓަރަކުން 83 ލާރި އަގުހެޔޮ ކޮށްފައިވާއިރު ޑީސަލް ލީޓަރަކުން 62 ލާރި ވަނީ އަގުހެޔޮ ކޮށްފައެވެ.
މި ބަދަލާއެކު ކުރިން 15.97ރ. އަށް ވިއްކަމުން އައި ޕެޓްރޯލް ލީޓަރެއް މިހާރު 15.14ރ. އަށް ލިބޭނެއެވެ. އަދި ކުރިން 16.32ރ. އަށް ވިއްކަމުން އައި ޑީސަލް ލީޓަރެއް ހޯމަ ދުވަހުން ފެށިގެން 15.70ރ. އަށް ލިބޭނެއެވެ.
އެންމެ ފަހުން އެސްޓީއޯއިން ތެލުގެ އަގު ހެޔޮ ކުރީ މިދިޔަ އަހަރުގެ އޯގަސްޓު މަހުއެވެ.
އެސްޓީއޯއިން ބުނީ އެ ކުންފުނިން އަބަދުވެސް މަސައްކަތް ކުރަމުންދަނީ މި ކުންފުނިން ފޯރުކޮށްދޭ އެންމެހައި ޚިދުމަތްތައް ހުއްޓުމެއްނެތި، ދެމެހެއްޓެނިވި ގޮތެއްގައި ރައްޔިތުންނަށް ފޯރުކޮށްދެމުން ގެންދިއުމަށް ކަމަށެވެ. އެގޮތުން ދުނިޔޭގެ ބާޒާރުގައި ތެޔޮ ގަންނަން ލިބޭ އަގަށް އަންނަމުންދާ ހެޔޮ ބަދަލުތައް ގެންނާނެ ކަމަށް ވެސް އެ ކުންފުނިން ފާހަގަކުރެއެވެ.
