ދުނިޔޭގެ 32ވަނަ ކްރޭނިއޯ-މެކްސިލޯފޭޝިއަލް ކޮންގްރެސް މި އަހަރު ރާއްޖޭގައި ބޭއްވުމަށް ހަމަޖެހިއްޖެއެވެ.

ކްރޭނިއޯ-މެކްސިލޯފޭޝަލްއަކީ އުފެދުމުގައި ނުވަތަ އެކްސިޑެންޓެއްގެ ސަބަބުން ލޮލާ ނޭފަތް އަދި ބޯ ހިމެނޭހެން ކަރުންމަތީގެ ގުނަވަންތަކަށް އަދި މޫނުގެ އައިބުވެފައި ހުންނަ ކަށިތައް ރަނގަޅު ބައްޓަމަކަށް ގެނެސްދިނުމަށް ހަދާ ސާރޖަރީއެކެވެ. މިފަދަ ސާރޖަރީއެއް ހެދުމުން ބަލާލަން ރީތި ވެފައި އައިބުތައް ފިލުވާލަދެއެވެ.

މިއަހަރުގެ ކޮންގްރެސްއަކީ އިންޓަރނޭޝަންލް ކޮލެޖް އޮފް މެކްސިލޯފޭޝިއަލް ސާރޖަރީ (އައި.ސީ.އެމް.އެފް.އެސް) ގެ ކޮންފަރެންސްއެކެވެ. މިފަދަ ބައްދަލުވުންތަކުގައި މިކަމާއި ގުޅިގެން ހޯދިފައިވާ ކުރިއެރުންތަކާއި، އައު ވިސްނުންތަކާއިި އަދި ކުރެވެމުންދާ ދިރާސާތަކާއިބެހޭ ވާހަކަތައް ބަދަލުކޮށްހަދާނެ ކަމަށް އައިޖީއެމްއެޗުން ބުނެއެވެ. މި ކޮންގްރެސް ގެ ޕްރެޒިޑެންޓަކީ އަވަށްޓެރި އިންޑިއާގެ ޕްރޮފެސަރ ޑޮކްޓަރ އެސް.އެމް. ބާލާޖީއެވެ.

ޕްރޮފެސަރ ޑރ. ބަލާޖީ އަކީ އޮނޮރަރީ ކޮންސަލްޓަންޓް ފޭޝިއޯމެކްސިލަރީ ސަރޖަން އެއްގެގޮތުގައި މަސައްކަތް ކުރައްވާ ބޭފުޅެކެވެ. ފާއިތުވި އަހަރުތަކުގެ ތެރޭގައި އައި.ޖީ.އެމް.އެޗް އަދި ރީޖަނަލް ހޮސްޕިޓަލްގައި އޭނާ ވަނީ ގިނަ އޮޕަރޭޝަންތައް ކުރައްވާފައެވެ. ސްވިޒަލޭންޑް އަދި ކެނެޑާގައި ބޭއްވުނު ދުނިޔޭގެ ކްލެފްޓް ކޮންގްރެސްގައި އެންމެ މޮޅު ސައިންސް ތަހުލީލުތަކާއި ބެހޭ ކަރުދާސް، ދެފަހަރުމަތިން ހާސިލް ކުރުމާއެކު އިންޑިއާގެ އެސޯސިއޭޝަން އޮފް އޯރަލް އެންޑް މެކްސިލޮފޭޝަލް ސާރޖަންސް ގެ ފަހުރުވެރި "ޖިންވާލާ" ޓްރޮފީ އަދި އޭޝިއަން އެސޯސިއޭޝަން އޮފް މެކްސިލޮފޭޝަލް ސަރޖަރީ އިން ރަން މެޑަލް ހާސިލްކުރައްވާފައިވެއެވެ. އަދި ޓެމިލްނާޑޫ ސަރުކާރުގެ ފަރާތުން ދެއްވާ ސައިންޓިސްޓް އެވޯޑް ހާސިލްކުރެއްވުމުގެ އިތުރުން ޑރ. ބަލާޖީ ލިޔުއްވި ފޮތްތަކަށް ޓެމިލްނާޑޫގެ ސަރުކާރުން ދެއްވާ އެންމެ މޮޅު މެޑިކަލް ފޮތުގެ އެވޯޑުވެސް އެކި ފަހަރުމަތިން ވަނީ ލިބިފައެވެ.  

