އަލިފާނުގެ ހާދިސާ: ބިދޭސީ މުވައްޒަފުންނަށް ވަގުތީ ހިޔާގެ ގޮތުގައި ހުޅުމާލެ ކޮވިޑް ފެސިލިޓީ ހަމަޖައްސައިފި

ނީލަން ފިހާރަގައި ހިނގި އަލިފާނުގެ ހާދިސާގައި  އަނދާފައިވާ އެކޮމޮޑޭޝަން ބްލޮކްތަކުގައި ދިރިއުޅުނު މާލެ ސިޓީ ކައުންސިލްގެ ބިދޭސީ މުވައްޒަފުންނަށް ވަގުތީ ހިޔާގެ ގޮތުގައި ހުޅުމާލެ ކޮވިޑް ފެސިލިޓީ ހަމަޖައްސާފައިވާ ކަމަށް މާލެސިޓީ ކައުންސިލުން ބުނެފިއެވެ.

ސިޓީ ކައުންސިލްގެ 202 ބިދޭސީ މުވައްޒަފުން މިހާރު އެތަނަށް ބަދަލުކޮށްފައިވާއިރު އެމީހުންނަށް ބޭނުންވާ ކަންކަން ހަމަަޖެއްސުމުގެ މަސައްކަތް ދަނީ ކުރަމުންނެވެ.

މާލެ ސިޓީ ކައުންސިލުގެ މޭޔަރ ޑރ. މުހައްމަދު މުއިއްޒު ވިދާޅުވީ އެމީހުންނަށް ފާހަނާކޮށް ފެންވެރޭނެ އިންތިޒާމްތައް ހަމަޖެހިފައިވާ ކަމަށެވެ. އެހެންނަމަވެސް ކެއިންބުއިމުގެ އިންތިޒާމުތައް ހަމަޖައްސަން ޖެހޭނީ ސިޓީ ކައުންސިލުން ކަމަށެވެ.

އެތަނުގައި އެ މުވައްޒަފުން އެއްމަސް ނުވަތަ ދެ މަސް ދުވަހު ތިބެން ޖެހިދާނެ ކަމަށް ވެސް މުއިއްޒު ވިދާޅުވިއެވެ. އަދި ބިދޭސީ މުވައްޒަފުން ބޭތިއްބުމަށް އިތުރު ތަނެއް ހެދުމުގެ މަސައްކަތް ފައްޓަވާނެ ކަމަށް ވެސް މޭޔަރު ވިދާޅުވިއެވެ.

މި ހާދިސާގެ ރިޕޯޓު އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ހޯމަ ދުވަހުގެ ފަތިހު 05:43 ހާއިރު ލިބުމާއެކު އެފްއާރުއެސްގެ ފަޔަރމަނުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ވަގުތުން ވަނީ ފަށާފައެވެ. މިހާދިސާގައި އެންމެ ފުރަތަމަ އަލިފާން ރޯވެފައި ވަނީ ނީލަން ފިހާރަ ހުރި ސަރަހައްދުގައެވެ. މީގެ އިތުރުން އަލިފާން އިތުރަށް ފެތުރި ނީލަން ފިހާރައިގެ އުތުރުގައި ހުރި މީހުން ދިރިއުޅޭ ލޭބަރކުއާޓަރެއްގައި ވެސް ވަނީ އަލިފާން ރޯވެފައެވެ.

މިހާދިސާގައި ފަޔަރ އެންޑް ރެސްކިޔު ސަރވިސްގެ ފަޔަމަނުންނާއި މޯލްޑިވިސް އެއަރޕޯޓް ކޮމްޕެނީ ލިމިޓެޑްގެ ފަޔަރމަނުން ކުރި މަސައްކަތުން ނީލަން ފިހާރައިގެ އުތުރުގައި އިމާދުއްދީން ސްކޫލާއި ދިމާލުގައި ފެތުރެމުންދިޔަ އަލިފާން ހެނދުނު 07:35 ހާއިރު ވަނީ ކޮންޓްރޯލް ކޮށްފައެވެ. އަދި ނީލަން ފިހާރައިގެ އިރުމަތިން ފެތުރެމުންދިޔަ އަލިފާން ކޮންޓްރޯލްކުރެވިފައި ވަނީ ހެނދުނު 08:30 ހާއިރުއެވެ.