މިފްކޯގެ ރޯދަ ޕްރޮމޯޝަންގައި ބައިވެރިވެގެން އެއްލައްކަ ރުފިޔާ ހޯދުމުގެ ފުރުސަތު

މިފްކޯގެ ރޯދަ ޕްރޮމޯޝަން ބުރާސްފަތި ދުވަހުގެ ރޭ ފަށައިފިއެވެ.

ހުޅުމާލެ ފޭސް 2ގައި މިފްކޯ އިން އަލަށް ހުޅުވި މަސްފިހާރާގައި އޮތް ރަސްމިއްޔާތުގައި ޕްރޮމޯޝަން ފައްޓަވައިދެއްވީ އެކުންފުނީގެ ޑެޕިއުޓީ ސީއީއޯ އިބްރާހިމް އިޒްހާނެވެ.

މި ޕްރޮމޯޝަންގައި މިފްކޯގެ މަސްފިހާރަތަކުން 200 ރުފިޔާއިން މަތިން ކުރާ ކޮންމެ ވިޔަފާރިއަކަށް ކޫޕަނެއް ލިބޭނެއެވެ. އަދި ކޫޕަން ހުށަހަޅައިގެން ހޮވޭ ނަސީބުވެރި ތިން ފަރާތަކަށް ފައިސާގެ އިނާމު ދިނުމަށް ހަމަޖެހިފައިވާއިރު އެއްވަނައަށް ހޮވޭ ފަރާތަކަށް އެއްލައްކަ ރުފިޔާ ލިބިގެންދާނެއެވެ. އަދި ދެވަނައަށް ހޮވޭ ފަރާތަކަށް 45،000 ރުފިޔާ ދިނުމަށް ހަމަޖެހިފައިވާއިރު ތިންވަނައަށް ހޮވޭ ފަރާތަށް 25،000 ރުފިޔާ ލިބިގެންދާނެއެވެ.

މި ޕްރޮމޯޝަންގައި ބައިވެރިވެވޭނީ މާލެ އާއި ހުޅުމާލެ ފޭސް 1، ފޭސް 2 ގެ މަސްފިހާރައިގެ އިތުރުން އައްޑޫ، ކޫއްޑޫ އަދި ފެލިވަރު ފިޝަރީޒް ކޮމްޕްލެކްސްގެ މިފްކޯގެ މަސްފިހާރަތަކުން ވިޔަފާރި ކުރާ ފަރާތްތަކަށެވެ.

މިފްކޯއިން މި ފަހަރު ވެސް ވަނީ ރޯދަ ހަދިޔާގެ ގޮތުގައި ދެވޭނެ މަސްދަޅު ޕެކްތަކެއް ތައާރަފުކޮށްފައެވެ. އޭގެ ތެރޭގައި ހަ ދަޅުގެ ޕެކާއި، 12 ދަޅުގެ ޕެކް ހިމެނެ އެވެ. މި ޕެކުތަކުގެ އިތުރުން 24 ދަޅު އަދި 48 ދަޅުގެ ކޭސް ރޯދަ ހަދިޔާގެ ގޮތުގައި ޑެލިވަރީކޮށްދޭނެއެވެ.

މިފްކޯގެ ޖެނެރަލް މެނޭޖަރު ސޭލްސް އެންޑް މާކެޓިން އަހްމަދު ޒާމް ވިދާޅުވީ ރޯދަ މަހަށް މިފްކޯގެ އުފެއްދުންތަކުގެ އަގަށް ބަދަލެއް ނުގެނެސް، މިހާރު ހުރި އަގުތަކުގައި ވިއްކަމުންދާނެ ކަމަށެވެ.