މަކުނުދޫ އެއަރޕޯޓާއި އިތުރު އެއަރޕޯޓުގެ ބިން ހިއްކަން 3 ފަރާތަކުން ކުރިމަތިލައިފި

މަކުނުދޫ އެއަރޕޯޓާއި އިތުރު އެއަރޕޯޓުގެ ބިން ހިއްކަން 3 ފަރާތަކުން ކުރިމަތިލާފައިވާ ކަމަށް މިނިސްޓަރ އޮފް ނެޝަނަލް ޕްލޭނިންގ ހައުސިން އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

މިނިސްޓަރު އަސްލަމް މިހެން ވިދާޅުވި މަކުނުދޫ ދާއިރާގެ މެންބަރު މުހައްމަދު ރާއީ ކުރެއްވި ސުވާލުގެ ޖަވާބުގައެވެ.

މެންބަރު ރާއީގެ ސުވާލުގެ ޖަވާބުގައި މިނިސްޓަރު އަސްލަމް ވިދާޅުވީ މަކުނުދޫ އެއަރޕޯޓް ހިމެނޭގޮތަށް އިތުރު އެއަރޕޯޓްތައް އެޅުމަށް ބެނުންވާ ބިން ހިއްކުމަށް މިނިސްޓްރީން ދާދި ފަހުން ޓެންޑަރ ކޮށްފައިވާނެ ކަމަށެވެ. އެ ޓެންޑަރ އަށް ތިން ފަރާތަކުން ކުރިމަތިލާފައިވާ ކަމަށާއި، ބިޑްތައް އިވެލުއޭޓްކޮށް، މިހާރު މަސައްކަތް ކުރަމުންދަނީ އެތަނުން ސެލެކްޓް ކުރެވޭ 1 ނުވަތަ 2 ކޮންޓްރެކްޓަކާއެކީ ނެގޯޝިއޭޓު ކުރުމުގެ މަސައްކަތް ކުރިއަށް ގެންދަން ކަމަށެވެ. އަދި އެ މަސައްކަތް ނިމުމުން، އެއަރޕޯޓުގެ މަސައްކަތް ފެށޭނެ ދުވަހެއް ދަންނަވަން އެނގޭނެކަމަށް މިނިސްޓަރު ވިދާޅުވިއެވެ.

ހދ. ހަނިމާދޫ އިންޓަރނޭޝަނަލް އެއަރޕޯޓް ތަރައްޤީ ކުރުމުގެ މަސައްކަތް ފެށުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދެއްކެވި ވާހަކަފުޅުގައި ވަނީ މަކުނުދޫ، ބިލެތްފަހި، ތުޅާދޫ، އަދި ވިލުފުށީ އެއަރޕޯޓް އަޅާނެ ފައިސާ ހޯދިއްޖެ ކަމަށެވެ. އަދި މަސައްކަތް ކުރާނެ ބަޔަކު ހޯދުމަށް ބީލަމަށް ހުޅުވާލެވިއްޖެ ކަމަށާއި، ދެން އޮތީ މަސައްކަތް ފެއްޓެވުން ކަމަށް ރައީސް ވިދާޅުވިއެވެ.

އެއާޕޯޓް އެޅުމަށް ހިނގާނެ ހަރަދުގެ ގޮތުގައި މަކުނުދޫ އެއަރޕޯޓަށް ސަރުކާރުން އަންދާޒާ ކުރަނީ 23,300,000 ޑޮލަރެވެ.

ސަރުކާރުން ވަނީ ރ. އަލިފުށި، ހދ. މަކުނުދޫ، ށ. ބިލަތްފަހި، ބ. ތުޅާދޫ، މ. މުލި، ފ. މަގުދޫ އަދި ތ. ވިލުފުށި އަދި ރ. އަތޮޅުގެ އިތުރު ރަށެއްގައިވެސް އެއާޕޯޓެއް އެޅުމަށް ނިންމާފައެވެ. މީގެތެރެއިން ފ. މަގޫދޫ އާއި އަލިފުށި އެއާޕޯޓުގެ މަސައްކަތް ވަނީ އެމްޓީސީސީއާ ހަވާލުކޮށްފައެވެ.