ދުނިޔޭގެ 32ވަނަ ކްރޭނިއޯ-މެކްސިލޯފޭޝިއަލް ކޮންގްރެސްގެ ޕްރީ ކޮންފަރެންސްތަކެއް އަންނަ މެއި މަހުގެ 1 އަދި 2ގައި ބޭއްވުމަށްވަނީ ހަމަޖެހިފައެވެ. އެގޮތުން މޭ 1 ގައި ބޭއްވުމަށް ހަމަޖެހިފައިވާ ހޭންޑްސްއޮން ވޯރކްޝޮޕް ގެ މަޢުލޫއަކީ "ކޯޓިކޯ ބާރސަލް އިމްޕްލާންޓޮލޮޖީ" ކަމަށް އައިޖީއެމްއެޗުން ބުންޏެވެ. މި ވޯރކްޝޮޕް ކުރިޔަށް ގެންދާނީ ޑެންޓިސްޓުންނަށް ހާއްސަކޮށް ހުޅުވާލެވިގެން، އިންޑިއާގެ އެކަމާ ގުޅުންހުރި އެންމެ ފުންނާބުއުސް ޑޮކްޓަރުންގެ ޓީމަކުންނެވެ.

ދޭއް މެއިގައި ކުރިއަށްގެންދާ މާސްޓަރ ކުލާހުގެ މަޢުލޫއަކީ "ޕީޑިއަޓްރިކް އެންޑް އެޑަލްޓު ކްރޭނިއޯމެކްސިލޯ ސާރޖަރީ ކޮންޖެނިޓަލް އެންޑް އެކުއާރޑް ޗެލެންޖަސް"އެވެ. މި މާސްޓަ ކްލާސް ކުރިއަގެންދާނީ އެމެރިކާގެ ނިއުޔޯރކް ޔުނިވާރސިޓީގެ ކްރެނިއޯފޭޝިއަލް ޓީމެކެވެ. މި މާސްޓަރ ކުލާހުގައި ބައިވެރިވުމަށް ފުރުސަތު ހުޅުވާލެވިފައިވަނީ އޯރަލް ސަރޖަރީ، ޕްލާސްޓިކް ސަރޖަރީ، ނިއުރޯ ސާރޖަރީ ފަދަ ކްރޭނިއޯ މެކްސިލޮފޭޝަލް ސާރޖަރީއާއި ގުޅުންހުރި އެހެނިހެން ދާއިރާތަކުގެ މާހިރުންނަށެވެ.

މި ކޮންފަރެންސާ ގުޅޭގޮތުން އައިޖީއެމްއެޗުން ބުނީ މިފަދަ ކޮންފަރެންސެއް އެ ހޮސްޕިޓަލުގައި ބޭއްވުމަކީ އިތުރު ތަޖުރިބާތަކެއް ލިބިގެންދާނެކަމެއްް ކަމަށެވެ. އަދި އެ ހޮސްޕިޓަލުގެ ސިއްޙީ ދާއިރާ ކުރިއެރުމަށްލިބޭ އިތުރު ފުރުސަތެއް ކަމަށް ވެސް ބުންޏެވެ.

އައި.ސީ.އެމް.އެފް.އެސްގެ ތިންދުވަހުގެ ބޮޑު ކޮންގްރެސް ބޭއްވުމަށް ހަމަޖެހިފައިވަނީ ބަނޑޮސް އައިލެންޑު ރިސޯޓުގައެވެ.މެއި 3-5 އަށް ބޭއްވުމަށް ހަމަޖެހިފައިވާ މި ކޮންގްރެސްގައި މުޅި ދުނިޔޭގެ އެކި ހިސާބުތަކުން ފުންނާބުއުސް ސިއްޙީ މާހިރުން ބައިވެރިވެވަޑައިގަންނަވާނެއެވެ.